YAY 20

1Alahado, saxo ma junna, jannin keneya xa bo, Magidala Mariyama taxata xaburo da la. A x'a je xo kuro men tun be xaburo dataxunnin, wo bota je. 2A x'é bori xa taxa Simon Piyere bata, anin Isa tun xa xarandinŋo men xanu. A xo wolu ɲen xo: «I xa Marigi fure labo xaburo xono. N man a lon i x'a bula dula men.» 3Wo to, Piyere nin wo xarandinŋo bota, xa taxa xaburuda la. 4I fulo tun b'e borila i ɲoxo fe taxanin. Bari xarandin do x'é bori xa Piyere dan. Wo folo sita xaburuda la. 5A sininma, a x'é majigi xa xaburo xono mafele, a xa kasanke je dugo ma, bari a man dun xaburo xono. 6Wo xo, Simon Piyere du sita, ate dunta xaburo xono, xa kasanke je bulanin dugo ma, 7anin faano, men tun keta Isa kunŋo la. Wo kunnafaano nin kasanke tun nte dula kilin. Bari wo tun be xutunin xa bula a dan na. 8Wo xo le mu, xarandinŋo men tun folo sita, wo du dunta xaburo xono. A ɲa xa wo fenŋolu je, a xa lannaya ke. 9Kitaabo xa men yita, xo Isa xa xan xa kuni xa bo furelu to, i tunnu man wo faamu folo. 10Wo xo, xarandinŋolu x'e koppa xa taxa i bata. 11Mariyama ken tun be lonin keno ma, xaburo senbo to. A tun be xasila. X'a tu xaso la, a x'é majigi xa xaburo xono mafele. 12A xa meleke fula je, faanu xoyo b'e ma. Wolu tunnu be siginin Isa fure ladula, do b'a kunmafanŋo, do b'a sinmafanŋo. 13Melekiyolu xo Mariyama ɲen xo: «Muso, í be mun xasila?» A x'e jaabi xo: «Bawo i xa ń Marigi fure ta. Ń man a lon i x'a bula dula men.» 14A xa wo fo tumo men, a x'é yelema, a xa Isa je lonin. Bari a tun man a lon xo Isa le mu. 15Isa xo a ɲen xo: «Í be mun xasila? Í be jon ŋininna?» A tun be Mariyama ɲen xo yirifuuto xono baarabaxo le mu. A xo: «Jatigixe, nin í le x'a ta, í x'a bula dula men, wo fo ń ɲen, ń xa taxa a ta.» 16Isa xo a ɲen xo: «Mariyama!» Mariyama x'é yelema a mafan x'a fo a ɲen heburuxanŋo to xo: «Rabuni!» Wo xoto xo: «Karanmoxo.» 17Isa xo a ɲen xo: «Ń bula, bawo ń man yele xa taxa ń Fa bata folo. Taxa ń badinŋolu bata í x'a fo i ɲen xo: Ń be yelela xa taxa ń Fa nin alu Fa bata, ń na Ala nin alu la Ala bata.» 18Magidala Mariyama taxata a fo xarandinŋolu ɲen, xo a xa Marigi je. Isa xa xumo mennu fo a ɲen, a xa wolu laxali i ɲen. 19Wo lunŋo, alahado wura la, xarandinŋolu kamarininŋo tun be bunŋo do xono, wolu xa bundalu soxo i da la, bawo i tunnu be silanin Yahudiyalu la ɲamoxolu ɲa. Isa nata x'é lo i temo to, x'a fo i ɲen xo: «Heero xa ke alu fe.» 20A xa wo fo tumo men, a x'a bulolu nin a baraso yita i la. Xarandinŋolu xa Marigi je tumo men, i ɲaɲabeteta. 21Isa xo i ɲen tugun xo: «Heero xa ke alu fe! Fa Ala xa ń ki ɲa men, nte du be atelu kila ten.» 22Wo xumolu xo, a x'e fuute, x'a fo i ɲen xo: «Alu Ni Senunŋo muta. 23Alu je moxo wo moxo la junubolu yaafa, yaafo si ke wo ma. Alu man moxo wo moxo la junubolu yaafa, wo la junubolu me yaafa.» 24Isa nata a la xarandinŋolu ma tumo men, wo x'a tara a la xarandinŋolu to do, xo Tomasi, men kilita xo Fune, wo tun nte je wo tumo. 25Xarandin tolu xo a ɲen xo: «Ntelu xa Marigi je.» A xo i ɲen xo: «Nin ń man pontidalu je a bulutego to, xa ń buluxonondinŋo dun wo pontidalu wuwo la, xa ń bulo la a barasa soxoninŋo ma, ń me la a la abada.» 26Wo xo tili sagi, Isa la xarandinŋolu tunnu be bunŋo xono tugun. Tomasi du tun be je. Da tunnu be soxonin. Isa nata x'e lo i temo to. A xo i ɲen xo: «Heero xa ke alu fe.» 27Wo keninma, a xo Tomasi ɲen xo: «Í buluxonondinŋo dun jan, ń bulutegolu mafele, í bulo tosaba x'a la ń baraso ma. Fata lannayabaliya ma, xa lannaya ke.» 28Tomasi x'a jaabi xo: «Ń Marigi nin ń na Ala.» 29Isa xo a ɲen xo: «Bawo í xa ń je, í xa lannaya ke! Mennu be lannaya kela x'a tara i ɲa man la ń xan, heero be wolu ɲen!» 30Isa xa taagumanseede kiika xotelu ke a la xarandinŋolu ɲala, mennu man safe ɲin bukke in xono. 31Ɲinnu safeta le, walasa alu xa la a la xo Isa le mu Kirisita ti, Ala Dinxe; anin walasa alu xa nilamaya soto a toxo barako to, wo lannaya xanma.

will be added

X\