YAY 16

1«Ń xa ɲin fen innu fo alu ɲen walasa nin i sita, alu la lannaya xana tiɲa. 2I si alu xoyi Alabatusuwolu xono. Waxato do fan si na, moxo men je alu faxa, a si ke wo tigo ɲen xo a janxa baaro le ke Ala ɲen ten. 3I si wo kuwolu ke alu la, bawo i man Fa Ala lon, i man nte du lon. 4Bari nin ń xa ɲin ku innu fo alu ɲen, ń x'a ke le, walasa nin i waxato sita, alu hakilo xa jigi a la xo nte xa wolu fo alu ɲen.» Kabirin folofolo, nte tun man i fo alu ɲen, bawo ń nin alu b'e ɲoxo xan. 5Bari saasa, ń be taxala ń kibaxo bata. Alu to moxo si man soto xa ń ŋininxa xo: “Í be taxala min?” 6Alu juso xasita fo xa danmatanbi, bawo ń xa wo fo alu ɲen. 7A dun, xa tonɲa fo alu ɲen, a xa fisa alu ma nte xa taxa; bawo nin nte man taxa, Deemabaxo me na alu bata. Bari nin ń taxata, ń s'a ki alu ma. 8Nin a nata, a si duniya moxolu la filo yita: Junubo kuwo to, Ala la tilinninɲa kuwo to, anin Ala la kiito kuwo to. 9I filita junubo kuwo to; bawo i man la nte la. 10I filita Ala la tilinninɲa kuwo to; bawo nte be taxala Fa Ala bata, anin x'alu me nte je tugun. 11I filita Ala la kiito kuwo to; bawo kiito tegeta ɲin duniya in kuntigo xan xa ban. 12«Xuma kiika be ń ma x'a fo alu ɲen, bari alu me wolu bee muɲa no saasa. 13Nin tonɲa Niyo nata tumo men, a si tonɲa muume bee lasi alu ma. Bawo a la xumolu nte bola a fan to. Bari a je fen wo fen me, a si wo lasi alu ma, xa ku natalu fo alu ɲen. 14A si nte la nooro yita, bawo xumo men be nte kun, a si wo soto, x'a lasi alu ma. 15Fen wo fen be Fa Ala kun, nte ta le mu wo bee ti. Wo le x'a tu, ń x'a fo xo a si nte talu ta, x'e lasi alu ma.» 16«Dondin dondin, alu me ń je tugun. Wo xo dondin, alu si ń je tugun.» 17Wo to, a la xarandinŋo dolu xo i ɲoxo ɲen xo: «A la ɲin xuma in xoto mu mun ti xo: “Dondin dondin, alu me ń je tugun, wo xo dondin, alu si ń je tugun,” anin xo: “Ń be taxala Fa Ala bata?” 18“Dondin dondin!” Wo xoto mu mun ti? N man a la ɲin xuma in xoto lon de.» 19Isa x'a lon, xo i b'a fe x'a ŋininxa. A xo i ɲen xo: «Nte xa men fo alu ɲen xo: “Dondin dondin, alu me ń je tugun, wo xo dondin, alu si ń je tugun”, alu be i ɲoxo toŋininxala wo le ma ba? 20Tonɲa tonɲa, ń b'a fola alu ɲen xo: Alu si xasi, xa maɲumatoxanŋolu fo, duniya si ɲaxali. Alu si nitokuwa, bari alu la nitokuwa si laban xa ke ɲaɲo ti. 21Muso tinto si nitokuwa, bawo tinŋo waxato sita. Bari nin a x'a dinŋo wulu tumo men, a hakilo nt'a la tooro la tugun, bawo a si ɲaxali xo moxo do bangeta duniya xono. 22Atelu dulu fele nitokuwala saasa. Bari ń si alu je tugun, alu si ɲaɲa. Moxo si me alu bo no wo ɲaɲo xono. 23Wo lunŋo, alu me nte ŋininxa fusi la tugun. Tonɲa tonɲa, ń b'a fola alu ɲen xo: Alu je fen wo fen tara Fa Ala la nte toxo la, a si wo di alu ma. 24Haalibi alu man fusi tara nte toxo la. Alu taralo ke, alu si soto ke, walasa alu la ɲaɲo xa dafa.» 25«Ń xumata alu ɲen ɲin ku innu xan taliyolu la. Bari waxato be nanin, nte me xuma alu ɲen tali la tugun, bari ń si xuma, xa Fa Ala la kuwo xoyiya alu ɲen. 26Wo lunŋo, alu si Fa Ala matara nte toxo la. Ń me a fo wo lunŋo xo nte si Fa Ala matara alu ɲen. 27Bawo Fa Ala fan be alu xanula x'a la a xan, alu be nte xanula, anin alu lata a la xo nte bota Ala le to. 28Ń bota Fa Ala bata xa na duniya to. Saasa ń be bola duniya to xa taxa Fa Ala bata.» 29A la xarandinŋolu xo a ɲen xo: «Saasa í be xumala n ɲen x'a xoyiya. Í nte xumala tali si to tugun. 30Saasa n x'a lon, xo í xa fen bee lon. Moxolu b'a fe x'é ŋininxa fen fen na, í xa wolu bee lon xa ban. Wo le x'a tu, n lata a la, xo í bota Ala to.» 31Isa x'e jaabi xo: «Alu xa lannaya ke saasa ba? 32A fele, waxato be nala, a sita xa ban, alu si jenjen, bee si taxa í ta boxo, xa ń kilin tu. Bari ń kilin nte tula de! Bawo ń nin Fa Ala le mu. 33Ń xa ɲinnu fo alu ɲen, walasa alu xa heero soto nte kafuɲoxoya fe. Alu si tooro soto duniya to, bari alu i jija, nte sinta le duniya la.»

will be added

X\