YAY 6

1Wo xo, Isa taxata Galile dalaba boxo do. Dolu xo Tiberiyade dalaba. 2Jamaba tun b'a nofe, bawo i ɲa x'a la taagumanseedolu je jangarutolu kendeyalo fe. 3Isa nin a la xarandinŋolu yeleta kuro xan, x'e sigi. 4Wo x'a tara Yahudiyalu la Tanbinxansallo sutiyata. 5Isa x'a kunŋo xotota xa jamaba je nanin a ma. A xo Filipe ɲen xo: «Alan si buuro san min, walasa xa ɲin moxo innu daŋinin?» 6A xa wo xumo fo le, xa Filipe xotobo, bawo a tun fan x'a lon a be nala men kela. 7Filipe x'a jaabi xo: «Haali nin í xa deɲe xaaliso keme fula dun buuro to, x'a fo xo í be dondin dondin dila bee ma, a bee me fen soto.» 8A la xarandinŋo do, xo Andere, Simon Piyere doxoxe, wo xo a ɲen xo: 9«Xamarindinŋo do be jan, buurukun luulu anin ɲegexala fula b'a bulu. Bari wolu si mun bo ɲin moxo innu bee ɲen?» 10Isa xo: «Alu i lasigi.» Bin morosoninŋo tun xa sa wo dula. I woman innu sigita. I xeba haxxo tun be taxala wulu luulu ɲoxon ma. 11Isa xa buurolu ta, xa barako bula Ala ɲen, x'e di, i xa tala moxolu sigininŋo te. A xa ɲego dulu ta x'e ke wo ɲa in. Moxo wo moxo, bee x'é sago soto. 12Moxolu faninma, Isa xo a la xarandinŋolu ɲen xo: «Alu tokutunŋolu kamari, walasa fen xana tiɲa.» 13I x'e kamari, xa sinsi tan nin fula lafa tokutunŋolu la, mennu tuta buurukun luulo domoninŋo xo. 14Wo moxolu xa Isa la kawakuwo je tumo men, i xo: «Tonɲa, kila men na naxumo fota duniya to, ɲin ne mu.» 15Isa x'a lon xo i b'a fe x'a muta diyakuwa la, x'a ke mansaxe ti. Wo to, a x'é koppa, xa taxa kuro to, a dan na. 16Suwo kuninma, Isa la xarandinŋolu jigita dalaba da la. 17I dunta xulunŋo xono, xa taxa Kaperenahun dalaba boxo do. Dibo tun dunta x'a tara Isa man na i bata. 18X'e tu jiyo xan, foɲoba wulita xa jiyo xutunba. 19I taxata ɲafe jiyo xan, kilometere luulu fo wooro ɲoxon na. Wo tumo la, i xa Isa je í taxamala dalaba xan, nanin xulunŋo ma. Xarandinŋolu silata. 20Bari Isa xo i ɲen xo: «Alu xana sila! Nte le mu.» 21I tunnu b'a fe x'a ladun xulunŋo xono. Bari wo no bee to, i tunnu be taxanin dula men, xulunŋo sita non danxanŋo ma. 22Jama men tun be dalaba boxo do, wolu tunnu x'a korosi xo xulun kilin ne tun be je. I x'a lon du xo Isa nin a la xarandinŋolu man taxa i ɲoxo la wo xono, bari xo xarandinŋolu doron nelu taxata. 23Wo lun do, Marigi tun xa barako bula Ala ɲen dula men, xa domolo di i ma, xulunŋo dolu bota Tiberiyade xa na non. 24Jama x'a je xo Isa tun nte non, a la xarandinŋo du tunnu nte non. Wo to, i dunta wo xulunŋolu xono, xa taxa Kaperenahun, xa taxa Isa ŋinin. 25I x'a tara dalaba boxo do tumo men, i xo a ɲen xo: «Karanmoxo, í nata jan tuma joman?» 26Isa x'e jaabi xo: «Tonɲa tonɲa, ń b'a fola alu ɲen xo alu nte ń ŋininna bawo alu xa taagumanseedolu je. Alu be ń ŋininna le, bawo alu xa domolo ke x'e fa. 27Domolo men be tiɲala, alu xana baaro ke wo soto xanma. Bari domolo men nte tiɲala, men si nilamaya banbalo di alu ma, alu baaro ke xa wo soto. Moxo Dinxe si wo domolo di alu ma, bawo Fa Ala x'a la taagumanseedo ke ate le la.» 28I x'a ŋininxa xo: «N xa xan xa mun ke nin n si Ala sago dafa?» 29Isa x'e jaabi xo: «Ala sago alu xa men ke, wo mu ɲin ne ti xo: A xa men ki, alu xa la wo la.» 30I xo: «Í be taagumanseede joman yitala n na, men s'a tu n xa la í la? Í be mun kela n x'a je? 31Alan mamaxelu xa manne domo wulo xono í xo a be safenin Kitaabo to ɲa men xo: “A xa domolo di i ma xa bo sanŋo to.” » 32Isa x'e jaabi xo: «Tonɲa tonɲa, ń b'a fola alu ɲen, xo Musa man domolo di alu ma xa bo sanŋo to, bari ń Fa le be domoli soobe dila alu ma xa bo sanŋo to. 33Bawo men jigita xa bo sanŋo to, wo le mu Ala la domolo ti, wo le be nilamaya dila duniya ma.» 34I xo a ɲen xo: «Marigi, wo domolo di ntelu ma tuma bee.» 35Isa xo i ɲen xo: «Nte le mu domolo ti, men be nilamaya dila. Moxo men je na nte ma, xonxo me wo tigi muta abada. Moxo men je la nte la, mindoxo me wo muta abada. 