LUKA 10

1Wo kuwolu tanbininŋo, Marigi xa xarandin tan woorowula nin fula xotelu sugandi, x'e fula fula bula i xa taxa a ɲa gallolu nin dulalu bee to, a fan xa xan xa si dula mennu. 2A xo i ɲen xo: «Senefen nadarata xa sa, bari baarala xa doxo. Wo to, alu fuututigo matara, walasa a xa baarala kiika bula i xa taxa a la senefenŋolu ladara. 3Alu taxa! A fele, ń be alu kila í xo saaxandinŋolu, warolu temo to. 4Alu xana silafanda ta, alu xana fudi ta, alu xana samata ta. Alu xana i lo silo to x'alu be moxo xontonna. 5Nin alu dunta luwo do ma, alu a fo xo: “Heero xa ke ɲin lu in xono.” 6Nin heeramoxo do be non, wo tigo si alu la xontonno heero soto; nin wo fen nte je, alu la heero si saagi alu ma. 7Alu xa tu wo luwo ma. Nin i xa men di alu ma, alu wo domo, xa wo min; bawo baarakela nin a sara xa xan. Alu xana bo luwo do xono xa yelema do xono. 8Nin alu dunta gallo do to, i dunnu x'alu muta, i je men di alu ma, alu wo domo, 9alu xa wo gallo jangarutolu kendeya, x'a fo a moxolu ɲen xo: “Ala la Mansaya x'é sutiya alu la.” 10Bari nin alu dunta gallo do xono, je moxolu dunnu man alu lamuta, alu bo silolu fe x'a fo xo: 11“Haali alu la gallo banxo, n b'a konkonna x'a bon n sinŋolu la alu xanma. Bari alu a lon xo Ala la Mansaya x'é sutiya.” 12Ń b'a fola alu ɲen xo kiito lunŋo, Sodome gallo la ɲangilo si feya xa tanbi wo gallo ta xan.» 13«Korasin gallo moxolu, bone be alu ɲen. Betesayida gallo moxolu, bone be alu ɲen. Bawo kawakuwo mennu keta alu bata, nin wo tunnu keta Tire nin Sidon, biyan x'a tara non moxolu sigita xa faanu kurunŋolu dun, xa bugutixoyo ke i kunŋo la, walasa x'a yita xo i tuubita. 14Wo le x'a tu, kiito lunŋo, alu la tooro si bunɲa xa tanbi Tire nin Sidon ta xan. 15Ite dun Kaperenahun, í la miiro la xo í si xotota ba fo sanxulo ma? Ayi de! Í be majigila le fo lahara.» 16A x'a fo a la xarandinŋolu ɲen du xo: «Moxo wo moxo je alu lame, wo xa nte le lame; men man alu lamuta, a man nte lamuta. Men man nte lamuta, a man ń kibaxo du lamuta.» 17Kiladin tan woorowula nin fulo ɲaɲaninŋo x'e koppa, i xo: «Marigi, haali jinnolu xuluta n ɲen í toxo la.» 18Isa xo i ɲen xo: «Ń xa Sentane je boyila xa bo sanŋo to a be í xo sanjimeɲenxo. 19Alu ń name! Ń xa sinŋo di alu ma alu x'e taxama salu nin dondonkoɲelu xan, xa Jaxu Sentane la sintigiya bee tiɲa, fusi me jaxumanŋo ke no alu la. 20Bari alu xana ɲaɲa xo jinnolu xuluta alu ɲen; alu ɲaɲa don ne la xo alu toxolu be safenin sanŋo to.» 21Wo tumo fan, Ni Senunŋo xa Isa laɲaxali haali, a xo: «Ń Fa, sanxulo nin duguxulo Marigi, ń be barako bulala í ɲen bawo í xa ɲin ku innu dugu hakilitigolu nin moxo xaranninŋolu ma, x'e yita dindinŋolu la. Ń Fa, a keta ten, bawo wo le diyata í ɲen. 22«Ń Fa xa kuwo bee dun ń bulu. Moxo si man a lon Dinxe mu men ti, nin Fa kilinpe nte. Moxo si du man a lon Fa mu men ti, nin Dinxe kilinpe nte, anin a xa di Dinxe ɲen x'a yita mennu la.» 23Wo xo, Isa x'é yelema a la xarandinŋolu mafan, x'a fo wolu doronnu ɲen xo: «Heero be alu ɲen alu la fen jetalu xanma. 