LUKA 11

1Lun do, Isa tun be Alamatara la dula do. A sotoninma, a la xarandinŋo do xo a ɲen xo: «Marigi, n xaran Alamataraɲa la, í xo Yaya x'a la xarandinŋolu digi a la ɲa men.» 2Isa xo i ɲen xo: «Nin alu be Ala matarala tumo men, alu s'a fo xo: “N Fa, í toxo la senuya xa lon, na í la Mansaya ti. 3N na lun wo lunŋo baluwo di n ma. 4N na haxxolu yaafa, katugala n dulu be yaafala n haxxetabaxolu ma. Í xana a tu n xa dun xotoboliku xono”.» 5Isa x'a fo i ɲen du xo: «Alu to moxo joman be je, nin xanunte b'a kun, a dun xa taxa wo bata dugutala ma, x'a fo a ɲen xo: “Ń xanunte, buurukun saba juludun ń na, 6bawo ń xanunte do nata saasa xa bo taxamo to. Fusi dun nte ń bulu x'a di a ma.” 7Nin wo x'é tu bunŋo xono x'a fo xo: “Í xana ń sege. Da soxota; nte nin ń dinŋolu x'e la xa ban. Ń me wuli no xa buuru di í ma.” 8Ń b'a fola alu ɲen xo nin a man wuli xa wolu di a ma xanunteya xanma, a si wuli x'a maakuɲanfenŋo bee di a ma, a la mameseyalo xanma. 9«Nte ken b'a fola alu ɲen xo, alu Ala matara, a si di alu ma; alu ŋininno ke, alu si soto ke; alu da konkon, da si yele alu ɲa. 10Moxo wo moxo je Ala matara, wo si soto ke; men je ŋininno ke, wo si fen je; men je da konkon, da si yele wo ɲa. 11Jon be alu to nin a dinŋo xa ɲego ŋinin a la, nin a si sa di a dinŋo ma ɲego no to? 12Walla nin a dinŋo xa sisekilo tara a la, a si dondonkoɲe di a dinŋo ma ba sisekilo no to? 13Atelu mennu xa jaxu, nin atelu xa fen ɲuma diɲa lon alu dinŋolu ma, alu Fa men be sanŋo to me Ni Senunŋo di a tarabaxolu ma bete bete ba xa tanbi atelu xan?» 14Isa tun b'a ma xa jinno xoyi x'a bo xe do to. Wo jinno tun xa wo xe ke muumuwo ti. Jinno xoyininma, muumuwo x'a damuta xa xuma. Jama dabaro banta. 15Bari moxo dolu xo: «A be jinnolu xoyila xa bo moxolu to, jinnolu la kuntigo Bilisa le barako la.» 16Dolu tunnu b'a fe x'a xotobo: I xo a ɲen xo a xa taagumanseedo do ke, men s'a yita xo a be bola Ala bata. 17Isa tun x'e xonokuwo lon. Wo to, a xo i ɲen xo: «Mansaya wo mansaya, nin a boxo kilinŋo wulita a boxo do xanma, wo mansaya si te, a bunŋolu si boyi i ɲoxo xan. 18Awa, nin Sentane du wulita a fan xanma, a la mansaya si tu siginin ɲa di? Atelu dunnu xo, xo ń be jinnolu xoyila Bilisa le barako la? 19Nin alu xo, xo nte be jinnolu xoyila Bilisa le barako la, alu la moxo dunnu b'e xoyila jon barako la? Alu fannu la moxolu s'a yita xo alu nte tonɲatigi ti. 20Bari nin nte be jinnolu xoyila Ala bulo le la, wo b'a yitala xo Ala la Mansaya sita alu ma. 21«Nin xe barakema kelekemirantigo b'a la luwo korosila, fusi me si a bulufenŋolu ma. 22Bari nin xe do nata, men barako xa bun a ta ti, nin wo x'a mano, a si na a la kelekemiranŋolu muta a la, a gigo tun be mennu xan, x'a bulufenŋolu bee ko, x'e tala tala. 23«Men nte ń ɲin ti, wo mu ń jaxo le ti. Men nte ń deemala xa kamarilo ke, wo be jenjenno le kela.» 24«Nin jinno bota moxo do to, a si wula jarolu tobori, tofoɲodula ŋininŋo la. A me dula je, wo to, a s'a fo a fan ɲen xo: “Ń be ń koppala ń na bunŋo ma, ń bota jan men.” 25A koppaninŋo si a tara xo wo bunŋo be fitanin xa toben. 