YAY 9

1Xa Isa tanbito tu, a xa xe do je, a fiyonto le wuluta. 2Isa la xarandinŋolu x'a ŋininxa xo: «Karanmoxo, jon xa junubo ke? Ɲin xe in ba walla a wulubaxolu, fo a nin ɲa man wulu?» 3Isa x'e jaabi xo: «Ɲin xe in na junube no nte, a wulubaxolu la junube no nte, bari a keta le, walasa Ala la sintigiya xa yita a la kuwo to. 4Waajibo le mu, n xa ń kibaxo la kebaarolu ke tiliya to. Suwo si ku; nin suwo kuta, moxo si me baara ke no wo tumo. 5Xa nte tu duniya xono, nte mu duniya keneya le ti.» 6Wo xumo foninma, Isa xa dajiyo tuppu dugo ma, xa wo banxu ɲiginninŋo ta, x'a mu fiyonto ɲalu ma. 7A x'a fo a ɲen xo: «Taxa í ɲa ku Silowe dinxo jiyo la.» Silowe xoto xo «Kiladinŋo». Fiyonto taxata je, x'a ɲa ku. A ɲa yeleninŋo x'é koppa. 8A senbetomoxolu nin mennu dalita a jela sadaxatara la xo: «Xe men tun be siginin sadaxatara la, wo le nte ɲin ti ba?» 9Dolu xo: «Ate le mu.» Dolu xo: «Ayi, ate nte, bari a nin a xa don.» Xe fan xo: «Nte le mu.» 10I x'a ŋininxa xo: «Í ɲa yeleta ɲa di?» 11A x'e jaabi xo: «Xe men toxo xo Isa, wo le xa banxo mu ń ɲa la, x'a fo ń ɲen xo ń xa taxa ń ɲa ku Silowe dinxo jiyo la. Ń du taxata ń ɲa ku, ń ɲa woman in yeleta.» 12I saagita x'a ŋininxa xo: «Wo xe be min?» Fiyonto xoto x'e jaabi xo: «Nte man a lon.» 13I taxata wo fiyonto xoto ti Farisiyalu bata. 14Isa xa banxo ke, x'a ɲa yele lunŋo men, wo lun tun mu tofoɲolunŋo le ti. 15Wo sabaabo le x'a tu, Farisiyalu x'a ŋininxa, a ɲa yeleɲa la. A xo i ɲen xo: «A xa banxo le mu ń ɲa la, ń xa ń ɲa ku, wo no bee to, ń xa dula je.» 16Farisiya dolu xo: «Ɲin xe in me bo no Ala la, bawo a nte tofoɲolunŋo sariya labatula.» Do xotelu xo: «Nin ɲin xe in tun mu junubekela le ti, a si ɲin ɲoxon taagumanseede ke no ɲa di?» I man ben a la kuwo to. 17Farisiyalu saagita xa fiyonto xoto ŋininxa tugun xo: «Men xa í ɲa yele, ite be mun fola a la kuwo to?» Fiyonto xoto xo: «Kila le mu.» 18Bari Yahudiyalu la ɲamoxolu tunnu man la a la, xo ɲin xe in tun fiyonto mu, fo i taxata a wulubaxolu kili, 19x'e ŋininxa xo: «Alu dinxe le je ba, alu xo, xo men fiyonto wuluta? A be dula jela ɲa di saasa?» 20A wulubaxolu x'e jaabi xo: «Ntelu x'a lon xo n dinxe le je, a fiyonto le wuluta. 21Bari a be dula jela ɲa di saasa, ntelu man wo ɲa lon de! N man a lon du, men x'a ɲa yele. Dindin nte tugun, alu a fan ŋininxa. A si wo ɲa faranfansi alu ɲen.» 22Fiyonto xoto wulubaxolu xumata wo ɲa ma, katugala i silata Yahudiyalu la ɲamoxolu ɲa. Bawo wolu tunnu benta a to, xo nin moxo wo moxo x'a fo doron, xo Isa mu Kirisita ti, wo tigo si xoyi, xa bo Alabatusuwo kafo xono. 23Wo le x'a tu, a wulubaxolu xo: «Dindin nte tugun, alu a fan ŋininxa.» 24Farisiyalu saagita fiyonto xoto kilinin x'a fo a ɲen xo: «Í tilin Ala la xa tonɲa fo. Nte kennu x'a lon, xo ɲin xe in mu junubeto le ti.» 25Fiyonto xoto x'e jaabi xo: «Nin junubeto mu, walla nin junubeto nte, nte man wo lon de. Nte xa ku kilinŋo men lon, wo fele: Nte tun mu fiyonto ti, bari saasa ń be dula jela.» 26I saagita x'a ŋininxa xo: «A xa mun ke í la? A xa í ɲa yele ɲa di?» 27Fiyonto xoto x'e jaabi xo: «Nte xa wo fo alu ɲen xa ban, bari alu man nte lame. Mun dun na alu b'a fe xa wo me tugun? Alu dulu b'a fe xa ke a la xarandinŋolu ti ba?» 28I xa fiyonto xoto nani. I xo: «Ite le mu a la xarandinŋo ti! Nte kennu mu Musa le la xarandinŋolu ti. 29N x'a lon xo Ala xumata Musa ɲen. Bari ɲin xe in, ntelu man ɲin bodula lon!» 30Fiyonto xoto x'e jaabi xo: «Ɲin mu kawaku ti de: Atelu man a bodula lon, a dun xa nte ɲa yele. 31Alan bee x'a lon xo Ala nte junubetolu lamela. Bari moxo men be silala a ɲa, x'a sago ke, a be wo tigo le lamela. 32N man a me abada, xo moxo do xa fiyonto wuluninŋo ɲa yele. 33Nin ɲin xe in tun man bo Ala la, a tun me fusi ke no.» 34I xa wo xe jaabi xo: «Í junubeto fan ne wuluta. Í b'a fe xa ntelu laxaran ba?» Wo xo, i xa xe xoyi, x'a labo Alabatusuwo xono. 35Isa x'a me xo i xa fiyonto xoto xoyi. Isa x'a kunben x'a fo a ɲen xo: «Í lata Moxo Dinxe la ba?» 36A x'a jaabi xo: «Marigi, jon mu wo tigo ti, walasa nte xa la a la?» 37Isa xo a ɲen xo: «Í ɲa je men na, nin a be xumala í ɲen, wo le mu.» 38Xe xo: «Marigi, nte lata í la.» A x'é buti Isa xoto, x'a batu. 39Wo keninŋo, Isa xo: «Ń nata ɲin duniya in to ɲin kiiti in ne xanma: Walasa mennu fiyonto mu, wolu xa dula je, mennu ɲa be dula la, wolu xa fiyonɲa.» 40Farisiya dolu tunnu be Isa senbo to, wolu x'a ŋininxa xo: «Wo tumo la, nte dulu mu fiyonto le ti ba?» 41Isa x'e jaabi xo: «Nin alu tunnu fiyonto mu, junube tun me tu alu xan. Bari alu xo, x'alu ɲa be dula la. Wo xanma, alu la junubolu be alu xan».

will be added

X\