LUKA 17

1Isa xo a la xarandinŋolu ɲen xo: «Kuwo mennu si moxolu bula xa junubo ke, wolu me furun no. Bari moxo men je ke a sabaabo ti, bone be wo tigo ɲen. 2Xa kuru belebeleba siti a xanŋo la, x'a fili xooxojiyo to, wo xa fisa wo tigo ma don ti xa ɲin dindin innu kilin bula junubo kela. 3Alu i korosi bete! «Nin í badinŋo xa junubo ke, xuma soobe a ɲen. Nin a nimisita, yaafa a ma. 4Nin a x'é haxxo ta í xo sinɲa woorowula tili kilin xono, nin a saagita í ma sinɲa woorowula, x'a fo í ɲen xo: “Haketu,” í xa yaafa a ma.» 5Kiladinŋolu xo Marigi ɲen xo: «Do kafu n na lannaya ma.» 6Marigi xo: «Haali nin alu la lannaya tun xa bun í xo mutaradekeso, alu tunnu s'a fo ɲin yiriju in ɲen xo: “Í nin í lillolu bee xa bo xa taxa tutu xooxojiyo to”, wo tun si alu lame.» 7«Alu to jon be je, nin jonxe b'a bulu seno la, walla marafen negaano la, nin a s'a fo wo ɲen a boninma wulo to xo: “Na sigi, í xa domolo ke?” 8A me a fo a ɲen ne ba xo: “Domolo dara x'a di ń ma. Í tetositi xa ń na haajolu ke fo ń xa domolo ke xa ń min tumo men. Wo xo, í du si domolo ke x'é min.” 9A si wo jonxe tantu ba, bawo a x'a bula men na, a xa wo ke? 10Atelu dulu je bula baaro men na, nin alu xa wo ke x'a dafa, alu a fo xo: “N mu jon gansanŋo lelu ti. N tunnu xa xan xa men ke, n xa wo doron ne ke.” » 11Xa Isa tu taxanin Yerusaleme, a bota Samari maro nin Galile maro te la. 12A dunto gallo do to, bagito tan x'a kunben. I x'e lo dulajan, 13x'e xanŋo labo Isa ma. I xo: «Karanmoxo Isa, hinna n na!» 14Isa x'e je tumo men, a xo i ɲen xo: «Alu taxa i yita sadaxalasibaxolu la.» I bulata silo to. X'e taxato tu, i kendeyata. 15Wolu to kilin x'a fan kendeyaninŋo je tumo men, a x'é koppa xa Ala tantu, a xanŋo layeleninŋo. 16A x'a foda lo dugo ma Isa xoto, x'a tantu. Wo xe tun mu Samaringo le ti. 17Isa xa xumo ta, a xo: «I tanŋo bee man kendeya ba? Xononto be min? 18Ɲin luntan in kilin doron ne x'é koppa ba xa na Ala tantu?» 19Wo xo, Isa xo a ɲen xo: «Wuli í xa taxa. Í la lannaya x'é kisi.» 20Farisiyalu xa Isa ŋininxa Ala la Mansaya na waxato la. A x'e jaabi xo: «Ala la Mansaya nte nala ɲa ma, fo moxolu ɲa s'a je. 21A me fo xo: “A fele jan!” walla: “A fele non!” Bawo Ala la Mansaya felenti alu bata.» 22A xo a la xarandinŋolu ɲen xo: «Lunŋolu si na, a si diya alu ɲen xa Moxo Dinxe la lunŋo do je, bari alu me a je. A si fo alu ɲen xo: 23“A be jan!” walla: “A be non!” Bari alu xana taxa non, alu xana a lo wo fobaxolu nofe. 24Awa, sanjimeɲenxo be keneya bola sanxulo kun nin a kun te ɲa men, Moxo Dinxe du si ke ten a nalunŋo. 25Bari jan nin wo te, waajibo le mu, a xa tooro bete folo, anin bi moxolu xa ban a to. 26Kuwo mennu keta Nuhun na waxato, wo ɲoxonnu si ke Moxo Dinxe la lunŋolu. 27Nuhun tilo, moxolu tunnu be domolo kela, x'e min, xa futuwo ke, x'e dinŋolu di futuwo la, fo Nuhun dunta xulunba xono lunŋo men. Wo xo, waameba nata x'e bee halagi. 28Men keta Lote la waxato, wo ɲoxon si ke. Moxolu tunnu be domolo kela x'e min, xa sanno nin fiiro ke, xa seno ke, xa bunŋolu lo. 29Bari lunŋo men, nin Lote bota Sodome gallo to, wo lunŋo fan, ta nin tinbiritiyo jigita xa bo sanŋo to í xo sanjiyo, x'e bee halagi. 30Moxo Dinxe du je í yita lunŋo men, wo ɲoxon si ke. 31«Wo lunŋo je men tara a la bilo sanŋo to, x'a tara a bulufenŋolu be bugo xono, wo xana jigi x'a be wolu tala. A je men du tara fuuto to, wo xana í koppa. 32Al'alu hakilo lajigi Lote musu la kuwo la. 33Moxo men je a fo xo a be a niyo kisila, wo si bono a niyo to. Moxo men je bono a niyo to, wo niyo si kisi. 34Ń s'a fo alu ɲen xo wo lunŋo suwo to, moxo fula si tara laran kilin xan: Do si ta, xa do tu je. 35Musu fula si tara jurilo la i ɲoxo fe: Do si ta, xa do tu je. [ 36Xe fula si tara fuuto to: Do si ta, xa do tu je.]» 37Xarandinŋolu x'a ŋininxa xo: «Marigi, wo si ke min?» A x'e jaabi xo: «Fen fure banna kela dula wo dula, dugolu si jigi non.»

will be added

X\