LUKA 16

1Isa xo a la xarandinŋolu ɲen xo: «Xe naafulutigo do le, xotosigibaxa nanbarante do tun b'a kun. A fota a ɲen xo a la xotosigibaxo b'a ma x'a la naafulo totiɲa. 2A marigi x'a kili, x'a fo a ɲen xo: “Ń be men menin í xotoxo to, wo mu mun ti? Í xa xaaliso labaara ɲa men, wo ɲa yita ń na, bawo í me tu no ń xotosigibaxaya la tugun.” 3Xotosigibaxa in x'é tu a xonoto xo: “Ń marigi be ń nabola le a xotosigibaxaya la. Ń si na mun ke? A barake nte ń na xa seno ke, don dun maluya be ń na xa sadaxo tara. 4Uhun! Ń be nala men kela, ń x'a lon. Nin ń na baarada tiɲata ń ma, moxolu si ń nadun i bata.” 5Wo xo, a marigi la julo be moxo mennu la, a xa wolu kili kilin kilin. A xo folo ɲen xo: “Ń marigi la jelu b'é la?” 6A xo: “Oliwetulo barigondin keme.” Xotosigibaxo xo a ɲen xo: “Í la julusafe fele. Í tariya í x'é sigi xa tan luulu safe.” 7Wo xo, a xo do xote ɲen xo: “Ite xa xan xa jelu sara?” Wo xo: “Alixaamo booto keme.” Xotosigibaxo xo: “Í la julusafe fele. Tan sagi safe.” 8Marigi in x'a la xotosigibaxa nanbarante in tantu, bawo a xa ɲin ku innu ke kewuya la. Bawo ɲin duniya in moxolu xa kewu i ɲoxo te kuwolu to xa tanbi moxolu la, mennu be i taxamala keneya la.» 9Isa xo du xo: «Nte ken b'a fola alu ɲen xo ɲin duniya in naafulo, men be moxo neenela, alu wo ke xa terolu soto alu fannu ma, walasa nin a dasata alu la lunŋo men, wo terolu x'alu ladun sigidula wulibalolu xono. 10Moxo men mu lannayamoxo ti kundinŋolu to, a mu lannayamoxo ti kuba dulu to; moxo men mu nanbarante ti kundinŋolu to, a mu nanbarante ti kuba dulu to. 11Nin alu man ke lannayamoxo ti ɲin duniya in naafulo labaaraɲa to, wo men be moxo neenela, jon si la a la no xa naafulu soobe xarifa alu ma? 12Nin alu man ke lannayamoxo ti ŋandinaafulo to, jon si alu ta di alu ma? 13«Baaradin si me baaro ke no marigi fula ɲen. Nin a be kilin jaxuyanin, a be do xanunin ne. Walla nin a be notonin kilin na, a nte do jaatela. Alu me baaro ke no Ala nin xaaliso ɲen i ɲoxo la.» 14Farisiyalu xa wo xumolu bee me, i jeleta Isa ma, bawo xaaliso tun xa di i ɲen. 15Isa xo i ɲen xo: «Alu be alu fannu kela moxo tilinninŋolu ti moxolu ɲala, bari Ala x'alu sondonmelakuwolu lon; bawo hadamadinŋolu be men jaatela kuba ti, wo mu haramo le ti Ala ɲa xoto. 16«Sariya nin kilalu la xumolu tunnu be je, fo xa na a bula Batiselila Yaya la waxato la. Kabirin wo tumo, nin Ala la Mansaya xibaru Dimanŋo be fola, moxolu bee be i jijala xa dun a xono. 17Sanxulo nin duguxulo si sanko, bari haali safedin doxomandin kilin me bo sariya la. 18«Moxo wo moxo je a musu bula, xa do xote futu, wo xa fuyanɲa ke. Moxo men je musu futusaninŋo ta, wo xa fuyanɲa ke.» 19«Ɲin keta xe naafulutigo do le ti, a tun be faama faanolu nin lenfaanolu dunna, xa domoli beto nin tulunŋo ke lun wo lun. 20Xe segebaxantunŋo do tun be lanin a la da la, a toxo xo Lasare. Wo balo bee be telenin. 21Domolo mennu be butunna naafulutigo domolito xoto, a tun b'a fe xa wolu domo. X'a fara wo xan, wulolu tunnu be nala a la dalu newula. 22«Lun do, segebaxantunŋo sata. Melekiyolu taxata a bula Burehima bata. Wo xo, naafulutigo du sata, a lasita. 23Xa naafulutigo tu lahara, a tun be tooroba to je. A x'a ɲa xotota xa Burehima je dulajanŋo, Lasare b'a bata. 24A fetenta xo: “Ń Fa Burehima, hinna ń na; Lasare ki a xa taxa a buluxonondinŋo nunŋo bula jiyo to, xa na maxa ń nenŋo la, bawo ń be tooronin jaxu ɲin ta in to.” 25Burehima x'a jaabi xo: “Ń din, í hakilo tu a la xo ite xa fen ɲuma kiika soto í la nilamaya xono. Lasare dun segejaxuta a la nilamaya xono. Saasa ate be ɲasuma xono, ite be tooro xono. 26Anin du, dinxajironba be ntelu nin atelu te. Mennu b'a fe xa bo jan xa taxa alu bata, wolu me wo no; mennu b'a fe du xa bo alu bata xa na jan, wolu me wo no.” 27Naafulutigo xo: “Ń fa Burehima, Lasare bula a xa taxa ń fa bata, 28bawo ń badinxe moxo luulu be non. A xa taxa wolu lasobi, walasa i xana na ɲin tooro in to.” 29Burehima x'a jaabi xo: “Musa nin kilalu la xumolu b'e bulu je: I xa wolu lame.” 30Naafulutigo xo: “Ń fa Burehima, wo me i bo. Bari nin do bota furelu to xa taxa xuma i ɲen, i si tuubi.” 31Bari Burehima x'a jaabi xo: “Nin i man son xa Musa nin kila tolu lame, haali nin fure do kunita, i me son xa tuubi.” »

will be added

X\