YAY 8

1Isa taxata Oliwe kuro xan. 2Wo lun do saxo ma junna, a taxata Alabatusuba xono tugun, jama bee kamarita a ma. A x'é sigi, x'e laxaran. 3Sariya karanmoxolu nin Farisiyalu nata muso do ti a bata. I xa wo muso muta fuyanɲa la. I xa muso lalo jama ɲa xoto. 4I xo Isa ɲen xo: «Karanmoxo, n xa ɲin musu in muta fuyanɲa la. 5Musa xa yanmaro di sariya xono xo n xa ɲin ɲoxon musulu bun kuro la, x'e faxa. Ite dun xo di?» 6I la wo xumo fokunŋo mu le, x'a xotobo, nin i s'a jalagi. Isa x'a kunŋo lajigi xa safelo ke duguxulo ma, a buluxonondinŋo la. 7I tuta a ŋininxala. Isa x'a kunŋo lawuli. A xo i ɲen xo: «Alu to, moxo men bada man junube ke, wo tigo folo xa kuro fayi a ma.» 8Wo xo, a x'a kunŋo lajigi tugun, xa safelo ke duguxulo ma. 9I xa wo me tumo men, i bee kilin kilin taxata, x'a damuta i to xotolu ma, fo xa taxa a bula i xo doxolu la. Isa nin muso kilin tuta je, wo be lonin a xoto. 10Isa x'a kunŋo lawuli, a xo: «Muso, i dunnu be min? Moxo man í ɲangi ba?» 11Muso x'a jaabi xo: «Marigi, moxo si man ń ɲangi.» Isa xo a ɲen xo: «Nte du nte í ɲangila. Taxa! Bari í xana junube ke tugun.»] 12Isa xumata jama ɲen tugun xo: «Nte mu duniya keneya le ti. Men je a lo ń nofe, wo me í taxama dibo to. A si keneya soto men si nilamaya di a ma.» 13Wo xanma, Farisiyalu xo: «Í be í fan seedeyala. Wo xanma, í la seedeya me muta.» 14Isa x'e jaabi xo: «Haali nin ń be ń fan seedeyala, nte la seedeya mu tonɲa le ti, bawo nte x'a lon, ń bota dula men, anin ń be taxala dula men. Atelu man a lon ń bota dula men, anin ń be taxala dula men. 15Alu be kiito tegela hadamadin miiriya le la. Nte ken nte kiiti tegela moxo si xan. 16Bari nin nte xa kiito tege, ń b'a tegela tonɲa le xan, bawo ń kilin nte wo kiito tegela. Fa Ala men xa ń ki, nte nin wo be i ɲoxo fe. 17A nte safenin alu la sariya xono ba, xo moxo fula je kuwo men seedeya, wo mu tonɲa le ti? 18Nte be ń fan seedeyala. Fa Ala men xa ń ki, wo du be ń seedeyala.» 19I xo a ɲen xo: «Í Fa be min?» Isa x'e jaabi xo: «Alu man nte lon, sakuta ń Fa. Nin alu tunnu xa nte lon, alu si ń Fa du lon.» 20Isa xa wo xumolu fo, x'a tu laxaranno la Alabatusuba xono. A tun be nilifenbulamiranŋo senbo to. Moxo si man a muta, bawo a la waxato tun man si folo. 21Isa xo i ɲen tugun xo: «Ń be taxala. Nin ń taxata, alu si ń ŋinin, bari alu si sa alu la junubolu xono. Ń be taxala dula men, alu me taxa no non.» 22Wo xumo xan, Yahudiyalu la ɲamoxolu xo: «A b'a fan faxala ba? Bawo a xo: “Ń be taxala dula men, alu me taxa no non.” » 23Isa x'e jaabi xo: «Alu mu duguxulo ta le ti. Nte mu sanxulo ta le ti. Alu mu ɲin duniya in ta le ti. Nte nte ɲin duniya in ta ti. 24Wo le x'a tu, ń x'a fo xo alu be sala alu la junubolu xono. Bawo nin alu man la a la xo: “Nte mu” wo mu nte le ti, alu si sa alu la junubolu xono.» 25I xo: «Í mu jon ti?» Isa x'e jaabi xo: «Ń xa men fo alu ɲen kabirin folofolo, ń mu wo le ti. 26Fen kiika be ń ma, x'a fo alu la kuwo to, fen kiika du be je ń si kiito tege alu xan mennu to. Men xa ń ki, wo mu tonɲatigo le ti. Ń xa men me a la, ń be wo le fola duniya ɲen.» 27A tun be xumala Fa Ala le ma i ɲen. Bari i man wo faamu. 