YAY 3

1Ɲin keta Farisiya diino moxo do le ti, a toxo xo Nikodeme. Yahudiyalu la ɲamoxo do le tun mu. 2Lun do, a nata Isa bata suwo to, a xo a ɲen xo: «Karanmoxo, ntelu x'a lon xo Ala le x'é ki xa na n xaran. Bawo í b'a ma xa taagumanseedo mennu ke, moxo si me wolu ke no nin a nin Ala nte i ɲoxo fe.» 3Isa x'a jaabi xo: «Tonɲa tonɲa, ń b'a fola í ɲen, xo nin moxo men man towulu, wo me dun no Ala la Mansaya xono.» 4Nikodeme xo a ɲen xo: «Moxo men xotota xa ban, wo si wulu no ɲa di tugun? A s'í koppa no a na xono to tugun ba, xa saagi wulunin?» 5Isa x'a jaabi xo: «Tonɲa tonɲa, ń b'a fola í ɲen, xo nin jiyo nin Ni Senunŋo man moxo men wulu, wo me dun no Ala la Mansaya xono. 6Balasubo xa men wulu, wo mu balasubo le ti. Ni Senunŋo xa men wulu, wo mu niyo le ti. 7Í dabaro xana ban nin ń x'a fo í ɲen xo waajibo le mu, alu xa towulu. 8Nin í xa foɲo mafele, dula wo dula xa di a ɲen, a si tege non. Í s'a sonxoxanŋo me í tulo la, bari a be bola jan men anin a be taxala jan men, í man wo lon. Niyo xa moxo men wulu, wo be ten.» 9Nikodeme xo a ɲen xo: «Wo si ke ɲa di?» 10Isa x'a jaabi xo: «Ite men mu Banisirayila la karanmoxo ti, í man wo kuwolu lon? 11Tonɲa tonɲa, ń b'a fola í ɲen xo, n xa men lon, n be wo le fola. N xa men je, n be wo le du seedeyala. Bari alu nte n na seedeya mutala. 12Ń xumata alu ɲen duguxulo xan kuwolu la, bari alu man la ń na. Alu si lannaya ke ɲa di nin ń xumata alu ɲen sanŋo to kuwolu la? 13Moxo si man yele xa taxa sanŋo to, fo Moxo Dinxe, wo men jigita xa bo je. 14«Kila Musa xa sa dara, x'a siti guma la, x'a xotota wulo xono ɲa men de, waajibo le mu Moxo Dinxe du xa xotota ten, 15walasa moxo wo moxo nin í lata a la, wo tigi xa nilamaya banbalo soto. 16Bawo Ala xa duniya xanu haali fo a x'a Dinxe kilinpe di, walasa xo nin moxo wo moxo lata wo la, wo xana halagi, bari a xa nilamaya banbalo soto. 17Ala man a Dinxe ki xo a xa na kiito tege duniya xan. A x'a ki le, nin a si duniya kisi. 18«Moxo men je la a la, wo sin nte sinin kiito to; bari moxo men man la a la, kiito tegeta wo tigi xan xa ban, katugu a man la Ala Dinxe kilinpe la. 19Wo kiito ɲa fele xo: Keneya nata duniya xono, bari dibo diyata moxolu ɲen keneya ti, bawo i la kebaarolu xa jaxu. 20Moxo wo moxo be jaxumanŋo kela, keneya man di wo ɲen. Wo tigo me son du xa na keneya la, a la kebaarolu xana taxa je. 21Bari moxo men, nin a la kebaarolu be tonɲa xan, wo si na keneya la, walasa bee x'a je x'a lon xo a la kebaarolu be Ala to.» 22Wo xo, Isa nin a la xarandinŋolu taxata Yude maro la. A tuta i bata je xa moxolu batise. 23Yaya du tun be moxolu batisela Enon, Salimu senbo to, bawo jiyo kiika tun be non. Moxo tunnu be nala je xa batise. 24Wo x'a tara Yaya tun man bula kaso la folo. 25Lun do, soosolo wulita Yaya la xarandinŋolu nin Yahudiya do te. Wo soosolo tun be i la senuyaliɲa xan, i la laado silo la. 26I nata Yaya ma, i xo: «Karanmoxo, í nin xe men tun be Yuruden ba xofe, fo í x'a la kuwo seedeya, a fele: A du be batiselo kela saasa. Moxo bee be taxala a bata.» 27Yaya x'e jaabi xo: «Moxo me fusi soto no nin Ala man men di a ma. 28Alu fannu mu ń seedo ti, ń x'a fo alu ɲen xo: Nte nte Kirisita ti, bari nte bulata a ɲa le.» 29Yaya xo i ɲen du xo: «Maaɲoxe le ta mu maaɲo ti. Bari maaɲoxe xanunte, wo men be maaɲoxe senbo to, x'a xumaxanŋo lame, a du si ɲaxali bete maaɲoxe xumaxanŋo la. Nte du la ɲaxalo be ten ne. Ń na ɲaxalo dafata. 30Waajibo le mu, do xa kafu ate bunɲa ma, do xa bo nte ta la. 31«Men bota sanŋo to, wo be bee kunna; men bota duguxulo xan, wo mu duguxulo ta le ti, a be duguxulo xumo lelu fola. Bari men bota sanŋo to, wo be fen bee kunna; 32a xa men je, a xa men me, a be wo le seedeyala. Bari moxo si nte sonna a la seedeya ma. 33Moxo men be sonna a la seedeya ma, wo s'a yita x'a xoyiya, xo Ala mu tonɲatigo le ti. 34Ala xa men ki, wo be Ala la xumaxanŋo lelu fola, katugu Ala xa Ni Senunŋo di a ma x'a dafa. 35Fa Ala be a Dinxe xanunin. Wo xanma, a xa kuwo bee dun a bulu. 36Moxo men je la a Dinxe la, wo xa nilamaya banbalo soto; moxo men man son xa la Ala Dinxe la, wo me nilamaya banbalo soto, bari Ala la diminŋo b'a xan.»

will be added

X\