36Ń x'a fo alu ɲen xo: Alu xa ń je, bari haali wo, alu man la nte la. 37Fa Ala je moxo wo moxo di ń ma, wo si na ń ma. Moxo men je na ń ma, ń me wo tigi xoyi muume. 38Bawo nte man jigi xa bo sanŋo to ń fan sago ke xanma. Ń jigita xa na ń kibaxo le sago ke. 39Ń kibaxo sago fele: Xo a xa mennu di ń ma, wolu fen xana sanko ń bulu, bari xo ń x'e lakuni duniya labanlunŋo. 40Ń Fa sago mu men ti, xo moxo wo moxo xa Dinxe je, xa la a la, wo xa nilamaya banbalo soto. Duniya labanlunŋo, ń si wo tigi lakuni.» 41Isa la wo xumo xa Yahudiyalu dimin x'e bula daxotoxumo la, bawo a tun x'a fo xo: «Nte le mu domolo ti, men jigita xa bo sanŋo to». 42I tunnu b'a fola xo: «Yusufu dinxe Isa nte ɲin ti ba? N xa moxo men na nin a fa lon. A dun s'a fo ɲa di xo ate jigita xa bo sanŋo to?» 43Isa x'e jaabi xo: «Alu ŋuunuŋuunu ku nte. 44Moxo si me na nte ma no, nin Fa Ala men xa ń ki, wo man a saba xa na a ti ń ma. Men je na ń ma, ń si wo tigo lakuni duniya labanlunŋo. 45Kilalu do xa ɲin xuma in safe xo: “Ala s'i bee laxaran.” Moxo wo moxo be Fa Ala lamela, xa son a la xaranŋo ma, wo tigi si na ń ma. 46Wo xoto nte xo moxo xa Fa Ala je, fo men bota Ala bata. Wo le kilinpe x'a je. 47Tonɲa tonɲa ń b'a fola alu ɲen, xo moxo wo moxo je la nte la, wo xa nilamaya banbalo soto. 48Nte mu domolo le ti, men be nilamaya dila. 49Xotonin x'alu mamaxelu tu wulo xono, i xa manne domo, i sata. 50Bari domolifenŋo men jigita xa bo sanŋo to, moxo wo moxo je wo domo, wo me sa. 51Nte mu domolifen nilama le ti, men jigita xa bo sanŋo to. Moxo men je ɲin domolifen in domo, wo si nilamaya banbalo soto. Ń be domolifenŋo men dila, wo mu ń balasubo le ti; walasa duniya xa nilamaya soto.» 52Wo xumo xa Yahudiyalu bula i ɲoxo la. I xo: «Ɲin xe in s'a balasubo di n ma ɲa di, n x'a domo?» 53Isa xo i ɲen xo: «Tonɲa tonɲa, ń b'a fola alu ɲen: Nin alu man Moxo Dinxe balasubo domo x'a jelo min, nilamaya nte alu fe. 54Moxo men je ń balasubo domo, xa ń jelo min, wo xa nilamaya banbalo soto. Duniya labanlunŋo, ń si wo tigo lakuni. 55Nte balasubo mu domolifen soobe le ti, ń jelo mu minfen soobe le ti. 56Moxo men je ń balasubo domo, xa ń jelo min, wo tigi nin nte kafuta, nte nin wo tigi kafuta. 57Fa Ala men xa ń ki, wo nilama mu; nte du nilama mu Fa Ala barako to. Wo ɲa ma, moxo men xa nte domo, wo si nilamaya nte barako to. 58Domolifenŋo men jigita xa bo sanŋo to, wo le je. Alu mamaxelu xa manne domo, wo xo, i sata. Wo nin ɲin nte kilin ti. Men je ɲin domolifen in domo, wo si tu í nila fo abada.» 59Isa xa ɲin xuma innu fo x'a tu moxolu laxaranna Kaperenahun Alabatusuwo xono. 60Isa la xarandinŋolu kiika x'a la wo xumo lame tumo men, i xo: «Ɲin xuma in xa xole de! Moxo joman si son a ma no?» 61Isa x'a lon a fan ma, xo a la xarandinŋolu be daxotoxumo la wo kuwo to. A woman in xo i ɲen xo: «Wo x'alu lamuruti ba? 62Nin alu xa Moxo Dinxe je yelela xa taxa, a tun be dula men folo, alu si mun fo wo to? 63Ala Niyo le be nilamaya dila, balasubo nte fusi ti. Ń xa xumo mennu fo alu ɲen, wolu mu Niyo nin nilamaya le ti. 64Bari dolu b'alu to mennu man lannaya ke.» Isa xa wo fo, bawo kabirin a damuto, a tun x'a lon mennu man lannaya ke anin moxo men b'a dunna bulo to. 65Isa xo: «Wo le x'a tu, ń x'a fo alu ɲen, xo moxo si me na no nte ma, nin wo man wuli Fa Ala la.» 66Kabirin wo, a la xarandinŋolu kiika bota. I man taxa a nofe tugun. 67Isa xo a la xarandin tan nin fulo ɲen xo: «Alu dulu b'a fe x'e koppa ba?» 68Simon Piyere x'a jaabi xo: «Marigi, n si taxa jon bata? Nilamaya banbalo xumolu be ite le da. 69N lata í la, n x'a lon du, xo í mu Ala la Senumanŋo ti, a xa men ki.» 70Isa x'e jaabi xo: «Xodi, nte le man alu tan nin fulo sugandi? Wo bee nin a ta, alu to kilin mu Sentane le ti.» 71A tun be Simon dinxe Yudasi Isikariyoti le ma, men be nala a dunna bulo to. Haali x'a tara a la xarandin tan nin fulo to kilin ne mu.

will be added

X\