LUKA 13

1Wo waxato, moxo dolu nata Galilengo dolu xibaro laxali Isa ɲen. Pilate tun xa moxo bula xa wolu faxa, x'e tu sadaxamarafenŋolu faxala, x'e jelo nin wo marafenŋolu jelo ɲaxami. 2Isa xo wolu ɲen xo: «Alu la miiro to xo wo Galilengolu mu junubekelalu ti xa tanbi Galilenga tolu bee xan ba? 3Ayi, ń si wo fo alu ɲen de! Bari nin alu man alu jigo yelema, alu bee si sa í xo i sata ɲa men. 4Silowe sankansuwo boyita moxo tan nin sago men xan x'e faxa, alu la miiro to xo wolu mu junubekelalu ti xa tanbi Yerusaleme moxo tolu xan ba? 5Ayi, ń si wo fo alu ɲen de! Bari nin alu man alu jigo yelema, alu bee si sa í xo i sata ɲa men.» 6Wo xo, Isa xa ɲin tali in la i ɲen, a xo: «Xe do le, turo seneta tun b'a kun a la naaxo xono. Lun do, a nata a lafele fo a si dinŋo do soto a la. Bari a man fen soto a la. 7A xo naaxo senebaxo ɲen xo: “A sanji sabo le fele, ń be nala turodinŋo ŋininna ɲin turoju in na, ń nte fen tarala a la. A sege! Mun na a be duguxulo tanin fu?” 8Bari naaxo senebaxo xo a ɲen xo: “Marigi, a tu je ŋinan tugun, ń si dinxo jaga x'a laminin, xa noxo ke a la. 9Wo to, a do to a si dinŋo ke jaari. Nin a dun man í din, í s'a sege.” » 10Tofoɲolunŋo do, Isa tun be moxolu xaranna Alabatusuwo do xono. 11Muso do tun be je, jinne jangaro tun be wo la kabirin san tan nin sagi. Wo jangaro x'a xutu fo a me í latilin no muume. 12Isa xa musu in je tumo men, a x'a kili x'a fo a ɲen xo: «Muso, í x'é fan soto í la jangaro la bi.» 13A x'a bulolu la muso xan. Wo no bee to, muso x'é latilin, a keta a ma xa Ala tantu. 14Alabatusuwo kuntigo diminta, katugala Isa xa wo ke tofoɲolunŋo le. A woman in xo jama ɲen xo: «Baaro xa xan xa ke tili wooro le xono. Alu na xa kendeya wo lunŋolu, alu xana na tofoɲolunŋo.» 15Marigi x'a jaabi xo: «Atelu mu fulankafo lelu ti. Alu do wo do nte alu la falo, walla alu la tuura firinna tofoɲolunŋo ba xa taxa a lamin? 16Ɲin musu in men mu Burehima bonsonŋo ti, Sentane tun x'a siti kabirin san tan nin sagi. A fo, wo tun man xan xa bo Sentane la joloxo la tofoɲolunŋo?» 17A la wo xumaxanŋolu x'a jaxolu bee maluya. Jama bee ɲaxalita a la kuba keninŋolu la. 18Isa xo: «Ala la Mansaya nin mun xa don? Ń s'a la mun ma? 19A be le í xo mutaradekeso. Moxo do x'a ta x'a sari a la naaxo xono. A bunɲata xa ke yirijuwo ti. Xonolu nata i ɲaxanŋolu la a bulolu la.» 20Isa xo tugun xo: «Ń si Ala la Mansaya la mun ma? 21A be le í xo farinfuunulanŋo. Muso do x'a ta, x'a nin farinŋo kilo muxan nin luulu ɲaxami, fo farinŋo bee xa fuunu.» 22Isa tun be gallubalu nin gallundinŋolu yaalala. A tun kun be Yerusaleme xan. A taxato tun b'a ma xa moxolu laxaran. 23Moxo do xa Isa ŋininxa xo: «Marigi, moxo danta lelu be kisila ba?» Wo to, Isa x'e jaabi xo: 24«Alu i balan xa dun da doxomandinŋo fe. Ń s'a fo alu ɲen xo moxo kiika s'a mafele x'e be dunna, bari i si dasa. 25Nin lutigo wulita tumo men xa da soxo, x'a tara atelu be banto to, wo tumo alu si wuli dakonkonŋo la x'a fo xo: “Marigi, da yele n ɲa.” A woman in si alu jaabi xo: “Ń man alu bodula lon.” 26Wo to, alu s'a fo xo: “Ntelu xa domolo ke í ɲala, x'e min í ɲala. Í xa xaranŋo ke n na beralu to.” 27A woman in si alu jaabi xo: “Ń man alu bodula lon. Alu i soobo ń na, atelu mennu bee be jaxumanŋo kela!” 28Alu si xasi x'alu dafato kin, nin alu xa Burehima, nin Nsiyaxa, nin Yaxuba, nin kilalu bee je Ala la Mansaya xono tumo men, x'alu fannu je filinin banto to. 29Moxolu si na xa bo koton nin tiliboyi nin saheli nin banbugu, x'e sigi xa domolo ke Ala la Mansaya xono. 30Xomoxo dolu si ke ɲamoxolu ti; ɲamoxo dolu si ke xomoxolu ti.» 31Wo tumo la, Farisiya dolu x'e sodun Isa la, x'a fo a ɲen xo: «Taxa í xa bo jan, katugala Herode b'a fe x'é faxa.» 32Isa x'e jaabi xo: «Alu taxa a fo Herode korojuga in ɲen í xo sandin xo: “Bi nin sinin, nte si jinnolu xoyi x'e labo moxolu to, xa jangarutolu kendeya. A tili sabananŋo, ń si ń soto ń na baaro la.” 33Wo bee nin a ta, waajibo le mu, nte xa tu silo xan taxanin, bi nin sinin nin sinikindin. Bawo a nte bennin kila do xa faxa dula xote, men nte Yerusaleme ti. 34«Yerusaleme, Yerusaleme, ite men be kilalu faxala, xa Ala la kiladinŋolu bun kuro la, x'e faxa, sinɲa kiika ti nte keta a fe xa í la moxolu kamari, í xo sisejibo b'a dinŋolu kamarila a danfatanŋolu xoto ɲa men. Bari alu man son. 35A fele, alu la luwo toxulunŋo si tu alu bulu. Nte b'a fola alu ɲen xo, alu me nte je bitugun, fo lunŋo men alu s'a fo xo: “Men nato fele Marigi toxo la, duwawo be wo fe!” »

will be added

X\