YAY 17

1Isa xa wo xumolu fo tumo men, a x'a ɲalu xotota sanŋo to, xa Ala matara xo: «Ń Fa, waxato sita. Í Dinxe la nooro yita, walasa ate du xa ite la nooro yita. 2Í xa fango di a ma hadamadinŋolu bee xan, walasa í xa moxo mennu di a ma, a xa nilamaya banbalo di wolu bee ma. 3Ite men kilinpe mu Ala soobe ti, nin i xa ite lon, xa Isa Kirisita lon, í xa wo men ki, wo le mu nilamaya banbalo ti. 4Ń xa bunɲa la í xan xa ń tu duguxulo xan; í xa baaro men dun ń bulu, ń xa wo dafa. 5Saasa, ń Fa, bunɲa la ń xan í fan bata, bunɲa men tun be ń xan í bata jannin duniya xa da. 6«I xa moxolu mennu fata duniya moxolu ma, x'e dun ń bulu, nte xa í toxo yita wolu la. I tunnu mu ite le ta ti, í x'e di nte ma, i x'é la xumo muta. 7Saasa i x'a lon, xo í xa fen wo fen di nte ma, wolu bee bota ite le to. 8Bawo í xa xumo mennu dun ń da, ń xa wolu lasi i ma. I xa wo xumolu muta. I x'a lon tonɲa la, xo ń bota ite le to. I lata a la du xo ite le xa ń ki. 9«Ń b'é tarala ite lelu ɲen. Ń nt'é tarala duniya ɲen. Í xa mennu di ń ma, ń b'é tarala wo lelu ɲen; bawo ite le talu mu. 10Fen wo fen mu nte ta ti, wo bee mu ite ta le ti. Ite ta du bee mu nte ta le ti. I la kuwo x'a tu, nte la bunɲa lonta. 11Nte nte tula duniya xono tugun, bari itelu be duniya xono; nte be taxala ite bata. Ń Fa, ite men xa senu, i lakanta í toxo barako to, wo toxo men, nin í x'a di nte ma; walasa i xa ke kilin ti, í xo nte nin ite mu kilin ti ɲa men. 12Xa nte nin i tu i ɲoxo xan, nte x'e lakanta í toxo barako to, í xa wo toxo men di nte ma. Nte x'e lakanta, i fen man halagi, fo halagibaxato kilin doron, men na kuwo safeta Kitaabo xono. Wo ɲa ma, wo xumo dafata. 13Saasa nte be taxala í bata. Ń be ɲin xuma innu fola xa ń tu duniya xono, walasa i xa nte la ɲaxalo soto, ɲaxalo men be dafanin. 14Ń x'é la xumo lasi i ma. Wo xanma, duniya x'e jaxuya, bawo i nte duniya ta ti, í xo nte nte duniya ta ti ɲa men. 15Ń nt'é tarala xo í x'e labo duniya xono. Ń b'é tarala le xo í x'e kisi Jaxumanŋo ma. 16Duniya talu nte, í xo nte nte duniya ta ti ɲa men. 17I senuya tonɲa la. Í la xumo le mu tonɲa ti. 18Í xa nte ki duniya xono ɲa men, nte du xa itelu ki duniya xono wo ɲa ma. 19Nte xa ń fan di ite ma wolu ɲen, xa ke ite kilinpe ta ti, walasa i dulu xa i fannu di ite ma xa ke ite kilinpe ta ti, tonɲa la. 20«Ń nte í tarala itelu doronnu ɲen. Men dulu be nala lala ń na i la xumolu xanma, ń b'é tarala wo dulu ɲen; 21walasa, ń Fa, i bee xa ke kilin ti, í xo nte nin ite mu kilin ti ɲa men, wolu dulu nin ntelu xa ke kilin ti, walasa duniya xa la a la, xo ite xa nte ki. 22Í xa bunɲa men di nte ma, nte xa wo d'i ma, walasa i xa ke kilin ti, í xo ntelu mu kilin ti ɲa men. 23Nte nin itelu kafuta xa ke kilin ti ɲa men, anin ite nin nte be kafunin xa ke kilin ti ɲa men, a ke xo wo dulu xa kafu xa ke kilin ti, i la kilinɲa xa dafa. Nin wo keta, duniya s'a lon xo ite le xa ń ki, anin xo í x'e xanu, í xo í xa nte xanu ɲa men. 24«Ń Fa, í xa mennu di ń ma, nte be dula men, ń b'a fe i dulu xa ke ń bata non, walasa í xa nooro men di ń ma, i xa wo je; bawo í xa nte xanu jannin duniya xa da. 25Ń Fa, ite men be tilinnin, duniya man í lon, bari nte x'é lon, ɲin dulu x'a lon, xo ite xa ń ki. 26Ń x'é toxo yita i la, walasa i x'é lon. Ń s'a yita i la tugun, walasa í xa nte xanu xanuya men na, wo xanuya xa ke i la, anin nte du xa ke i la.»

will be added

X\