YAY 5

1Wo xo, Yahudiyalu la sallo do keta Yerusaleme. Isa taxata je. 2Dinxa jima do tun be Yerusaleme xono, Saaxolu la Dunda senbo to. Dinxa jima in toxo heburuxanŋo to xo: Beteseda. Biire luulu tun be lonin je. 3Jangaruto kiika tun be lanin wolu xoto: Fiyontolu nin sinkilinŋolu nin namatolu. [Wolu tunnu be jiyo lamaxalo laxononin. 4Marigi la melekiyo do tun si jigi ji in to waxati nin waxati, x'a lamaxa. Nin jiyo lamaxata, jangaruto folo men je jigi a to, a keta jangaru wo jangaru ti, wo si kendeya.] 5Xe do tun be je, a be jangarunin kabirin san tan saba nin sagi. 6Isa x'a je lanin tumo men, x'a lon xo jangaru in tun b'a la kabirin waxati jan, a xo a ɲen xo: «Í b'a fe xa kendeya ba?» 7Jangaruto x'a jaabi xo: «Marigi, moxo nte ń kun xa ń fili jiyo to nin a lamaxata. Nin ń xo, xo ń be jigila, ń s'a tara do xa ń saawa.» 8Isa xo a ɲen xo: «Wuli, í x'é la laranŋo ta, x'é taxama.» 9Wo no bee to, a kendeyata. A x'a la laranŋo ta, x'é taxama. Wo kuwo keta tofoɲolunŋo. 10Yahudiyalu la ɲamoxolu xo xe men kendeyata ɲen xo: «Bi mu tofoɲolunŋo le ti. A dagenin nte í ɲen í x'é la laranŋo ta.» 11A x'e jaabi xo: «Men xa ń kendeya, wo x'a fo ń ɲen xo: Í la laranŋo ta, x'é taxama.» 12I x'a ŋininxa xo: «Jon x'a fo í ɲen xo í x'é la laranŋo ta, x'é taxama?» 13Bari xe men kendeyata, a man a kendeyabaxo lon, bawo Isa tun bota jama to xa ban. 14Wo xo, Isa xa wo xe tara Alabatusuba xono. A xo a ɲen xo: «A fele, í janxa kendeya. Í xana junube ke tugun, ku xana taxa í soto, men xa jaxu ɲin ti.» 15Wo xe taxata a fo Yahudiyalu la ɲamoxolu ɲen xo Isa le x'a kendeya. 16Wo le x'a tu, Yahudiyalu la ɲamoxolu tunnu be Isa nofe, bawo a xa wo kuwo ke tofoɲolunŋo. 17Isa x'e jaabi xo: «Nte Fa be baaro la tuma bee. Nte du be baaro la.» 18Wo xumo xanma, Yahudiyalu la ɲamoxolu x'a ŋinin xa Isa faxa xa tanbi folo xan. A xa tofoɲolunŋo toxosi. Wo doron tun nte, bari a tun be Ala du kilila xo a Fa. Wo la, a x'a fan nin Ala xaaɲan. 19Isa xa xumo ta tugun, a xo i ɲen xo: «Tonɲa tonɲa, ń b'a fola alu ɲen xo: Dinxe me fusi ke no a fan ɲen, fo nin a xa Fa je men kela. Fa je men ke, Dinxe du si wo ke. 20Fa be Dinxe xanunin, a be fen wo fen kela, a si wo yita a la. A si kebaarolu yita a la, mennu barako xa bun ɲinnu ti, walasa alu dabaro xa ban. 21Fa be furelu lakunila ɲa men, xa niyo k'e to, wo ɲa ma, a xa di Dinxe ɲen xa niyo ke men to, a s'a ke wo to. 22Fa nte kiiti du tegela moxo si xan. A xa kiititego bee tu Dinxe le ma, 23walasa bee xa Dinxe bunɲa í xo i be Fa bunɲala ɲa men. Moxo men nte Dinxe bunɲala, wo nte Fa du bunɲala, wo men x'a ki. 24«Tonɲa tonɲa, ń b'a fola alu ɲen xo: Moxo wo moxo je ń na xumo lame, xa la ń kibaxo la, wo xa nilamaya banbalo soto. Kiito me tege wo xan abada. A bota saya la, xa nilamaya. 25Tonɲa tonɲa, ń b'a fola alu ɲen xo: Waxato si na, wo waxato sita fan, furelu si Ala Dinxe xumaxanŋo me. Mennu j'a me, wolu si nilamaya. 26Nilamaya tigiya be Fa bulu ɲa men, a xa nilamaya tigiya dun Dinxe du bulu ten. 27A xa kiititego barako di a ma, bawo a mu Moxo Dinxe ti. 28Alu dabaro xana ban wo la, bawo waxato do be nala; wo tumo moxo, mennu bee be xaburo xono, wolu si a xumaxanŋo me, 29xa kuni xa bo furelu to. A x'a tara mennu xa ɲuma ke, wolu si kuni nilamaya banbalo xanma. Mennu xa jaxumanŋo ke, wolu si wuli kiito xanma. 30«Nte me fusi ke no ń fan barako la. Ala be men fola ń ɲen, ń be kiito tegela x'a la wo le xan. Nte la kiito be tilinnin, bawo ń nte ń fan sago ŋininna, bari ń kibaxo sago. 31Nin nte le be ń fan seedeyala, ń be men fola, wo me muta. 32Do xote le be nte seedeyala. Ń x'a lon xo a be men fola nte la kuwo to, wo mu tonɲa le ti. 33Alu xa moxolu bula Yaya bata, a xa men fo ń na kuwo to, wo mu tonɲa le ti. 34Nin ń xa wo fo, a xoto nte xo nte haaju be hadamadin na seedeyali ma. Ń xa wo fo le, nin alu si kisi. 35Yaya keta í xo lanpa mananinŋo keneya. A diyata atelu ɲen xa ɲaxali a keneya la waxati la. 36Fa xa kebaaro mennu dun ń bulu xo ń x'e ke, wolu be nte seedeyala anin x'a yita xo Fa le xa ń ki. Wo seedeyalu xa bun Yaya ta ti. 37Fa men xa ń ki, wo fan xa ń seedeya. Alu bada man a xumaxanŋo me. Alu bada man a ɲada je. 38Alu man a la xumo mara, bawo a xa men ki, alu man la wo la. 39Alu be Kitaabo xumolu xaranbetela, bawo alu ɲala, x'alu si nilamaya banbalo soto wo la. Wo Kitaabu kilinŋo le xonoxumo be nte seedeyala. 40Bari alu nt'a fe xa na nte ma, xa nilamaya banbalo soto. 41«Nte nte moxo la bunɲali ŋininna. 42Ń x'a lon xo alu nte Ala xanula. 43Ń nata ń Fa toxo la, alu man son ń to. Bari nin do nata a fan toxo la, alu si son wo to. 44Alu si lannaya ke ɲa di, atelu mennu be i ɲoxo la bunɲa mutala, x'a tara bunɲa be bola Ala kilinpe men to, alu nte wo la bunɲa ŋininna? 45A xana ke alu ɲen de xo nte le be alu jalagila Fa Ala ɲala. Alu x'alu gigo la Musa men xan de, wo le be kela alu jalagibaxo ti. 46Nin alu tunnu lata Musa la, alu si la nte du la, bawo a xa nte la kuwo safe. 47Bari nin alu man la Musa la xuma safeninŋolu la, alu si la nte la xumolu la ɲa di?»

will be added

X\