LUKA 12

1Wo waxato, moxo kiika kamarita, i tunnu si moxo wulu kiika bo. I xa sa ɲa men, fo i tunnu si yele i ɲoxo sinŋo xan. Isa xa xumo damuta a la xarandinŋolu ɲen folo, a xo: «Alu i fannu korosi Farisiyalu la farinfuunulanŋo ma, nin wo mu fulankafuya ti. 2Fusi nte dugunin nin a me bo keno la. Fusi nte gullo to nin a me lon. 3Wo le x'a tu, alu je fen wo fen fo dibo to, wo si me keneya la. Alu je men kondikondi moxo tulo to bun dataxunninŋo xono, wo si gangu bunŋolu sanŋo to.» 4Wo xo, Isa xo tugun xo: «Ate mennu mu ń xanuntelu ti, ń b'a fola alu ɲen xo: Mennu si moxo faxa no, x'a tara i me fen xote ke no wo xo, alu xana sila wolu ɲa. 5Alu xa xan xa sila men ɲa, ń si wo yita alu la: A sinŋo be Ala men ɲen xa moxo faxa, x'a niyo bula jahanaba xono, alu sila wo le ɲa. Ń b'a fola alu ɲen de, alu xa xan xa sila wo le ɲa! 6«Titine luulu nte fiirila kuseeti fula la ba? Bari haali wo, Ala me ŋina i si kilin kun. 7Haali alu kunsinolu, i bee jaateninŋo le mu. Wo to, alu xana sila. Alu xa fisa titinolu bee ti.» 8«Ń b'a fola alu ɲen xo: Moxo wo moxo je a yita xo a mu nte ta ti moxolu ɲala, Moxo Dinxe du s'a yita Ala la melekiyolu ɲala, xo wo tigo mu a ta le ti. 9Bari moxo wo moxo je bo nte la, moxolu ɲala, Moxo Dinxe du si bo wo tigo la, Ala la melekiyolu ɲala. 10Moxo wo moxo je xuma jaxo fo Moxo Dinxe ma, wo si yaafa a ma; bari nin men xa Ni Senunŋo toxo tiɲa, yaafa me ke wo ma. 11«Nin moxolu taxata alu ti Alabatusuwolu xono, anin kiititegelalu nin fankamalu bata, alu xana hanme alu la jaabo nin alu la fota xanma, 12bawo alu xa xan xa men fo, Ni Senunŋo si alu xaran wo la wo no fan to.» 13Moxo do x'é tu Isa ɲen jama xono xo: «Karanmoxo, a fo nte xotoxe ɲen xo a xa n na ke tala, xa ń ta di ń ma.» 14Isa xo a ɲen xo: «Xe, jon xa nte ke alu te kiititegela nin ketalalibaxo ti?» 15A xo jama ɲen xo: «Alu i korosi naafulukunteya ma. Moxo la naafulo siyata ɲa wo ɲa, a la nilamaya nte dennin wo la de.» 16A xa ɲin tali in la i ɲen xo: «Naafulubatigo do keta je, a la senefenŋolu sabatita. 17A x'a fan ŋininxa xo: “Ń si mun ke? Bawo ń na senefenŋolu kedula nte ń bulu.” 18A xo: “Ń be nala men kela wo fele: Ń si ń na kurukurolu te, xa do xotelu lo, mennu xa bun. Ń si ń na senefenŋolu nin ń kunfenŋolu bee ke wolu xono. 19Wo xo, ń s'a fo ń fan ɲen xo: Fen kiika be ń kun fo waxati jan. Ń be ń tofoɲola, xa domolo ke, xa ń min, xa ń tulun.” 20Bari Ala xo a ɲen xo: “Hakilintanŋo, bi su in to fan, í niyo si muta í la. Í xa men toben, jon ta si ke wo ti?” » 21Wo xo, Isa xo: «A fele de, moxo men be naafulo kamarila a kilin ɲen, x'a tara fen nte a bulu Ala bata, wo la kuwo be ten.» 22Wo xo, Isa xo a la xarandinŋolu ɲen xo: «Wo le x'a tu, ń b'a fola alu ɲen xo: Alu xana hanme alu baluɲa la x'a fo xo: “Ntelu si mun domo?” Alu xana hanme alu feetofato la x'a fo xo: “Ntelu si n feetofato soto ɲa di?” 23Bawo nilamaya xa xole domolo ti, balo xa xole faano ti. 24Alu xonoxaaxelu mafele, i nte fen lanna, i nte fen tegela. Buntun nt'e kun, kurukuru nt'e kun, bari, Ala be i labalula. Atelu man fisa bete xonolu ti ba? 25Jon be alu to, nin wo la hanmo si haali dondin kafu no a siyo ma? 26Wo le xanma, nin alu me wo kundinŋo ke no, mun dun na alu be hanmela ku tolu la? 27Alu wulaxonobaxolu firo boɲa mafele. I nte baara kela, i nte wurundili kela. Wo bee nin a ta, nte b'a fola alu ɲen xo, haali mansaxe Sulemani nin a la saramaya bee, a la faanolu beteya man wolu kilin ta bo. 28Nin Ala be wulaxonobinŋo feetofatala ten, wo men be je bi, sinin a si fili ta to, a me atelu feetofata bete ba xa tanbi wolu xan? Alu la lannaya xa