YAY 7

1Wo tanbo xo, Isa xa Galile maro yaala. A tun nt'a fe xa ke Yude, bawo Yahudiyalu la ɲamoxolu tunnu b'a nofe x'a faxa. 2Wo x'a tara Yahudiyalu la sallo men be kilila xo Ɲafasallo, wo sutiyata. 3A badinxelu xo: «Í me bo jan í xa taxa Yude, walasa í be kebaaro mennu kela, í la xarandinŋo mennu be non, wolu xa wolu je. 4Moxo men b'a fe í xa lon, wo me a la kebaarolu ke duguwo to. Nin í be ɲin ɲoxon kawakulu kela, í xa xan ne x'é yita duniya la.» 5Isa badinxelu xa wo fo, bawo i du tunnu man la a la. 6Isa xo i ɲen xo: «Nte la waxato man si folo. Waxato bee xa ɲin atelu ɲen, xa taxa. 7Duniya me atelu jaxuya, bari a be nte jaxuyala, bawo nte b'a yitala duniya la, xo a la kebaarolu xa jaxu. 8Ate kennu xa taxa sallo to. Nte nte taxala, bawo ń na waxato man si folo.» 9A xa wo fo i ɲen tumo men, a tuta Galile. 10Isa badinxelu taxaninŋo sallo to, a du taxata. Bari a taxata duguwo to. 11Yahudiyalu la ɲamoxolu tunnu b'a ŋininna sallo to. I tunnu be i ɲoxo ŋininxala xo: «A be minto?» 12A la xumo tun be jama bee da. Dolu tunnu b'a fola xo: «Moxo ɲuma le mu.» Dolu xo: «Moxo ɲuma nte, moxolafilila le mu.» 13Bari i xa wo xumolu bee fo duguwo to, bawo i tunnu be silala Yahudiyalu la ɲamoxolu ɲa. 14Xa sallo tu a tala to, Isa dunta Alabatusuba xono, xa moxolu laxaran. 15Yahudiyalu la ɲamoxolu dabaro banta. I xo: «Ɲin xe in xa Kitaabo lon di, x'a tara a man xaran?» 16Isa x'e jaabi xo: «Nte la xaranŋo nte bola ń fan to. A be bola ń kibaxo le to. 17Moxo men b'a fe xa Ala sago ke, wo s'a lon nin ń na xaranŋo be bola Ala la, walla nin ń na xumolu be bola ń fan ne to. 18Moxo men na xumolu be bola a fan to, wo be a fan ne bunɲa ŋininna. Bari moxo men b'a kibaxo bunɲa ŋininna, wo le mu tonɲatigo ti. Tilinbaliya si nte wo la. 19Xodi, Musa le man sariya di alu ma? Bari alu si nte í taxamala sariya silo xan. Mun na alu b'a ŋininna xa nte faxa?» 20Jama x'a jaabi, i xo: «Jinno le b'é to! Jon b'a ŋininna x'é faxa?» 21Isa xa xumo ta tugun xo: «Ń xa ku kilin ke tofoɲolunŋo, men x'alu bee dabaro ban. 22Musa xa ɲaxo sariya di alu ma. Wo man damuta Musa ma, a damutata alu mamaxe lelu ma. Wo sariya la, alu si moxo ɲaxa haali tofoɲolunŋo. 23Nin alu si dinxe ɲaxa no tofoɲolunŋo, walasa Musa la sariya xana tiɲa, mun na alu be diminna nte xanma, bawo ń xa moxo muume lakendeya tofoɲolunŋo? 