26Wo to, a si taxa, xa na jinne woorowula xotelu ti, mennu xa jaxu xa tanbi ate xan. A nin wolu si dun, x'e sigi je. Wo moxo labanɲa si jaxuya xa tanbi folo xan.» 27Xa Isa tu wo xumo la, muso do x'é tu jama to xa feten xo: «Muso men x'é wulu, x'é lasuusu, heero be wo ɲen!» 28Isa x'a jaabi xo: «Moxo mennu be Ala la xumo lamela x'a latimme, heero be wo lelu ɲen.» 29Xa jama tu bunɲala Isa bata, a xa xumo ta. A xo: «Bi moxolu xa jaxu. I be taagumanseedo do ŋininna, bari taagumanseede si me yita i la nin kila Yunusi ta nte. 30Bawo Yunusi keta taagumanseedo ti Niniwe moxolu ɲen ɲa men de, wo ɲa ma Moxo Dinxe du be kela taagumanseedo ti bi moxolu ɲen. 31Kiito lunŋo, Worodugu mansamuso si wuli xa bi moxolu jalagi, bawo ate nata xa bo duguxulo danŋo ma, walasa xa mansaxe Sulemani la hakilitigiya xumolu lame. Men dun fele, wo xa bun Sulemani ti. 32Kiito lunŋo, Niniwengolu si wuli xa bi moxolu jalagi, bawo Niniwengolu tuubita Yunusi la waajulo koso. Men dun felenti, wo xa bun Yunusi ti.» 33Isa xo du xo: «Moxo si me lanpo lamana x'a dugu walla xa miranŋo do labuti a kunna, bari nin í x'a lamana, í s'a sigi a sigilanŋo le xan, walasa bugo xono dunbaxolu x'a keneya je. 34Moxo ɲa le mu a balo lanpo ti. Nin í ɲa xa ɲin, í balo bee be keneya la, bari nin í ɲa man ɲin, í balo bee be dibo le to. 35Í hakilo tu í fan na, walasa keneya men be í to, wo xana ke dibo ti. 36Nin í balo bee be keneya la, dula si nte dibo to, a dulalu bee si keneya bo, í xo lanpamano be keneya bola í ɲen ɲa men.» 37Isa x'é soto xumo la tumo men, Farisiya do x'a kili domolo ma a bata. Isa dunta a la luwo ma, x'é sigi domolo kunna. 38Bari Isa man a bulolu ku Farisiyalu la laado ɲa ma, jannin a xa domolo damuta. Wo Farisiya x'a je tumo men, a dabaro banta. 39Marigi x'a fo a ɲen xo: «Atelu Farisiyalu kennu be jitafelu nin tasolu xomala lelu kula x'e senuya, x'a tara alu xono be fanin suuɲalikuwolu nin jaxuya la. 40Hakilintan innu! Ala men xa fenŋolu xoxanna dara, ate le man i xono du dara ba? 41Alu miranŋolu xonofenŋolu di fangantanŋolu ma. Nin wo keta, fenŋolu bee si senuya alu ɲen. 42«Bone be alu Farisiyalu ɲen, bawo alu be nanaye nin natokefenŋolu anin naaxoxono fen mesenŋolu bee jakko bola, bari alu be tilinninɲa nin Ala xano tula je. Alu tunnu xa xan xa wo bunbumaba lelu ke, xa wo fen mesenŋo dulu kafu a ma. 43«Bone be alu Farisiyalu ɲen, bawo Alabatusuwo xono ɲafesigilanŋolu nin moxolu la beratoxontonnolu xa di alu ɲen. 44Bone be alu ɲen, bawo alu be le í xo xaburu duguninŋolu, moxolu be i taxamala i xan, x'a tara i man a lon xo wo s'i noxo Ala ɲa xoto.» 45Sariya karanmoxo do xo a ɲen xo: «Í la ɲin xumaɲa in fe, í be ntelu dulu nanila!» 46Isa x'a jaabi xo: «Bone be alu sariya karanmoxolu dulu ɲen, bawo dono mennu ta xa xole, alu be wolu lala moxolu kun. Haali alu dunnu me son x'alu buluxonondin kilin ke x'e deema xa wo donolu ta. 47Bone be alu ɲen, atelu mennu be xaburu betolu darala kilalu ɲen, x'a tara alu mamaxe le dunnu x'e faxa. 48Wo ɲa ma, alu b'a yitala xo alu sonta alu mamaxelu la kebaarolu ma, bawo wo lelu xa kilalu faxa. Atelu kennu x'e xaburolu dara. 49Wo le x'a tu, Ala x'a fo a la hakilitigiya xono xo: “Ń si kilalu nin kiladinŋolu ki i ma. I si dolu faxa, x'a lo dolu nofe, x'e tooro.” 50Wo bee si ke walasa kilalu mennu sata kabirin duniya da tumo, wolu jelo xa maŋininxa bi moxolu la. 51X'é ta Abila jelo ma, fo xa taxa a bula Sakariya jelo la, wo men faxata sadaxajanidula nin Alabatusuba te. Ń b'a fola alu ɲen, xo wolu bee jelo si maŋininxa bi moxolu la. 52«Bone be alu sariya karanmoxolu ɲen, bawo alu xa lonŋo xundinŋo ta. Alu fannu man dun. Mennu b'a fe xa dun, alu be wolu balila.» 53Isa boninma wo dula, sariya karanmoxolu nin Farisiyalu x'a damuta x'e la diminba yita a la, x'a ŋininxa kuwo bee do la. 54I xa korojugaya bee do yita a la, walasa x'a muta a fan dalaxumolu ma.

will be added

X\