doxo. 29Alu xa xan xa men domo, x'a min, alu xana hanme wolu ŋininno la, alu juso xana tege i sotoɲa la. 30Ɲin duniya in Alalonbalo lelu be wo fenŋolu bee ŋininna tuma bee. Bari alu Fa x'a lon xo alu maakuwo be wo fenŋolu la. 31Atelu kennu xa Ala la Mansaya le ŋinin. Nin wo keta, wo fenŋolu bee si di alu ma x'a kafu wo ma. 32«Saaxagoorendin, alu xana sila! Bawo a diyata alu Fa ɲen xa Mansaya di alu ma. 33Alu i bulufenŋolu fiiri x'e xaaliso di segebaxantunŋolu ma. Alu xaalisibulalan xotobalolu dara alu fannu ɲen, xa naafulu banbalo lakamari sanŋo to: Sunŋo me si non, tunbo me a tiɲa non. 34Bawo alu la naafulo be jan men, alu jusukunŋo du be kela non ne. 35«Alu te sitininŋo xa tu, x'alu la lanpolu mananinŋo tu. 36Alu ke í xo moxo mennu be siginin x'e marigi laxono xa bo maaɲoya to, walasa nin a nata tumo men xa da konkon, alu xa da yele a ɲa. 37Nin wo marigo nata xa jonŋo mennu tara i ɲala, heero be wolu ɲen. Ń b'a fola alu ɲen, tonɲa la, xo wo marigo si a te tositi, xa wolu lasigi domolo kunna, x'a tala tala i te. 38A nata dugutala ma wo, a nata saxuyelenda la wo, nin a x'e tara i ɲala, heero be i ɲen. 39Alu x'a lon xo nin lutigo tun xa sunŋo nawaxato lon, a tun si tu a ɲala, walasa a xana dun a la luwo xono. 40Alu dulu tobenninŋo xa tu, bawo alu hakili nte waxato men ma, Moxo Dinxe be nala wo waxato fan ne.» 41Piyere x'a fo a ɲen xo: «Marigi, í be ɲin tali in lala ntelu doronnu ɲen ba, fo bee le ɲen mu?» 42Marigi xo: «Jon mu xotosigibaxa xantigo nin hakilima ti, men marigi s'a lasigi a la luwo kunna, xo a x'a jon toɲoxolu la domolo di i ma a tumo to? 43Nin a marigi nata wo jonŋo tara wo baaro la, heero b'a ɲen. 44Tonɲa, ń b'a fola alu ɲen xo a marigi s'a lasigi a bulufenŋo bee kunna. 45Bari nin wo jonŋo xo: “Ń marigi meta a man na;” nin a bulata jon ɲoxolu la, xemalu nin musumalu, x'e buwo, x'a ta ke domolo nin minno ti, x'é fa dolo la, 46wo jonŋo marigi si na lunŋo do, a hakili nte lunŋo men ma, anin waxato do, a man men lon. A si wo jonŋo xoyi, x'a nin lannayabalolu sara ke kilin ti. 47Jonŋo men x'a Marigi sago lon, bari a man tobenni ke, a man a sago du ke, buwoliba si la wo xan. 48Bari jonŋo men man a Marigi sago lon, nin a xa kuwolu ke, a xa xan xa buwo mennu to, buwoliba me la wo xan. Fen kiika dita men ma, kiika si maŋininxa wo la; fen kiika xarifata men ma, kiikaba si ŋinin wo la. 49«Ń nata ta le bula duguxulo xan. Nte tun b'a fe saasa x'a tara mananin. 50Batiseli tooroma do be je; waajibo le mu, wo xa ke ń na folo. Wo kuwo be nte niyo tooronin jannin a xa ke! 51Atelu la miiro to xo nte nata benŋo le ke duguxulo xan ba? Ayi de, ń nata talalo le ti. 52Kabirin saasa, moxo luulu si tara lu kilin xono, i si tala xan ma. Moxo sabo s'i xodi moxo fulo la, moxo fulo s'i xodi moxo sabo la. 53Fa s'í xodi dinxe la, dinxe s'í xodi fa la. Na s'í xodi dinmuso la, dinmuso s'í xodi na la. Bitanmusuba s'í xodi bitanmusundinŋo la, bitanmusundinŋo s'í xodi bitanmusuba la.» 54Isa xo jama ɲen du xo: «Nin alu xa xabo je bola tiliboyi tumo men, alu s'a fo wo no bee to xo: “Sanjiyo be nala,” a dun si na. 55Nin alu xa foɲo je bola banbugu, alu s'a fo xo: “Funtano si ke bi,” a si ke ten. 56Fulankafu innu! Alu si sin no xa duguxulo nin sanxulo keɲalu lon; mun dunna alu me bi waxati in keɲa faamu? 57«Mun na alu fannu me sila tilinninŋo faranfansi? 58X'é nin í keleɲoxo tu taxanin kiitidula, í jija í nin a xa ben, walasa a xana í dun kiititegela bulu, wo x'é di garado ma x'é bula kaso la. 59Ń s'a fo í ɲen xo í me bo non abada nin í man wo julo bee sara. Haali tanga, a me tu í la.»

will be added

X\