LUKA 14

1Tofoɲolunŋo do, Isa taxata Farisiyalu la kuntigo do bata domolo la. Men tunnu be je, wolu tunnu be Isa lakorosinin bete. 2Xe do tun be je, fuunujangaro tun b'a la. 3Isa xa xumo ta, xa sariya karanmoxolu nin Farisiyalu ŋininxa xo: «A be dagenin ba xa jangaruto kendeya tofoɲolunŋo, walla a nte dagenin?» 4Bari i tuta denin. Wo tumo la, Isa xa jangaruto muta x'a kendeya, x'a bula a xa taxa. 5Wo xo, a xo i ɲen xo: «Nin alu do dinxe walla a la tuura bulata xolonŋo xono, a me a layele wo no bee to ba, haali nin tofoɲolunŋo le mu?» 6I korita a jaabila. 7Isa x'a korosi xo moxo mennu kilita domolo ma, wolu tunnu be ɲafesigidulalu ɲalatonbonna. A xa taliyo la wolu ɲen xo: 8«Nin moxo do x'é kili domolo la maaɲoya to, í xana taxa í sigi ɲafe. Í man a lon nin moxo do kilita domoli in ma, men xa bun í ti; 9alu fulo bee kilibaxo xana na a fo í ɲen xo: “Wuli, í xa ɲin sigidula in di ɲin ma.” Nin wo keta, í maluninŋo si taxa í sigi xofe. 10Bari nin í kilita domolo ma, taxa í sigi xofe, walasa nin í kilibaxo nata, a x'a fo í ɲen xo: “Ń terixe, na taxa í sigi ɲafe.” Nin wo keta, í si bunɲa soto í domolikeɲoxolu ɲala. 11Moxo wo moxo x'a fan xotota, wo si majigi, men je a fan majigi, wo si xotota.» 12Wo xo, Isa xo a kilibaxo du ɲen xo: «Nin í xa xontonba walla siimanba dara, í xana í xanuntelu kili, walla í la lumamoxolu walla í badinŋolu, walla í sigiɲoxo naafulutigolu. Nin wo nte, wo dulu si í kili no domolo ma, x'é la julo sara. 13Bari nin í xa domoliba toben, fangantanŋolu nin moxo yellatolu nin namatolu nin fiyontolu kili. 14Í si heero soto, katugala wolu me na í la kililo julo sara no. Í si wo sara soto moxo tilinninŋolu kunilunŋo.» 15Wo domolikebaxolu do xa wo xumolu lame tumo men, a xo Isa ɲen xo: «Moxo men si domolo ke Ala la Mansaya xono, heero be wo ɲen.» 16Isa x'a jaabi ɲin tali in na xo: «Xe do le, a xa domoliba toben, xa moxo kiika kili a ma. 17Domoli waxato sininma, a x'a la jonxe ki, xo a xa taxa a fo moxo kilininŋolu ɲen xo: “Alu na, saasa domolo mota.” 18Bari i bee kilin kilin xa yaafo ŋinin a fe. Folo xo: “Ń xa fuuto do san, ń xa xan xa taxa wo mafele; í s'í balan xa yaafa ń ma.” 19Do xote xo a ɲen xo: “Nte xa sarituura tan san, ń xa xan xa taxa wolu mafele; í s'í balan xa yaafa ń ma.” 20Do xote xo: “Ń birin muso tala. Wo le x'a tu, ń me taxa no.” 21Jonxe x'é koppa xa taxa wolu fo a marigi ɲen. Wo to, lutigo diminta. A xo a la jonxe ɲen xo: “Í tariya í xa taxa gallo beralu nin a bedolu to, í nin segebaxantunŋolu nin moxo yellatolu nin fiyontolu nin namatolu xa na.” 22Wo keninma, jonxe xo: “Ń marigi, í xa men fo, wo keta. Haalibi, kundula be je.” 23Marigo xo a la jonxe ɲen xo: “Taxa silabalu nin silandinŋolu fe, í x'a fo moxolu ɲen xo i x'e balan xa na, walasa ń na luwo xa fa. 24Ń b'a fola alu ɲen xo moxo men tunnu fololu kilita, wolu si me ń na domolo nene.” » 25Jamaba tun b'a lonin Isa nofe. Isa x'é yelema i ma, x'a fo i ɲen xo: 26«Nin moxo do x'a lo nte nofe, a xa xan xa nte xoleya a na nin a fa nin a musu nin a dinŋolu nin a badinxelu nin a badinmusolu ti, anin haali a fan niyo ti. Nin wo nte, a me ke no nte la xarandinŋo ti. 27Moxo men nte a fan gengenyiro tala, x'a lo nte nofe, wo me ke no nte la xarandinŋo ti. 28Alu to, moxo joman be je, nin a b'a fe xa sankansuwo lo, nin a me sigi xa jaate bo folo, x'a lon nin sin b'a ɲen x'a laban? 29Nin wo nte, nin a x'a damuta, a dun man na sin x'a laban, wo jebaxolu bee si jele a ma, 30x'a fo xo: “Ɲin xe in xa bunlo damuta, bari a korita a labanna.” 31Walla mansaxe joman, nin a be taxala mansaxe xote kelela, nin a me í sigi folo x'é miiri, nin a nin xe wulu tan si sin no xa mansaxe xote nin xe wulu muxan kele? 32Nin a me sin no wo la, a si kiladinŋolu bula xa taxa benŋo ŋinin mansaxe do la dulajan. 33Wo ɲa ma, alu to moxo wo moxo me ɲiɲa no a bulufenŋolu bee xo, wo me ke no nte la xarandinŋo ti.» 34«Xooxo mu fen ɲuma le ti, bari nin a diya bota a la, mun s'a ladiya tugun? 35A me fusi ɲan duguxulo ɲen. A me ke no noxo du ti fuuto to. Moxolu s'a bon banto to. Tulu be men ma xa lamelo ke, wo xa lamelo ke de!»

will be added

X\