YAY 4

1Farisiyalu x'a me xo Isa be xarandinŋo men sotola x'a batise, wo xa sa Yaya ta ti. 2Bari Isa fan tun nte moxo batisela. A la xarandinŋo le tunnu be wo kela. 3Isa xa wo me tumo men, a bota Yude maro xono, x'é koppa Galile maro ma. 4Wo to, a tun xa xan xa Samari maro tokutun. 5X'a taxato tu non, Isa nata Samari gallo do to xo Sikare. Yahudiyalu mamaxe Yaxuba xa fuuto men di a dinxe Yusufu ma, Sikare be wo fuuto senbo to. 6Yaxuba la xolonŋo be non. Isa segeninma taxamo la, a taxata í sigi wo xolonda la. Wo benta tilinkunte ma. 7Awa, Samaringamuso do nata jita la. Isa xo a ɲen xo: «Jiyo do di ń ma, ń xa ń min.» 8Wo x'a tara a la xarandinŋolu taxata domolisandula gallo xono. 9Samaringamuso xo a ɲen xo: «Aa, ite Yahudiyama le be minnijiyo ŋininna nte Samaringama la?» Muso xa wo fo, bawo kafu tun nte Yahudiyalu nin Samaringolu te. 10Isa xa muso jaabi xo: «Nin í tun xa Ala la nilifenŋo lon anin moxo men janxa minjiyo ŋinin í la ten, ite fan tun si jiyo maŋininxa wo la, a tun si nilamaya jiyo d'í ma.» 11Muso xo a ɲen xo: «Marigi, í si wo nilamaya jiyo bo min? Fate nte í bulu, xolonŋo dun xa jan. 12Ite xa bun ne ntelu mamaxe Yaxuba ti ba, wo men xa ɲin xolon in di ntelu ma? Ate fan x'a jiyo min, a dinŋolu dulu nin a la marafenŋolu x'a jiyo min.» 13Isa x'a jaabi xo: «Moxo wo moxo xa ɲin ji in min, mindoxo s'a muta tugun. 14Bari moxo wo moxo x'é min nte la jiyo la, mindoxo me wo muta abada. Ń je jiyo men di a ma, wo si ke a xono í xo ji woyota, xa nilamaya banbalo di a ma.» 15Muso xo a ɲen xo: «Marigi, wo jiyo di ń ma, walasa mindoxo xana ń muta tugun, anin ń xana na jita la jan tugun.» 16Isa xo muso ɲen xo: «Taxa í xe kili, alu xa na jan.» 17Muso x'a jaabi xo: «Xe nte ń kun.» Isa xo a ɲen xo: «Í xa tonɲa fo, xo xe nte í kun; 18bawo í sigita xe luulu kun xa tanbi. Haali xe men b'é kun saasa, wo nte í xe ti. Wo to, í xa tonɲa fo.» 19Muso xo a ɲen xo: «Marigi, nte x'a je xo í mu kila le ti. 20Ntelu mamaxelu xa Ala batu ɲin kuru in xan. Bari atelu Yahudiyalu xo, xo batulo xa xan xa ke dula men, wo be Yerusaleme le.» 21Isa xo a ɲen xo: «Muso, la a la, xo waxato si na, alu si Fa Ala batu, jan nte, Yerusaleme nte. 22Atelu Samaringolu fannu be men batula, alu man wo lon. Ntelu Yahudiyalu be men batula, n xa wo lon. Bawo kisilo be bola Yahudiya lelu to. 23Waxato be nala, a sita xa ban, batubaxa soobelu si Fa Ala batu niyo nin tonɲa la; bawo Fa Ala be wo ɲoxon batubaxo lelu ŋininna. 