28Isa xo i ɲen xo: «Nin alu xa Moxo Dinxe xotota tumo men, alu s'a lon xo: “Nte mu” wo mu nte le ti. Alu s'a lon du xo ń nte ku kela ń fan ma: Fa Ala xa ń naxaran men na, ń be wo doron ne fola. 29Men xa ń ki, ń nin a be i ɲoxo fe; a man ń kilin doron tu, bawo ń b'a sago kela tuma bee.» 30Isa la wo xumo x'a tu, moxo kiika lata a la. 31Yahudiya mennu lata Isa la, a xo wolu ɲen xo: «Nin alu tuta ń na xumaxanŋo xo, alu mu ń na xarandinŋolu ti soobe la. 32Alu si tonɲa lon, tonɲa si alu hooroya.» 33I x'a jaabi xo: «Ntelu mu Burehima bonsonŋo lelu ti. Ntelu bada man ke moxo la jon ti. Í dun s'a fo ɲa di xo: “Alu si hooroya?” » 34Isa x'e jaabi xo: «Tonɲa tonɲa, ń b'a fola alu ɲen xo: Moxo wo moxo be junubo kela, wo mu junubo la jonŋo le ti. 35Jonŋo nte tula a marigi la luwo ma kadawu. Bari a fan dinxe ken be tula je kadawu. 36Wo to, nin Ala Dinxe x'alu hooroya, alu si hooroya soobeya la. 37Ń x'a lon, xo alu mu Burehima bonsonŋolu ti. Bari haali wo, alu b'a fe xa nte faxa, bawo ń na xumo korita kunna alu to. 38Nte xa men je ń Fa bata, ń be wo le fola alu ɲen. Alu dulu xa kuwo mennu me alu fa la, alu be wo lelu kela.» 39I x'a jaabi xo: «Ntelu fa mu Burehima le ti.» Isa xo i ɲen xo: «Nin alu mu Burehima dinŋo lelu ti, alu Burehima la kewalolu ɲoxonnu ke. 40A fele saasa, alu b'a fe xa nte faxa, nte men xa tonɲa fo alu ɲen, ń xa men me Ala la. Burehima man wo ɲoxon ke de! 41Atelu be alu fa la kebaaro lelu kela.» I x'a jaabi xo: «Ntelu nte jangadinnu ti. Fa kilinpe le be ntelu la, nin wo mu Ala ti.» 42Isa xo i ɲen xo: «Nin Ala le tun mu alu Fa ti, alu tunnu si nte xanu, bawo nte bota Ala le to xa na. Ń man na ń fan ma. Ate le xa ń bula xa na. 43Mun na alu nte ń na xumo faamula? Bawo alu me a no xa nte la xumolu lame. 44Alu fa mu Sentane le ti. Alu b'a fe x'alu fa le diyanɲekuwolu ke. Ate keta moxofaxala ti kabirin folofolo. A man tu tonɲa xan, bawo haali tonɲa kese kilin nt'a fe. Nin a be faniya fola, a si xuma x'a la a fan keɲa xan, bawo faniyafola le mu. Faniya fan fa le mu. 45Nte ken be tonɲa le fola. Wo xanma alu nte lala nte la. 46Alu to moxo joman s'a fo no, xo nte xa ɲin junube in ne ke? Nin ń xa tonɲa fo, mun na alu nte lala ń na? 47Men mu Ala la moxo ti, wo si Ala la xumolu lame. Alu nte lameli kela bawo alu nte Ala la moxo ti.» 48Yahudiyalu x'a jaabi, i xo: «Nin n xo x'é mu Samaringo le ti anin xo jinno b'é to, n man tonɲa fo ba?» 49Isa x'e jaabi xo: «Jinne nte ń to. Ń be ń Fa le bunɲala, alu be nte doxoyala. 50Ń nte ń fan bunɲa ŋininna. Do be je men be kiito tegela, wo le b'a ŋininna xa nte bunɲa. 51Tonɲa tonɲa, ń b'a fola alu ɲen xo, nin moxo men xa nte la xumolu muta, wo me sa abada.» 52Yahudiyalu xo: «N x'a lon saasa xo jinno le b'é to. Burehima sata, kila dulu sata, ite xo, xo men je í la xumo muta, wo me sa abada. 53Ite xa bun ne ntelu fa Burehima ti ba, wo dun sata, kila dulu sata? Í b'é fan kela jon ti?» 54Isa x'e jaabi xo: «Nin nte tun be ń fan bunɲala, wo bunɲa nte fusi ti. Ń Fa le be nte bunɲala, alu xo wo men ma xo “alu la Ala”. 55Alu man a lon. Nte ken x'a lon. Nin nte tun xo, xo ń man a lon, ń si ke faniyafola ti, í xo atelu. Nte x'a lon, ń b'a la xumo marala. 56Alu fa Burehima ɲaxalita xo a si nte tilo je. A x'a je, a ɲaɲata.» 57Yahudiyalu xo a ɲen xo: «Í man haali tan luulu sanji soto, ite xa Burehima je ba?» 58Isa xo i ɲen xo: «Tonɲa tonɲa, ń b'a fola alu ɲen xo, jannin Burehima xa wulu, “Nte mu.” » 59Wo xumo nofe, i xa kurolu ta, x'e b'a bunna. Bari Isa x'é dugu, xa bo Alabatusuba xono.

will be added

X\