YUDE 1

1Nte Yude, Isa Kirisita la jonŋo, Yaxuba badinxe, nte le be ɲin safe in kila alu ma, Ala xa atelu mennu kili, n Fa Ala be atelu mennu xanunin, anin a be atelu mennu maranin Isa Kirisita ɲen: 2Hinno anin heero nin xanuya xa di alu ma fo xa fuuma. 3N badin xanuninŋolu, a tun diyabeteta nte ɲen xa safe ki alu ma n na kisilo kuwo la, n xa xan men to. Nte x'a je xo a keta nte bulu waajibo ti xa ɲin safe in ki alu ma, walasa x'alu jusudun alu xa kelo ke lannaya ɲen, Ala xa men di a la senumanŋolu ma sinɲa kilin fo abada. 4Bawo moxo jaxo dolu x'e soli xa mundin dun alu to, mennu la halagilo safeta xa ban kabirin waxati jan. Wo Alaɲasilanɲabalolu be n na Ala la neemo xuno mayelemala, xa wo ke i la jadoya kekunŋo ti. Wo ɲa ma, i s'i bo Isa Kirisita la, wo men kilin mu n Kuntigo nin n Marigi ti. 5Haali nin alu xa wo kuwolu bee lon a ɲa ma, ń b'a fe x'alu hakilo lajigi a la xo Marigi xa Banisirayila dinŋolu kisi xa bo Misira jamano to tumo men, wo xo, mennu xa lannayabaliya yita, a xa wolu halagi. 6Melekiyo mennu man muta ke i la sintigiya ti, men dita i ma, fo i bota i sigidula, a be wolu tula sitinin joloxo la dibo to, kiiti lunba xanma. 7Al'alu hakilo lajigi Sodome nin Gomore la, anin i senbetogallolu, mennu x'e fannu ladi wolu la jadoya ɲoxon ma, xelu x'e ɲoxo ŋinin. I be ta sabalo la ɲangilo xono, men mu misaali ti x'a di bee ma. 8Wo ɲa kilinŋo le ma, nin wo siibolalu be i balo noxola, xa Ala la Marigiya mafeya, xa Noorotigolu nani. 9Haali meleke kuntigiba Minkayilo man wo ke. X'a nin Sentane tu kelo la, x'e ɲoxo sooso kila Musa fure la kuwo to, a man fatiya x'a nani a la jalagilo xono. A xo a ɲen ne doron xo: «Marigi x'é ɲangi!» 10Bari wo moxolu man men lon, i be wo le nanila. I xa men lon i fannu ma, í xo damuntunmafenŋolu, wo be halagilo le lasila i ma. 11Bone be i ɲen, bawo i xa Kabila la silo ta. Sara koso, i x'e fannu bula Balamu la filo ɲoxon xono, xa halagi Kore la murutilo ɲoxon xanma. 12I lelu be alu la badinɲadomololu noxola, xa tulunŋo ke malibaliya to non, x'e fannu kilinnu maakuwo ɲiɲa. I be le í xo xabolu mennu be taxala foɲo fe, anin ji nte mennu to. I be le í xo yiro mennu nte din kela haali sankunŋo to, i lillo bota, i sata muume. 13I be le í xo xooxojiyo fanfebalu, i be i la malibaliya kuwolu jenjenna í xo xooxojiyo b'a xanxo sarila xooxojiyo dagulo la ɲa men. I be le í xo loolo mennu nte tula dula kilin. Ala xa dibiba banbalo le bula i ɲa. 14Adama bonson woorowulananŋo Enoke du xa kilaya xumolu fo ite lelu la kuwo to ten xo: «Alu i lame: Marigi nin a la meleke senumanŋolu wulu tan kiika si na, 15walasa xa kiito tege hadamadinŋolu bee xan. A si Alaɲasilanɲabalolu bee lalo i la Alaɲasilanɲabaliya kewale jaxolu la. Alaɲasilanɲabali junubekela innu xa xuma jaxo mennu fo a ma, a si kiito tege i xan wolu fo koso.» 16Wo moxolu mu ŋuunuŋuunula lelu ti tuma bee, anin i b'e maxasila i fannu la kuwo la. I be i fannu diyanɲo le nofe, i be i wasula i la xumolu to, xa moxolu lajanmu nata xanma. 17Atelu kennu, ń badin xanuninŋolu, n Marigi Isa Kirisita la kiladinŋolu tunnu xa xumo mennu lasi alu ma folofolo, alu i hakilo lajigi wolu la. 18I tunnu x'a fo alu ɲen xo: «Duniya labanŋo waxato, jelenmalila dolu si wuli, mennu si i nidiyanɲekuwolu ke, x'a la i la Alaɲasilanɲabaliya xan.» 19Moxo fatala lelu mu. Hadamadinɲa miiro lelu b'e la, Ni Senunŋo nte i fe. 20Bari atelu kennu, ń badin xanuninŋolu, alu taxa ɲa x'alu la nilamaya jusigilanŋo ke alu la lannaya senumanba ti. Alu Ala matara Ni Senunŋo barako to. 21Alu tu Ala la xanuya xono; alu yilo xa sigi n Marigi Isa Kirisita la hinno ma, nilamaya banbalo xanma. 22Mennu be yilanyilanna, alu hinna wolu la. 23Alu i kisi, x'e saba xa bo ta to. Do xotelu be je, alu hinna wo dulu la, bari alu wo ke silanɲa to. Haali alu xana son xa maxa wolu la doroko la, men noxota i balo fe. 24Men si alu kisi no boyo bee ma, x'a tu fe nte alu la, anin x'alu ɲaxalininba lalo a la nooro ɲa xoto, 25Ala kilinpe, n Kisibaxo, n Marigi Isa Kirisita barako to: Nooro nin bunɲa nin sintigiya nin fango b'a ɲen kabirin abada, saasa anin fo abada! Amiini.

will be added

X\