24Alu fata kiito tegela kuwolu jeɲa doron ma. Alu kiito tege tonɲa xan.» 25Yerusaleme moxo dolu xo: «I b'a fe xa xe men faxa, ɲin ne nte ba? 26A fele, a be xumala keno la, i nte fen fola a ɲen. N na ɲamoxolu lata a la ba, xo ɲin xe in ne mu Kirisita ti? 27Ntelu xa ɲin bodula lon. Bari nin Kirisita nata, moxo me wo bodula lon.» 28Xa Isa tu moxolu laxaranna Alabatusuba xono, a fetenta xo: «Alu xo, x'alu xa ń lon, xa ń bodula du lon. Bari ń man na ń fan ma. Men xa ń ki, wo mu tonɲatigo le ti. Alu man wo lon. 29Nte x'a lon, bawo ń bota ate le bata. A le xa ń ki.» 30Wo xanma, i x'a ŋinin x'e b'a mutala. Bari moxo si bulo man la a xan, bawo a la waxato tun man si folo. 31Jama moxo kiika lata a la. I xo: «Nin Kirisita nata, a si taagumanseedolu ke ba xa tanbi ɲin xan?» 32Jama tun be men fola Isa la kuwo to dibo to, Farisiyalu xa wo me. Wo to, sadaxalasibaxa kuntigolu nin Farisiyalu xa garadolu bula, xo i xa taxa Isa muta. 33Isa xo wolu ɲen xo: «Ń nin alu be i ɲoxo xan dondin folo. Wo xo, ń be taxala ń kibaxo bata. 34Alu si ń ŋinin, bari alu me ń je. Ń be taxala dula men, alu me taxa no non.» 35Wo xumo xan, Yahudiyalu la ɲamoxolu xo i ɲoxo ɲen xo: «A be taxala min, nin n me a je tugun? Yahudiya mennu be jenjennin Gerekolu to, a be taxala wolu bata ba, xa Gerekolu laxaran? 36A la ɲin xuma innu xoto mu mun ti xo: Alu si ń ŋinin, bari alu me ń je. Ń be taxala dula men, alu me taxa no non?» 37Sallo lunba, nin wo mu a lun labanŋo ti, xa Isa tu lonin jama ɲa xoto, a fetenta xo: «Nin mindoxo be men na, wo xa na nte ma x'é min. 38Men je la nte la, bajiyo men be nilamaya dila, wo si woyo xa bo wo to, í xo Kitaabo x'a fo ɲa men.» 39Isa lannayabaxolu be nala Ni Senunŋo men sotola, a xumata wo le kuwo la ten. Wo waxato, Ni Senunŋo tun man di folo, bawo Isa tun man xotota folo xa taxa a la nooro xono. 40Jama xono, moxo kiika xa Isa la xumolu lame tumo men, wolu xo: «Sikka nt'a to kila men na naxumo fota, ɲin ne mu.» 41Dolu xo: «Kirisita le mu.» Dolu xo: «Kirisita si bo no Galile ba? 42Kitaabo man a fo xo Kirisita si bo mansaxe Dawuda to ba? Xo a si bo Betileheme, Dawuda bota gallo men to?» 43Jama talata Isa la kuwo to. 44Dolu tunnu b'a fe x'a muta. Bari moxo si bulo man la a ma. 45Garadolu x'e koppa xa na sadaxalasibaxa kuntigolu nin Farisiyalu bata. Wolu xo i ɲen xo: «Mun na alu nin a man na?» 46Garadolu x'e jaabi xo: «Ɲin xe in be xumala ɲa men, moxo man wo ɲoxon je abada.» 47Farisiyalu xo: «A x'alu dulu lafili ba? 48Alu xa n na kuntigi walla Farisiya joman kilin ne je lanin a la? 49Ɲin jama in men lata a la, wolu man Musa la sariya lon. I danganinŋo le mu.» 50Nikodeme men tun taxata Isa bata suwo to, wo tun mu Farisiya innu to do le ti. Wo xo tolu ɲen xo: 51«Alan na sariya la, moxo do si jalagi ba, x'a tara n man a lame, x'a lon a xa men ke?» 52I x'a jaabi xo: «Í du keta Galilengo ti ba? Kitaabo mafele, í s'a je xo kila si nte bola Galile.» [ 53Wo xo, bee taxata í bata.

will be added

X\