24Bawo nte b'a fola alu ɲen xo,kila kiika, anin mansaxe kiika tunnu b'a fe x'alu la ku jetalu je, bari i man i je, anin x'alu la xuma metalu me, bari i man i me.» 25Sariya karanmoxo do wulita x'a be Isa xotobola. A xo: «Karanmoxo, nte xa xan xa mun ke nin ń si nilamaya banbalo soto?» 26Isa x'a jaabi xo: «Mun be safenin sariya xono? Í be mun xaranna wo la?» 27Wo xe x'a jaabi xo: «Í si Marigi í la Ala xanu í jusukunŋo bee la, í niyo bee la, í barako bee la, í miiro bee la; anin í xa í moxoɲoxo xanu í xo í fan.» 28Isa xo a ɲen xo: «Í la jaabo benta. Wo ke, í si nilamaya.» 29Wo sariya karanmoxo tun b'a fe x'a fan jaate moxo tilinninŋo ti, a woman in xo Isa ɲen xo: «Jon mu ń moxoɲoxo ti?» 30Isa xa xumo ta tugun, a xo: «Xe do le, a tun be bola Yerusaleme xa taxa Yeriko, a nata í bula boyinxannilalu da. I x'a la faanolu bo a ma, x'a lippa, x'a xitininŋo tu je xa taxa. 31A nata ke xo sadaxalasibaxo do la taxamo bota wo silo fe. Wo x'a je tumo men, a x'a goori. 32Lewikundango do du nata wo dula, wo du x'a je tumo men, a x'a goori. 33Bari Samaringo do dugutotaxato nata si a ma x'a je; a hinno x'a muta. 34Wo x'é sodun a la, xa tulo nin dolo ke a la joogilidalu la, x'e siti. Wo xo, a fan be marafenŋo men xan, a x'a layele wo xan, xa taxa a ti luntanjigidula do, x'a maakuwo ɲiɲa. 35Wo lun do, Samaringa in xa deɲe xaalisi ganan fula bo í kun, x'a di a jatigi ma x'a fo a ɲen xo: “Í hakilo tu ɲin xe in na. Nin í xa men ke a ɲen xa tanbi wo xan, ń koppato si wo lasaagi í ma”.» 36Isa xo xe in ɲen xo: «Ite hakilo la, boyinxannikelalu boyita xe men xan, jon keta a moxoɲoxo ti wo xe sabo to?» 37Sariya karanmoxo x'a jaabi xo: «Men hinnata a la, wo le keta a moxoɲoxo ti.» Wo xan, Isa xo a ɲen xo: «Taxa, í du xa wo ɲoxon ke.» 38Xa Isa nin a la xarandinŋolu tu silo xan, a nata dun gallo do xono. Muso do x'a lajigi a bata. Wo muso toxo xo Marate. 39Marate badinmuso do be je, a toxo xo Mariyama, wo x'é sigi Marigi senbo to, x'a la xumolu lame. 40Marate tun be ɲawulenin luxonobaaro kiika la. A nata Isa ma, a xo: «Marigi, ń badinmuso fele baaro bee tunin ń kilin ne bulu. Í nte wo jaatela ba? A fo a ɲen xo a xa ń deema.» 41Marigi x'a jaabi, a xo: «Marate, Marate, í be hanmela x'é fan sege ku kiika la. 42Ku kilinpe le be je, men xa xole. Mariyama xa men sugandi, wo le xa ɲin; wo me muta a la.»

will be added

X\