LUKA 1

1Ɲamoxoba Tewofili, kuwo mennu keta n bata, moxo kiika x'a mafele xa wolu safe. 2Moxo dolu xa Isa la kuwolu je i ɲa la kabirin a damuto. Ala la xumo waajulo xarifata i ma. Wolu xa kuwolu laxali n ɲen ɲa men, wo safelilalu x'e safe wo ɲa in ne. 3Tewofili, wo le x'a tu, kuwo mennu bee keta kabirin a damuto, ń du xa wolu segesege. Nte x'a je xo a xa ɲin nte du x'e safe í ɲen, x'e la i ɲoxo da la. 4Ń x'a ke le walasa í xa xaranŋo mennu soto, í x'a lon xo wolu mu keso le ti. 5Yude mansaxe Herode la waxato, sadaxalasibaxo do tun be je, a toxo xo Sakariya. Abiya sadaxalasibaxolu jama moxo do le mu. A musu toxo xo Elisabeti. Wo tun mu sadaxalasibaxa kuntigiba Haruna bonsonŋo do le ti. 6I fulo tun bee be tilinnin Ala ɲa xoto. I tunnu be Marigi la sariyalu nin a la ku lategeninŋolu bee dafala. 7Bari din tun nte i bulu, bawo Elisabeti tun mu wulubalo le ti, anin du i fulo bee tun xotota xa ban. 8Lun do, Sakariya tun be a la sadaxalasibaxaya baaro la Ala ɲa xoto, bawo itelu la jama le tun na baaraloxo mu. 9X'a la sadaxalasibaxolu la laado xan, dokkolo xa ate yita xo a xa dun Marigi la dula Senumanba xono, xa je siisi digico la. 10Xa Sakariya tu digico janila, jama bee tun be keno ma xa Ala matara. 11Marigi la melekiyo do woman in x'é yita a la lonin sadaxajanilanŋo kininŋo mafan, digico be janila men xan. 12Sakariya xa melekiyo je tumo men, a ja wulita, a silata. 13Melekiyo xo a ɲen xo: «Sakariya, í xana sila; katugala Ala x'é la taralo muta. Í musu Elisabeti si wulu dinxe la í ɲen, í s'a toxola xo Yaya. 14Í niyo si sewo bete a la kuwo to, moxo kiika si ɲaxali a wuluwo la, 15bawo a si ke moxoba ti Marigi bulu. A me dolo min, a me minfen fatiman xote min. A si fa Ni Senunŋo la kabirin a man wulu. 16A si Banisirayila moxolu kiika lakoppa Marigi i la Ala ma. 17A s'í taxama Ala ɲa xoto Ni Senunŋo barako to anin sintigiya la, í xo kila Eli, walasa xa falu nin dinŋolu laben, xa moxo murutininŋolu hakilo yelema x'e bula moxo tilinninŋolu la silo xan. A si siya do toben Marigi ɲen.» 18Sakariya xo melekiyo ɲen xo: «Ń si wo lon ɲa di? Nte xotota xa ban, ń musu du xotota?» 19Melekiyo x'a jaabi xo: «Nte mu Jibirilu le ti, ń be Ala senbo to x'a la baaro ke. A xa ń ki xo ń xa na ɲin xibaru diman in fo í ɲen. 20Awa, í si ke muumuwo ti fo xa taxa si ɲin ku innu bee dafawaxato ma, katugala í man la ń na xuma foninŋolu la, wo mennu xa xan xa ke i waxato.» 21Jama ken tun be Sakariya laxononin. I dabaro banta, bawo a meta Alabatusuba xono. 22A boninma, a korita xumala i ɲen; moxolu x'a faamu xo Ala xa fen ne yita a la Alabatusuba xono. A xa taagumanseedolu ke i ɲen, bari a muumuyaninŋo tuta. 23Sakariya la baaro banta Alabatusuba xono tumo men, a taxata a bata. 24Wo xo, Sakariya musu Elisabeti xa xono ta, a x'é ɲamadugu xaru luulu xono. A tun b'a fola xo: 25«Marigi xa men ke nte ɲen, wo fele: Din wulubaliya men tun malo be ń na, moxolu ɲala, a xa wo bo ń na.» 26Xaru wooronanŋo la, Ala x'a la meleke Jibirilu ki Galile gallo do to, xo Nasareti. 27A x'a ki xarafandin xelonbalo do ma, wo toxo xo Mariyama. Wo x'a tara futuwo lategeta Mariyama nin Dawuda bonsonŋo do te, nin wo mu Yusufu ti. 28Melekiyo dunta a bata, a xo: «Mariyama, ń b'é xontonna, ite men xa Ala la neemo soto. Marigi be í bata.» 29Wo xumolu xa Mariyama xonotolafili. A x'é miiri ɲin xontonniɲa in xoto si ke men ti. 30Melekiyo xo a ɲen xo: «Mariyama, í xana sila, katugala í xa Ala la neemo soto. 31A fele, í si xono ta, xa wulu dinxe la. Í si a toxola xo Isa. 32A si ke moxoba ti. A si kili xo Ala Xototaninba Dinxe. Marigi Ala si a mamaxe Dawuda la mansasigilanŋo di a ma. 33A si ke mansaxe ti Yaxuba xabiilo kunna fo abada. A la mansaya me ban muume.» 34Mariyama xo melekiyo ɲen xo: «Wo si ke ɲa di, nte dun man xe lon abada?» 