YAY 19

1Wo tumo, Pilate x'e bula Isa mutala, x'a xosi gaɲo la. 2Sorodasolu xa mansakufuno dara ŋaninŋo la, x'a ke a kunŋo la, xa mansadoroke wulenŋo dun a xanna. 3I x'e sodun a la, x'a fo xo: «Yahudiyalu la mansaxe, í nin sege!» I x'a te a ɲa xan. 4Pilate bota tugun keno ma, x'a fo Yahudiyalu ɲen xo: «Ń fele a labola keno ma alu ɲen, walasa alu x'a lon xo nte man jalagikun si soto ɲin xe in na.» 5Isa bota keno ma, a nin ŋaninkufuno nin mansadoroke wulenŋo. Pilate xo i ɲen xo: «Xe fele.» 6Sadaxalasibaxa kuntigolu nin garadolu x'a je tumo men, i fetenta xo: «A gengen yiro ma, a gengen yiro ma!» Pilate xo i ɲen xo: «Alu fannu x'a muta, x'a gengen yiro ma, bawo nte man jalagikun si je a ma.» 7Yahudiyalu x'a jaabi xo: «Sariya do be n bulu. Wo sariya la, a xa xan xa faxa, bawo a x'a fan ke Ala Dinxe ti.» 8Pilate xa wo me tumo men, do kafuta a la silanɲa ma tugun. 9A nin Isa dunta a la xube xono tugun, a xo Isa ɲen xo: «Í bota dula joman?» Isa man jaabi fusi di a ma. 10Wo to, Pilate xo a ɲen xo: «Í be í dela nte le la ba? Í man a lon ba xo a sinŋo be nte ɲen x'é bula, walla x'é gengen yiro ma?» 11Isa x'a jaabi xo: «Í tun me sin fusi soto nte xan nin a tun man di í ma xa bo sanŋo to. Wo le x'a tu, men xa ń dun í bulu, wo la junubo xa bun ite ta ti.» 12Kabirin wo tumo, Pilate x'a ŋinin xa Isa bula. Bari Yahudiyalu fetenta xo: «Nin í x'a bula, í nte Rome mansaxe xanunte ti. Bawo moxo men b'a fan kela mansaxe ti, wo mu mansaxe jaxo le ti.» 13Pilate xa wo xumolu lame tumo men, a xa Isa labo keno ma. Dula do tun be je, men dugumala be dalaxaaɲannin kuro la. Wo dula toxo heburuxanŋo to xo «Gabata». Pilate nata í sigi kiititegesigilanŋo xan non. 14Wo keta tilinkunte waxato, Tanbinxansallo tobenlunŋo. Pilate xo Yahudiyalu ɲen xo: «Alu la mansaxe fele.» 15Yahudiyalu fetenta xo: «A faxa! A faxa! A gengen yiro ma!» Pilate xo i ɲen xo: «Nte x'alu la mansaxe gengen yiro ma ba?» Sadaxalasibaxa kuntigolu xo: «Mansaxe xote nte ntelu kun nin Rome mansaxe nte.» 16Wo to, Pilate x'a dun i bulu, i x'a gengen yiro ma. I xa Isa muta xa taxa a ti. 17Isa fan x'a gengenyiro ta, xa na si dula do, men toxo xo «Kunxuludula». Non be kilila heburuxanŋo to xo «Goligota». 18Sorodasolu x'a gengen yiro ma non. I xa moxo fula xote dulu gengen yirolu ma je. Kilin gengenta a kininŋo, do gengenta a numanŋo, Isa be i temo to. 19Pilate xa safelo do ke, x'a noto Isa gengenyiro ma, a kunnamato. A xa men safe, wo fele xo: «Nasareti Isa, Yahudiyalu la mansaxe.» 