YAY 2

1Wo xo tili fula, maaɲoya keta Galile gallo do to, xo Kana. Isa na tun be wo maaɲoya to. 2I xa Isa du nin a la xarandinŋolu kili wo maaɲoya to. 3Awa dolo nata dasa. Isa na woman in xo a ɲen xo: «Doli nt'e bulu tugun.» 4Isa x'a jaabi xo: «Muso, í b'a fe ń xa mun ke? Ń na waxato man si folo.» 5A na woman in xo baaradinŋolu ɲen xo: «A je fen wo fen fo alu ɲen, alu a ke ten.» 6Kurudaxa wooro tun be je Yahudiyalu la fansenuya xanma Ala ɲa xoto. Jibifeba ɲa luulu fo wooro tun si ke wo daxolu kilin wo kilin xono. 7Isa xo baaradinŋolu ɲen xo i xa wo daxolu lafa jiyo la. Wolu x'e lafa, x'e ben i da ma. 8A xo i ɲen xo: «Alu do ta silan, xa taxa a di domoliɲabobaxo ma.» I taxata do di a ma. 9Wo x'a nene, a x'a tara a yelemata dolo ti. A man a lon, wo dolo bota dula men. Baaradinŋo mennu xa jiyo ta, wolu xa wo bodula lon. Domoliɲabobaxo xa maaɲoxe kili. 10A xo: «Moxo bee be folola le xa dolo dimanŋo di moxolu ma. Nin i x'e fa wo la, wo xo, men man di bete, a si laban xa wo di. Ite dun xa dolo dimanŋo lamara fo saasa?» 11Awa wo le keta Isa la kawaku folo ti, Galile Kana. A x'a la nooro yita. A la xarandinŋolu lata a la. 12Wo xo, Isa taxata Kaperenahun gallo to, a nin a na nin a badinxelu nin a la xarandinŋolu. I xa tili dantalu ke je. 13Yahudiyalu la Tanbinxansallo sutiyaninma, Isa taxata Yerusaleme. 14A xa moxo dolu tara Alabatusuba xono, i be tuuralu nin saaxolu nin jenetubanŋolu fiirila. Xaalisifalinnalu du tunnu be siginin je. 15A xa julukeso ta xa buso dara, x'e bee labo Alabatusuba xono, i nin i la saaxolu nin i la tuuralu. A xa xaalisifalinnalu la tabalolu kundinmayelema, x'e la xaalisolu jenjen. 16A xo jenetuban fiirilalu ɲen xo: «Alu ɲinnu bee bo jan. Alu xana ń Fa la luwo ke fiirikedula ti.» 17A la xarandinŋolu hakilo jigita Kitaabo la ɲin xuma innu la xo: «Í la luwo kuwo hanmo be nte la, fo a be ń janila í xo ta.» 18Wo keninma, Yahudiyalu la ɲamoxolu xa Isa ŋininxa xo: «Í be taagumanseede joman yitala, men s'a laxoyiya n ma, xo yanmaruya b'é bulu xa ɲin ke?» 19Isa x'e jaabi xo: «Alu ɲin Alabatusuba in te. Ń s'a tolo tili saba xono.» 20Yahudiyalu la ɲamoxolu xo a ɲen xo: «Í xo di? Tan naani nin san wooro le keta ɲin Alabatusuba in lo la. Ite xo x'é si wo le tolo tili saba xono?» 21Bari Isa tun be Alabatusuba men ma, wo mu a fan balo le ti. 22Isa kunita xa bo furelu to tumo men, a la xarandinŋolu hakilo jigita a la wo xumo kun. I lata Kitaabo xumolu la, xa la Isa du xumaxanŋo la. 23Xa Isa tu Tanbinxansallo to Yerusaleme, moxo kiika lata a la, bawo i tunnu ɲa b'a la a be taagumanseedolu kela. 24Bari Isa tun man la i la, bawo a tun x'e bee xonokuwo lon. 25A haaju tun nt'a la, moxo xa moxo la ɲa fo a ɲen, bawo men be moxo xono, a fan tun xa wo lon.

will be added

X\