LUKA 15

1Sagallemutalalu nin kujaxukelalu bee x'e sutiya Isa la x'a lame. 2Farisiyalu nin sariya karanmoxolu ŋuunuŋuunuta x'a fo xo: «A be kujaxukelalu mutakubetela, fo a nin i be kafula domolo ma.» 3Isa woman in xa ɲin tali in la i ɲen xo: 4«Moxo joman be alu to, nin saaxa keme b'a kun, kilin xa sanko wolu to, nin a me tan xononto nin xononto tu wulo xono, xa taxa sankoninŋo ŋinin, fo a x'a je tumo men? 5Nin a x'a je tumo men, a si ɲaɲa, xa saaxa in la a danbankunŋo la, a nin a xa taxa su. 6Nin a x'é koppa a bata ma, a si a xanuntelu nin a sigiɲoxolu kili x'a fo i ɲen xo: “Alan xa ɲaxali i ɲoxo fe, bawo ń xa ń na saaxo je, men tun sankota.” 7Ń b'a fola alu ɲen xo wo ɲa ma, nin junubekela kilin tuubita, ɲaxalo si ke sanŋo to xa tanbi moxo tilinnin tan xononto nin xononto la kuwo la, mennu maakuwo nte tuubilo la.» 8Isa xo tugun xo: «Musu joman be je, nin xaalisixoyi ganan tan b'a kun, kilin xa sanko wolu to bunŋo xono, nin a me lanpo lamana, xa bunŋo fita, x'a la xaalisixoyo ŋinin, x'a ŋinin, fo a x'a je? 9Nin a x'a je tumo men, a s'a xanuntemusolu nin a sigiɲoxomusolu kili a bata, x'a fo i ɲen xo: “Alan xa ɲaxali i ɲoxo fe, bawo ń tun na xaalisixoyo men sankota, ń x'a je!” » 10Isa xo: «Wo be ɲa men, ń b'a fola alu ɲen xo, nin junubekela kilin tuubita, Ala la melekiyolu si ɲaɲa wo tigo la.» 11Isa xo tugun xo: «Dinxe fula tun be xe do kun. 12Lun do, doxo xo a fa ɲen xo: “Ń fa, ń ta di ń ma í ke to.” Fa woman in x'a la naafulo tala i te. 13Tili dantalu tanbininŋo xo, doxo x'a la fenŋo bee fiiri, xa taxa jamanu janŋo do xan. A x'a la naafulo bee tiɲa duniyadiya la non. 14A x'a la naafulo bee domo tumo men, xonxoba nata wo jamano xono. Fenŋo bee dasata a la. 15A taxata wo jamano moxo do bata, xa ke wo bulu baaro la. Wo x'a bula lenegaano la wulo xono. 16Xonxo digikujaxo a la, a tun b'a fe x'a xono fa lelu la domolo la, bari moxo si man fen di a ma. 17X'a tu wo ɲa ma, a x'é miiri a fan ma, a xo: “Baaradin kiika be nte fa la luwo xono, wolu b'e fala lun wo lun x'a to tu, nte felenti sala xonxo bulu jan.” 18A xo: “Nte si wuli xa taxa ń fa bata, x'a fo a ɲen xo: Ń fa, ń xa Ala junubo ta, x'é junubo ta. 19Nte man xan xa kili xo í dinŋo tugun. Ń muta í xo í la baaradinŋo do.” 20Wo to, a wulita xa taxa a fa bata. «X'a tu dulajanŋo, a fa x'a je. A hinno x'a muta: A woman in x'é bori xa taxa í sappi a ma, x'a baataya xonton. 21Dinxe xo a fa ɲen xo: “Ń fa, ń xa Ala junubo ta, x'é junubo ta. Ń man xan xa kili xo í dinŋo tugun.” 22Bari a fa xo a la jonŋolu ɲen xo: “Alu i tariya xa na dorokolu to betemanŋo ti, x'a dun a xanna, xa doronma dun a bulo la xa samatolu dun a to. 23Alu na tuurandin tolonŋo ti, x'a faxa. Alan xa domolo ke, x'e tulun, 24bawo ń dinxe men tun sata, a kunita. A tun sankota, bari a jeta.” I woman innu xa tulunŋo damuta. 25«Wo be kela tumo men, wo xa xoto tara fuuto to. A sutiyaninŋo luwolu la, a xa folixanŋo nin donxanŋo me. 26A woman in xa baaradinŋo do kili x'a ŋininxa wo tulunŋo kunŋo la. 27Wo xo a ɲen xo: “Í doxoxe le nata. Í fa dun xa tuurandin tolonŋo faxa a ɲen, bawo a x'a kendo je.” 28Xoto diminta, a man son xa dun luwo ma. A fa bota xa taxa a matara, xo a xa dun. 29A x'a fa jaabi xo: “A san kiika fele, nte be baaro la í ɲen í xo jonŋo, ń man dali x'é sooso. Bari í bada man bakotondin di nte ma xo ń nin ń xanuntelu x'e tulun. 30Í dinŋo men x'é la naafulo tiɲa jadomusolu la, wo naninma, í janxa tuurandin tolonŋo faxa a ɲen.” 31A fa xo a ɲen xo: “Ń din! Ite be ń kun jan tuma bee. Fen wo fen be ń kun, a bee mu ite le ta ti. 32Bari n xa xan xa ɲaxali, x'e tulun, bawo í doxoxe men tun sata, a kunita. A tun sankota, bari a jeta.” »

will be added

X\