20Yahudiyalu kiika xa wo safelo xaran, bawo i xa Isa gengen yiro ma dula men, non tun xa sutu gallo la. Wo safelo tun be heburuxanŋo nin latenxanŋo nin gerekixanŋo to. 21Yahudiyalu la sadaxalasibaxa kuntigolu xo Pilate ɲen xo: «Í tun man xan x'a safe xo: “Yahudiyalu la mansaxe”. Bari í xa xan x'a safe xo: “A xo, xo ate mu Yahudiyalu la mansaxe le ti.” » 22Pilate x'e jaabi xo: «Ń xa men safe, ń xa wo safe le!» 23Sorodasolu xa Isa gengen tumo men xa ban, i x'a la faanolu ta x'e tala naani ti, xa tala kilin di sorodasolu kilin wo kilin ma. I x'a la dorokexotobulo ta, xaralisila si tun nte wo la. Faanuxono kilin doron ne tun mu, x'a ta a sanŋo to, fo x'a bula a xoto la. 24Sorodasolu xo i ɲoxo ɲen xo: «Alan xana a tofara, bari alan xa dokkolo ke, x'a lon, a si ke men ta ti.» Wo ɲa ma, Kitaabo tun xa men fo xo: «I xa ń na faanolu tala i ɲoxo te, xa dokkolo ke ń na dorokexotobulo xanma,» wo keta. Sorodasolu xa men ke, wo le fele. 25Isa na nin a na badinmuso, anin Kulopasi musu Mariyama, nin Magidala Mariyama tunnu be lonin Isa gengenyiro senbo to. 26Isa x'a na je, anin a xa xarandinŋo je lonin a na senbo to, a xa wo men xanu. A xo a na ɲen xo: «Ń na, í dinŋo fele.» 27Wo xo, a xo wo xarandinŋo du ɲen xo: «Í na fele.» Kabirin wo waxato, wo xarandinŋo taxata Isa na ti a bata. 28Wo xo, Isa x'a lon xo kuwo bee keta xa ban tumo men, a xo: «Mindoxo be ń na.» Wo ɲa ma, Kitaabo tun xa men fo, wo keta. 29Miranŋo do tun be je, wo be fanin binegaro la. Sorodasolu xa fuulanŋo bula wo binegaro to, x'a siti hisope yiribulo kunŋo la, x'a lasi Isa da ma. 30Isa xa binegaro min tumo men, a xo: «Kuwo bee dafata.» Wo xo, a x'a kunŋo lajigi, a niyo bota. 31Tanbinxansallo tobenlunŋo le tun mu. Yahudiyalu la ɲamoxolu tunnu nt'a fe furelu xa tu gengennin yiro xan tofoɲolunŋo, bawo wo tofoɲolunŋo tun mu lunba le ti. Wo la, i x'a ŋinin Pilate la, xo moxo gengenninŋolu sinxalolu xa xati, nin i si sa tariya x'e fure lajigi. 32Sorodasolu nata xa si Isa gengenɲoxo folo ma, xa wo sinxalolu xati, i sita do du ma, xa wo talu xati. 33I sininma Isa ma, i x'a je xo a sata xa ban. Wo to, i man a sinxalolu xati. 34Sorodaso do x'a soxo a baraso xan a la tanbo la. Wo no bee to, jelo nin jiyo bota. 35Moxo men xa ɲin ku innu laxali, wo fan ne x'a je a ɲa la. A xa men je x'a seedeya, wo mu tonɲa le ti. A fan x'a lon xo a be tonɲa le fola. A b'a fola le walasa alu dulu xa lannaya ke. 36Wo ɲa ma, Kitaabo tun xa ɲin xumaxan in men fo xo: «A xulolu si me xati», wo keta. 37Kitaabo dula xote b'a fola xo: «I xa men soxo, i ɲa si wo je.» 38Wo xo, Arimate Yusufu x'a ŋinin Pilate la, xo a xa Isa fure di a ma. Yusufu tun mu Isa la xarandinŋo do le ti. Bari Yahudiyalu la ɲamoxolu ɲasilanɲa bulu, a xa wo dugu. Pilate sonta. Yusufu nata, xa Isa fure ta. 39Nikodeme men tun taxata Isa bata suwo to, wo du nata a nin mire nin alowesi tulu sumadiman ɲaxamininŋo tan saba kilo ɲoxon ti. 40Wo moxo fulo xa Isa fure ta, x'a kasanke, xa wo tulu sumadimanŋolu ke a ma, í xo Yahudiyalu la furetobenɲa be kela ɲa men. 41Isa gengenta dula men, yirifuuto do tun be non, xaburu kuto tun be non, moxo bada man nasi non folo. 42I xa Isa lala non, bawo Yahudiyalu la tofoɲolunŋo tobenlunŋo le tun mu, anin du, wo xaburo tun xa sutu je la.

will be added

X\