24Ala mu Niyo le ti. Waajibo le mu, a batubaxolu x'a batu niyo nin tonɲa la.» 25Muso xo a ɲen xo: «Ń x'a lon xo Alimasiya be nala, nin wo mu Kirisita ti. Nin wo nata, a si fenŋo bee ɲa fo n ɲen.» 26Isa xo a ɲen xo: «Nte men je xumala í ɲen de, nte le mu.» 27Xa Isa nin wo muso tu xumala, a la xarandinŋolu nata. I x'a nin muso tara xumala tumo men, wo x'e dabaro ban. Bari moxo si man a ŋininxa xo «Í be mun nofe?» walla xo: «Mun na í be xumala a ɲen?» 28Muso x'a la jitalanŋo sigi, xa taxa gallo xono, x'a fo moxolu ɲen xo: 29«Alu na xe do mafele, men saagita nte la ku keninŋolu bee ma ń ɲen. A me tara Kirisita ti ba?» 30Moxolu bota gallo xono xa taxa Isa bata. 31Wo xono, xarandinŋolu balanta a ma xo: «Karanmoxo, domolo ke!» 32A xo xarandinŋolu ɲen xo: «Domolifenŋo do be ń bulu x'a domo, atelu man wo lon.» 33Xarandinŋolu x'e ɲoxo ŋininxa xo: «Do le nata domolo di a ma ba?» 34Isa xo i ɲen xo: «Xa ń kibaxo sago nin a la baaro ke x'a dafa, wo le mu ń na domolo ti. 35Alu nte a fola ba xo: “Xaru naani le be lanno nin tegelo te?” Bari nte b'a fola alu ɲen xo: Alu i ɲalu xotota xa fuutolu mafele, i mota xa si tego ma xa ban. 36Men be tegelo kela, wo s'a sara soto, xa siimankeso du kamari nilamaya banbalo xanma, walasa lannila nin tegelila bee xa ɲaxali i ɲoxo fe. 37Bawo ɲin sanda in mu tonɲa le ti xo: “Do x'a lan, do x'a tege.” 38Alu man sege fenŋo men na, ń x'alu bula wo tegela. Dolu segeta, atelu xa wolu la tono soto.» 39Samari wo gallo moxolu kiika lata Isa la, muso la ɲin xuma in xanma xo: «Ń xa ku wo ku ke, a saagita a bee ma ń ɲen.» 40Samaringolu naninŋo Isa bata, i x'a matara xo a xa tu i bata. A woman in xa tili fula ke i bata. 41A la xumo x'a tu moxo kiika lata a la. 42I xo muso ɲen xo: «Í la xumo doron man a tu ntelu xa lannaya ke. Ntelu fannu x'a lame, n x'a lon tonɲa la, xo duniya Kisibaxo le mu.» 43Wo tili fulo tanbo xo, Isa bota je xa taxa Galile, 44bawo Isa fan tun xo, xo kila me bunɲa soto a fan fasuwo la. 45A sita Galile tumo men, non moxolu x'a kunben bete. A xa kuwo fen wo fen ke Tanbinxansallo to Yerusaleme, wolu tunnu xa wo bee je, bawo i du tunnu taxata salli in to. 46A x'é koppa Galile Kana ma. A tun xa jiyo yelema dolo ti non ne. Ɲamoxoba do dinxe tun be Kaperenahun gallo to, a man kende. 47Wo xe x'a me, xo Isa bota Yude, xa na Galile. A woman in nata Isa bata x'a matara, xo a xa na Kaperenahun, a dinxe be ŋinin xa sa, nin a s'a lakisi. 48Isa xo a ɲen xo: «Xodi, nin alu man taagumanseedolu nin kawakuwolu je de, alu me lannaya ke?» 49Wo ɲamoxoba x'a jaabi xo: «Marigi, í balan í xa na jannin ń dinxe be sala.» 50Isa xo a ɲen xo: «Taxa! Í dinxe me sa.» Wo xe lata Isa la xumo la. A xa silo muta xa taxa. 51A la jonŋolu x'a kunben silo to, x'a fo a ɲen xo: «Í dinŋo kendeyata.» 52A x'e ŋininxa xo a dinxe kendeyata waxati joman? I x'a jaabi xo: «Kunun tilinkunte tumo le mu, nin xando fatata a ma.» 53Fa xa jaate muta, x'a lon xo wo waxato fan ne mu, Isa xo a ɲen xo: «Í dinŋo me sa.» A nin a la kore bee lata Isa la. 54Wo keta Isa la kawaku fulananŋo ti, a boninma Yude, xa na Galile.

will be added

X\