35Melekiyo x'a jaabi xo: «Ni Senunŋo si jigi í xan, Ala Xototaninba si a la sintigiya buuri í kunna. Wo le x'a tu, í be nala din senumanŋo men bangela, wo si kili xo Ala Dinxe. 36Í badinmusu Elisabeti du xonoma fele dinxe la, x'a tu a xotota. A fota xo wo men mu wulubalo ti, a xono be xaru wooro la saasa. 37Ala me kori ku ma.» 38Mariyama xo: «Ń mu Marigi la jonmuso le ti. A xa ke ń ɲen í xo í x'a fo ɲa men.» Wo xo, melekiyo bota a bata. 39Wo waxato, Mariyama wulita x'é tariya xa taxa Yude maro kuro xan, xa taxa gallo do to non. 40A dunta Sakariya la luwo ma xa Elisabeti xonton. 41Elisabeti xa Mariyama la xontonnixanŋo me tumo men, a dinŋo x'é lamaxa a xono. Elisabeti fata Ni Senunŋo la. 42A fetenbeteta x'a fo xo: «Duwa be í fe xa tanbi muso bee xan; í be nala dinŋo men du bangela, duwawo be wo fe. 43Nte mu jon ti nin ń Marigi na be nala nte bata? 44Awa, kabirin ń x'é xontonnixanŋo me, nin ń dinŋo ɲaɲaninŋo x'é lamaxa ń xono. 45Heero b'é fe, bawo Marigi xa men fo í ɲen, xo a s'a ke, í lata wo la.» 46Mariyama xo: «Ń be Marigi tantula ń jusukunŋo la. 47Nte ɲaxalininŋo be ń Kisibaxa Ala barako to, 48bawo a x'a la jonmuso majigininŋo mafele. Tili natalu, moxolu bee s'a fo xo heero be ń fe; 49bawo Sinŋobeetigo xa kubalu ke nte ɲen. A toxo xa senu. 50Mennu be silala a ɲa, a la hinno be wolu bonsonŋolu nin i bonsonŋolu ɲen, fo abada. 51A x'a barako yita xa kubalu ke, xa fankekutolu jenjen. 52A xa faamalu lajigi xa bo i la mansasigilanŋolu xan, xa moxo majigininŋolu xotota. 53A xa xonxotolu lafa domoli beto la; a xa fentigolu bulutoxulunŋo bula xa taxa. 54A x'a la baaradin Banisirayila deema: A hakilo tuta a la hinno la 55Burehima nin a bonsonŋo ɲen, fo abada, í xo a tun xa wo lahido ta n mamaxelu ɲen ɲa men.» 56Mariyama xa xaru saba ɲoxon ke Elisabeti bata. Wo xo, a x'é koppa a la luwo ma. 57Elisabeti wulutumo sininma, a wuluta dinxe la. 58Elisabeti sigiɲoxolu nin a badinŋolu x'a me xo Marigi x'a la hinnayeba yita a la, wolu nin a ɲaxalita. 59Dinŋo wuluwo tili sago, i nata a ɲaxo to. I tunnu b'a fe x'a toxola a fa Sakariya la, 60bari dinŋo na xo: «Ayi, a si toxola xo Yaya.» 61Bari i xo a ɲen xo: «Í la moxo si toxo nte Yaya ti.» 62I xa dinŋo fa komosi xo a b'a fe a dinŋo xa toxola jon na. 63Sakariya xo x'e xa walaho di a ma. A x'a safe walaho xan xo: «Yaya le mu a toxo ti.» I bee dabaro banta wo la. 64Wo no bee to, Sakariya x'a da nin a nenŋo soto tugun. A woman in keta a ma xa Ala tantu. 65Wo keninma, i sigiɲoxolu bee silata. Moxolu tunnu be wo kuwolu xiidefatala Yude maro kuro xan, dula bee. 66Moxo fen wo fen xa wo kuwolu me, wolu keta a ma x'e miiri xo: «Ɲin dindin in si na ke mun ti?» I xa wo fo, bawo Marigi la sintigiya tun b'a fe. 67Dindinŋo fa Sakariya fata Ni Senunŋo la. A keta a ma xa ɲin kilaya xuma innu fo xo: 68«Tanto be Marigi ɲen, Banisirayila la Ala, bawo a x'a hakilo tu a la moxolu la, x'e bo bulo to. 69A xa kisibaxa barakema di n ma, xa bo a la baaradin Dawuda bonsonŋo to. 70A tun xa wo fo kabirin tuma jan a la kila senumanŋolu da la, 71x'a si n bo n jaxolu bulu, xa n bo n xonneyabaxolu bee la fango xoto; 72x'a si a la hinno yita n mamaxelu la, x'a hakilo tu a la Kafuxan senumanŋo la. 73A tun x'é xali n mamaxe Burehima ɲen, 74x'a si n bo n jaxolu la fango bulu, walasa n hakilo lasigininŋo xa baaro ke a ɲen, 75xa senuya, xa tilin a ɲa xoto n na nilamaya bee xono. 76Ń din, ite du si kili xo Ala Xototaninba la kila, bawo í si bula Marigi ɲa, x'a la silo toben. 77Í s'a fo a la moxolu ɲen xo a s'i la junubolu yaafa, x'e kisi. 78Bawo dan nte n na Ala la hinno nin a la ɲumaya ma; a si saxuyelo keneya bo n xan xa bo sanŋo to, 79walasa mennu be suwo nin saya dibo to, a xa keneya bo wolu ɲen, xa n bula heero silo xan.» 80Dindinŋo ken tun be bunɲaxan, xa hakilitigiya soto. A tuta wulo xono fo a x'é yita Banisirayila dinŋolu la lunŋo men.

will be added

X\