YAY 21

1Wo xo, Isa x'é yita a la xarandinŋolu la Tiberiyade dalaba da la. A x'é yita ɲa men ma, wo fele: 2Simon Piyere nin Tomasi, men kilita xo Fune, nin Natanayeli, men bota Galile maro gallo do to xo Kana, nin Sebede dinxelu anin Isa la xarandin fula xote, wolu tunnu be i ɲoxo fe. 3Simon Piyere xo tolu ɲen xo: «Ń be taxala ɲegemutadula.» I xo a ɲen xo: «N dulu be taxala.» Wo to, i wulita xa taxa dun xulunŋo xono. Bari wo lunŋo suwo to, i man fusi muta. 4Saxo yeleninma, i xa Isa je lonin dalaba da la. Bari xarandinŋo tunnu man a lon xo Isa le mu. 5Isa xo i ɲen xo: «Ń na dindinŋolu, alu man ɲege soto ba?» I x'a jaabi xo: «Ayi, n man fen soto.» 6A xo i ɲen xo: «Alu jala fili xulunŋo kininbulo xoto, alu si do soto.» I xa jala fili. Ɲego siyakujaxo bulu, i korita jala sabala. 7Isa tun xa xarandinŋo men xanu, wo xo Piyere ɲen xo: «Marigi le mu!» Kabirin Simon Piyere x'a me doron xo Marigi le mu, a x'a la doroko dun, bawo a xannaxulunŋo le tun mu, x'é fili jiyo to. 8Xarandin tolu nin xulunŋo nata. I tunnu be jala ma, x'a saba, a be fanin ɲego la. I tunnu nin danxanŋo te mu nonxon keme fula ɲoxon ne ti. 9I sita danxanŋo la tumo men, i xa takeso je, ɲego be lanin a to, anin buuro. 10Isa xo i ɲen xo: «Alu birin ɲego mennu mutala, alu na dolu ti.» 11Simon Piyere dunta xulunŋo xono, xa jala nin ɲego saba, x'a lasi tinto la. Jala faninŋo tun be ɲege belebeleba keme nin tan luulu nin saba la. Bari haali ɲege innu nin i la siya, jala man fara. 12Isa xo i ɲen xo: «Alu na domolo ke.» Xarandin si man fatiya x'a ŋininxa xo: «Ite mu jon ti!» Bawo i x'a lon xo Marigi le mu. 13Isa x'é sodun i la, xa buuro ta, x'a di i ma. A xa ɲego du di i ma. 14Ɲin keta Isa yita kunɲa sabananŋo ti a la xarandinŋolu la, a kuniyo xo xa bo furelu to. 15Domolo keninma, Isa xo Simon Piyere ɲen xo: «Yaya dinxe Simon, í be nte xanula ba xa tanbi ɲinnu xan?» A xo: «Iyo Marigi, í x'a lon xo nte b'é xanula.» Isa xo a ɲen xo: «Ń na saaxandinŋolu negaani.» 16Isa xo a ɲen sinɲa fulananŋo to xo: «Yaya dinxe Simon, í be nte xanula ba?» Piyere x'a jaabi xo: «Iyo Marigi, í x'a lon xo ń b'é xanula.» Isa xo a ɲen xo: «Ń na saaxolu korosi.» 17Isa xo a ɲen sinɲa sabananŋo to xo: «Yaya dinxe Simon, í be nte xanula ba?» Piyere juso xasita bawo Isa x'a ŋininxa í xo sinɲa saba nin a b'a xanula. A xo: «Marigi, í xa fen bee lon. Í x'a lon xo nte b'é xanula.» Isa xo a ɲen xo: «Ń na saaxolu negaani. 18Tonɲa tonɲa, ń b'a fola í ɲen xo, x'é xamarindinma tu, í fan tun si í te siti, xa taxa í diyanɲedula. Bari nin í xotota, í s'í bulolu xotota, do xote s'í te siti, xa taxa í ti dula, dula men man di í ɲen.» 19Piyere be nala sala ɲa men, xa bunɲa la Ala toxo xan, Isa xa wo le yita wo xumolu la. Wo xo, a xo Piyere ɲen xo: «A lo ń nofe.» 20Piyere x'é yelema, Isa xa xarandinŋo men xanu, a xa wo nato je i nofe. Wo xarandinŋo le tun x'é jenge Isa mafan, x'e tu siimandomo la, x'a ŋininxa xo: «Marigi, jon be nala í dunna bulo to?» 21Piyere xa wo xarandinŋo je tumo men, a xo: «Marigi, mun si ke ɲin dun ɲen?» 22Isa xo a ɲen xo: «Nin a xa di ń ɲen, a nilama si tu fo nte xa na tumo men, ite la mun be wo to? Ite x'a lo ń nofe doron.» 23Wo xumo jenjenta badin lannayabaxolu to, xo wo xarandinŋo nte sala. Tonɲa la, Isa tun man a fo a ɲen xo a nte sala. Bari a xo le: «Nin a xa di ń ɲen, a nilama si tu fo nte xa na tumo men. Ite la mun be wo to?» 24Wo xarandinŋo le xa wo kuwolu seedeya x'e safe. N x'a lon, xo a la seedeya mu tonɲa le ti. 25Isa xa ku kiika xotelu ke, nin wo tunnu bee safeta, ń na miiro to, xo wo bukkolu bee tun me kun no duniya xono.

will be added

X\