1 Isa x'é soto wo xumolu la tumo men, a nin a la xarandinŋolu wulita xa taxa Sedoron xo boxo do. Yirifuuto do tun be non, a nin a la xarandinŋolu dunta wo xono. 2 Yudasi men be nala a dunna bulo to, wo tun xa wo dula lon, bawo Isa nin a la xarandinŋolu dalita kela je kiika ti. 3 Yudasi nata yirifuuto to, a nin sorodasolu nin garadolu, sadaxalasibaxa kuntigolu nin Farisiyalu xa mennu ki. I nin maramafenŋolu nin lanpolu nin mooɲolu nata. 4 Kuwo fen wo fen tun xa xan xa ke Isa la, a fan tun xa wo bee lon. Wo to, a taxata i kunben, x'e ŋininxa xo: «Alu be jon ŋininna?» 5 I xo: «Nasareti Isa.» A xo i ɲen xo: «Nte le mu!» Yudasi men b'a dunna bulo to, wo tun b'e to. 6 Isa xo i ɲen tumo men xo: «Nte le mu», i x'e koppa i xo la, xa boyi dugo ma. 7 Isa x'e ŋininxa tugun xo: «Alu be jon ŋininna?» I xo: «Nasareti Isa.» 8 Isa x'e jaabi xo: «Ń x'a fo alu ɲen xo nte le mu. Nin alu be nte le ŋininna, alu ń nofemoxolu bula i xa taxa.» 9 Isa xa wo xumo fo, walasa a tun xa ɲin xuma in men fo xa dafa xo: «Ń Fa, í xa mennu di ń ma, i fen man sanko ń kun.» 10 Fanŋo tun be Simon Piyere bulu, a x'a boosi, xa sadaxalasibaxa kuntigiba la jonxe kininbulu tulo carun. Wo jonxe toxo xo Malikusi. 11 Isa xo Piyere ɲen xo: «Í la fanŋo bula a la to. Wo tuma, Fa Ala xa tooro jipoto men di nte ma, nte man xan xa son wo to ba?» 12 Wo to, sorodasi kuntigo nin a la sorodasi jama nin Yahudiyalu la garadolu xa Isa muta, x'a bulolu siti, 13 xa taxa a ti Ane bata folo. Ane mu Kayife bitanxe le ti, wo le tun mu sadaxalasibaxa kuntigiba ti wo san. 14 Kayife le tun xa Yahudiyalu la ɲamoxolu tonben ten xo: «A xa fisa moxo kilin xa sa jamanadinŋolu bee ɲen.» 15 Simon Piyere nin Isa la xarandin xote x'a lo a nofe taxanin. Wo xarandinŋo tun mu sadaxalasibaxa kuntigiba lonbaxo le ti. Wo le x'a tu wo dunta Isa nofe sadaxalasibaxa kuntigiba la luwo ma. 16 Bari Piyere tuta lonin da la, banto to. Xarandinŋo men tun mu sadaxalasibaxa kuntigiba lonbaxo ti, wo bota xa xuma muso ɲen, men be da korosila. A x'a tu Piyere xa dun luwo xono. 17 Wo to, baaradinmuso men tun be da korosila, wo xo Piyere ɲen xo: «Ite du nte ɲin xe in na xarandinŋo do le ti ba?» Piyere xo: «Nte nt'a la xarandin ti de!» 18 Jonŋolu nin garado men tunnu be je, wolu xa ta bula x'e ja, bawo neno tun b'a to. Piyere tun b'e bata. A du tun b'é jala. 19 Sadaxalasibaxa kuntigiba xa Isa ŋininxa a la xarandinŋolu la kuwo nin a la xaranŋo kuwo la. 20 Isa x'a jaabi xo: «Nte xumata moxolu bee ɲen keno la. Tuma bee ń xa moxolu laxaran Alabatusuwolu nin Alabatusuba xono, Yahudiyalu bee be kamarila dula mennu. Nte man fusi fo duguwo to. 21 Mun na í be nte ŋininxala? Ń xumata mennu ɲala, wolu ŋininxa. Ń xa men fo, wolu xa wo lon bete.» 22 Wo xumolu xan, garadolu to do, men tun be je, xa Isa te a ɲa xan, x'a fo xo: «Í be sadaxalasibaxa kuntigiba jaabila ten ne ba?» 23 Isa x'a jaabi xo: «Nin ń xa xuma jaxo le fo, wo yita. Nin ń dun man xuma jaxu fo, mun na í be ń lippala?» 