LUKA 18

1Wo xo, Isa xa ɲin tali in la i ɲen, x'a yita i la xo i xa xan xa Ala matara tuma bee, i xana sege muume. 2A xo: «Kiititegela do tun be gallo do to, a nte silala Ala ɲa, a nte moxo si bunɲala. 3Musujaxe do du tun be wo gallo to, a tun be tula nala xe in bata x'a fo a ɲen xo: “Ń na mone labo ń keleɲoxo to!” 4Kiititegela in xa waxati jan ke, a man son. Wo xo, a x'a fo a fan ɲen xo: “Tonɲa, ń nte silala Ala ɲa, ń nte moxo du bunɲala. 5Bari ɲin musujaxe in be nte segela. Wo xanma, ń be nala a mone labola a keleɲoxo to. Nin wo nte, a si tu nala ń segela.” » 6Wo xo, Marigi xo du xo: «Alu ɲin kiititegela jaxu in na xumo lame! 7Ala la ɲalatonbonninŋo mennu be xasila a ma su nin tili, a me wolu la mone bo ba? A si me ba x'a tara a man wolu deema? 8Nte b'a fola alu ɲen xo a si wolu la mone bo junna. Bari nin Moxo Dinxe nata lunŋo men, a si lannaya tara duguxulo xan ba?» 9Isa xa ɲin tali in la moxolu ɲen, mennu be i fannu jaatenin moxo tilinninŋolu ti, xa tolu jaate fuwo ti, a xo: 10«Moxo fula taxata Alabatusuba xono Ala matara la. Do tun mu Farisiya le ti, do mu sagallemutala ti. 11Farisiya in tun b'a danna xa Ala matara í xonoto ten xo: “Ala, ń be barako bulala í ɲen, bawo ń nte í xo moxo tolu be ɲa men, wolu mennu xa sun, i xa jaxu, i xa jado; ń b'é tantula, bawo ń nte í xo ɲin sagallemutala in be ɲa men. 12Ń be tili fula sunna loxokunŋo xono. Ń be fen fen sotola, ń be wo jakko bola.” 13Sagallemutala, wo x'é lo dulajan, haali a tun me fatiya, x'a kunŋo xotota xa sanxulo mafele. A tun be a xaro malippala x'é fan majigi x'a fo xo: “Ala, hinna ń na, bawo nte mu junubekela le ti.” » 14Isa xo: «Ń b'a fola alu ɲen xo, ɲin xe in tilinninŋo taxata a la luwo ma, bari Farisiya in, wo man tilinninɲa soto. Bawo moxo wo moxo je a fan xotota, wo si majigi. Moxo wo moxo je a fan majigi, wo si xotota.» 15Moxo dolu nin deenano do dulu nata Isa bata, walasa a x'a bulo la i xan, xa duwa i ɲen. xarandinŋolu xa wo je tumo men, i xa wolu madigaamu. 16Bari Isa xa deenanolu sodun í la, x'a fo xo: «Alu a tu dindinŋolu xa na nte bata! Alu xana i bali, bawo Ala la Mansaya mu i ɲoxon nelu ta ti. 17Tonɲa la, ń b'a fola alu ɲen xo: Nin moxo wo moxo man Ala la Mansaya muta í xo dindinŋo, wo me dun no a xono abada.» 18Yahudiyalu la ɲamoxo do xa Isa ŋininxa xo: «Karanmoxo ɲuma, ń xa xan xa mun ke nin ń si nilamaya banbalo soto?» 19Isa xo a ɲen xo: «Mun na í be ɲumaya fola nte ɲen? Moxo si nte ɲuma ti nin Ala kilin nte. 20Í xa sariyalu lon xo: “Í xana jadoya ke; í xana moxo faxa; í xana suuɲali ke; í xana xaro la í moxoɲoxo la; í na nin í fa bunɲa.” » 21Xe xo: «Kabirin ń dindin, nin ń be ɲin sariya innu bee labatula.» 22Wo xumolu me xo, Isa xo a ɲen xo: «Ku kilin tuta í ɲen xo. Fen wo fen be í kun, taxa a bee fiiri, xa wo xaaliso tala segebaxantunŋolu te. Nin wo keta, naafuluba si ke í kun sanŋo to. Wo xo, í si na a lo nte nofe.» 23Xe xa wo xumo me tumo men, a nitokuwata, bawo naafulutigiba le tun mu. 24Isa x'a ɲa tositininŋo je tumo men, a xo: «Naafulubatigo dunŋo xa xole Ala la Mansaya xono de! 25Ɲogomo dunŋo mesendiwuwo fe, wo xa newo xa tanbi naafulubatigo dunŋo ti Ala la Mansaya xono.» 26Wo xumo mebaxolu xo: «Jon dun si kisi no?» 27Isa x'e jaabi xo: «Hadamadinŋolu si kori men ma, Ala me kori wo ma.» 28Wo to, Piyere xo: «Ntelu kennu buruta n bulufenŋolu to, x'a lo í nofe.» 29Isa xo i ɲen xo: «Tonɲa la, ń b'a fola alu ɲen xo: Moxo wo moxo je ɲiɲa a la luwo xo, walla a musu, walla a badinxelu, walla a wulubaxolu, walla a dinŋolu xo, Ala la Mansaya xanma, 30a si wo ɲoxon kiika soto x'a tu ɲin duniya in xono, xa nilamaya banbalo soto sinin.» 31Isa x'a la xarandin tan nin fulo kili, x'a fo i ɲen xo: «Alan taxato fele Yerusaleme, kilalu xa fen wo fen safe Moxo Dinxe la kuwo to, wo bee si dafa. 32A si dun Alalonbalolu bulu, i si jele a ma, x'a nani, xa dajiyo tuppu a ma. 33I s'a buwo gaɲo la. Wo xo, i s'a faxa. A sa tili sabo, a si kuni xa bo furelu to.» 34Bari xarandinŋolu man fusi faamu wo kuwo to. Wo xumo xoto tun be dugunin i ma. I man a lon Isa tun b'a fe xa men fo i ɲen. 35Isa sutiyata Yeriko la. Wo xa fiyonto do tara siginin silada la, sadaxatara la. 36A xa jama tanbito sonxoxanŋo me tumo men, a xa ŋininxalo ke, xo mun be je. 37I x'a fo a ɲen xo Nasareti Isa le be tanbila. 38A fetenta xo: «Isa, Dawuda Mamarinŋo, hinna ń na!» 39Moxo men tunnu be ɲa, wolu x'a madigaamu xo a x'é de. Bari wo bee xan, a xa do kafu fetenŋo ma, x'a fo xo: «Dawuda Mamarinŋo, hinna ń na!» 40Isa lota, xa yanmaro di xo i xa na a ti. Fiyonto sininma a ma, Isa x'a ŋininxa xo: 41«Í b'a fe ń xa mun ke í ɲen?» Fiyonto x'a jaabi xo: «Marigi, ń b'a fe ń ɲalu xa yele!» 42Isa xo a ɲen xo: «Jelo ke! Í la lannaya x'é kendeya.» 43Wo no bee to, a xa dula je. A x'a lo Isa nofe, xa Ala tantu. Jama bee xa wo je, xa Ala tantu.

will be added

X\