YAY 15

1Isa xo: «Nte le mu resenju soobe ti. Ń Fa mu a senebaxo ti. 2Bulu wo bulu be nte la, nin a nt'é dinna, a si wo tege. Bulu wo bulu be dinŋo kela, a si wo kunnakutun, walasa a xa dinŋo kiika ke, xa tanbi folo xan. 3Ń xa xumo men fo alu ɲen, wo xanma, alu senuyata xa ban. 4Alu tu nte la, nte xa tu alu la. Resenbulo gansanŋo me dinŋo ke no nin a nte a juwo la. Wo be ɲa men de, nin alu dulu man tu nte la, alu me í din no. 5«Nte le mu resenjuwo ti, atelu mu a bulolu ti. Men je tu nte la, nte xa tu a la, wo s'í din bete, bawo nin nte nte, alu me fusi ke no. 6Men man tu nte la, wo si fili banto to. A si ke í xo yiribulo mennu tegeta xa bo resenjuwo la. A si ja, xa kamari x'a fili ta to, x'a jani. 7Nin alu tuta nte la, anin nte la xumaxanŋolu xa tu alu xono, fen wo fen xa di alu ɲen, alu wo tara, alu si wo soto. 8Nin alu b'é dinbetela, wo si nooro la ń Fa xan. Wo s'a yita xo alu mu nte la xarandinŋolu ti. 9Fa Ala xa nte xanu ɲa men, nte du x'alu xanu ten. Alu tu ń na xanuya xono. 10Nin alu be ń na sariyalu labatula, alu be ń na xanuya xono, í xo nte xa ń Fa la sariyalu labatu ɲa men, xa tu a la xanuya xono. 11«Ń xa ɲin xuma innu fo alu ɲen, walasa alu xa ń na ɲaxalo soto, anin alu la ɲaxalo xa dafa. 12Ń na sariya fele: “Alu i ɲoxo xanu í xo nte x'alu xanu ɲa men.” 13Xanuya me tanbi don na, xa bo í niyo la í xanuntelu ɲen. 14Nte xa men waajibiya alu ma, nin alu be wo kela, alu mu nte xanuntelu ti. 15Ń nte alu kilila tugun xo jonŋolu, bawo jonŋo man a marigi la ku ketalu lon. Ń x'alu kili xo ń xanuntelu, bawo ń xa fen wo fen me ń Fa la, ń x'alu lalon wo bee la. 16Atelu man nte sugandi. Nte le x'atelu sugandi, x'alu bula, xa taxa, walasa alu x'e din, dinŋo men si tu. Wo to, alu je Fa Ala tara fen wo fen na nte toxo la, a si wo di alu ma. 17Nte be men waajibiyala alu ma, wo fele: Alu i ɲoxo xanu.» 18«Nin duniya x'alu jaxuya, alu a lon, xo a xa nte folo le jaxuya. 19Nin alu tunnu mu duniya talu ti, duniya tun si alu xanu, katugu alu mu a ta ti. Bari alu nte duniya ta ti, nte x'alu sugandi x'alu fata duniya ma, wo xanma, duniya be alu jaxuyala. 20Ń xa ɲin xuma in men fo alu ɲen, alu hakilo xa jigi wo la xo: “Jonŋo man bun a marigi ti.” Nin i xa nte tooro, i si alu dulu tooro. Nin i xa nte la xumolu muta, i si alu dulu talu muta. 21Bari i be ɲin ku innu bee kela alu la nte toxo le nofe, bawo i man nte kibaxo lon. 22Nin ń tun man na xa xuma i ɲen, junube tun nt'e xan. Bari saasa, i me fusi fo no men si jelamuta bo. 23Moxo men be nte jaxuyala, wo be ń Fa du jaxuyala. 24Nin ń tun man kebaarolu ke, moxo man dali xa men ɲoxonnu ke, junube tun me ke i la. Bari saasa, i xa ń na kebaarolu je, i xa nte nin ń Fa bee jaxuya. 25Bari wo keta walasa ɲin xuma in, men safeta i la sariya xono, wo xa ke xo: “I xa ń jaxuya, x'a tara kun nt'a la.” 26«Deemabaxo, nin wo mu Ni Senunŋo ti, men be tonɲa yitala duniya la, wo si na, xa bo Fa Ala bata. Ń s'a bula xa na alu ma ń Fa toxo la. Nin a nata, a si nte la kuwo seedeya moxolu ɲen. 27Alu dulu si nte la kuwo seedeya moxolu ɲen, bawo alu nin nte keta i ɲoxo fe kabirin folofolo.»

will be added

X\