24 Wo tumo la, Ane xa Isa bulolu sitininŋo bula, xa taxa sadaxalasibaxa kuntigiba Kayife bata. 25 Simon Piyere tun be non, a b'é jala. Dolu x'a ŋininxa xo: «Ite du nt'a la xarandinŋo do le ti?» A x'é xaro a la, a xo: «Nte nt'a la xarandin ti de!» 26 Sadaxalasibaxa kuntigiba la jonxe do, Piyere xa men tulo tege, wo badinxe xo Piyere ɲen xo: «Nte man í nin xe in je yirifuuto to ba?» 27 Piyere x'é xaro a la tugun. Wo no bee to, duntunŋo do kokorita. 28 Wo xo, Yahudiyalu la ɲamoxolu nin Isa bota Kayife bata, xa taxa a ti goferenere la xube la. Wo keta saxo ma junna. I fannu man dun luwo xono, bawo i tunnu nt'a fe xa noxo, men tun s'i bali xa Tanbinxansallo domolo ke. 29 Goferenere Pilate bota, xa si i ma. A xo: «Alu be ɲin xe in jalagila kun joman na?» 30 I x'a jaabi xo: «Nin kujaxukela tun nte, n tunnu me a dun í bulu.» 31 Wo to, Pilate xo i ɲen xo: «Alu fannu x'a muta, xa kiito tege a xan, alu la sariya la.» Yahudiyalu la ɲamoxolu xo a ɲen xo: «A nte dagenin ntelu ɲen xa moxo si faxa.» 32 Wo ɲa ma, Isa tun xa men fo x'a la saya keɲa yita, wo keta. 33 Pilate dunta xube xono, xa Isa kili x'a ŋininxa. A xo: «Í mu Yahudiyalu la mansaxe le ti ba?» 34 Isa x'a jaabi xo: «Wo mu í fan na miiriya ti ba, walla do xotelu xa wo fo nte ma í ɲen?» 35 Pilate x'a jaabi xo: «Nte mu Yahudiya le ti ba? Í fan na siya moxolu nin sadaxalasibaxa kuntigolu x'é dun nte bulu. Í xa mun ne ke?» 36 Isa x'a jaabi xo: «Nte la mansaya nte ɲin duniya in ku ti. Nin ń na mansaya tun mu ɲin duniya in ku ti, ń na moxo tunnu si kelo ke, walasa ń xana dun Yahudiyalu la ɲamoxolu bulu. Bari saasa, nte la mansaya nte ɲin duniya in ku ti.» 37 Pilate xo a ɲen xo: «Wo to, í mu mansaxe le ti ba?» Isa xo: «Í x'a fo ɲa men, a be ten. Ń mu mansaxe le ti. Ń nata wulu duniya to men xanma, wo mu le, xa na tonɲa yita moxolu la. Moxo wo moxo be tonɲa fe, wo si ń name.» 38 Pilate xo a ɲen xo: «Tonɲa mu mun ne ti?» A xa wo xumo fo tumo men, a bota tugun xa taxa Yahudiyalu la ɲamoxolu bata keno ma. A xo i ɲen xo: «Nte man jalagikun si je ɲin xe in ma. 39 Bari x'a la alu la laado xan, san wo san Tanbinxansallo to, ń si kasolamoxo kilin bula alu ɲen. Alu b'a fe ba, ń xa Yahudiyalu la mansaxe bula alu ɲen?» 40 Wo to, Yahudiyalu fetenta tugun x'a fo xo: «Ayi! Barabasi le be bulala.» Barabasi tun mu boyinxannila le ti.
