YAY 13

1Tanbinxansallo sutiyata. Isa tun x'a lon xo a la waxato sita, xa bo ɲin duniya in xono, xa taxa Fa Ala bata. Moxo mennu lata a la, duniya xono, a xa wolu xanu fo xa si a danŋo ma. 2Isa nin a la xarandinŋolu tunnu be siimandomo la. Sentane tun x'a bula Simon dinxe Yudasi Isikariyoti jusukunŋo la xa ban, xa Isa dun bulo to. 3Isa tun x'a lon a fan na kuwo to, xo Fa Ala xa kuwo bee sinŋo di a ma, a tun x'a lon du xo a bota Ala la, anin xo a b'é koppala Ala bata tugun. 4Wo to, Isa wulita domolo kunna, x'a la dorokeba bo, xa faano do ta, x'a te tositi wo la. 5Wo keninma, a xa jiyo ke miranŋo do xono, xa boyi a la xarandinŋolu sinŋolu kula, x'e masuusa a la wo tetositilanŋo la. 6A sita Simon Piyere ma tumo men, wo xo a ɲen xo: «Marigi, ite le be nte sinŋolu kula ba?» 7Isa x'a jaabi xo: «Ń be men kela, í man a xoto lon folo, bari í si laban x'a faamu.» 8Piyere xo a ɲen xo: «Í me nte sinŋolu maku abada.» Isa x'a jaabi xo: «Nin nte man í sinŋolu maku, nidula nte í ɲen nte kun tugun.» 9Simon Piyere xo a ɲen xo: «Awa Marigi, nin wo le mu, xana dan ń sinŋolu ma, bari ń bulolu nin ń kunŋo du maku.» 10Isa xo a ɲen xo: «Moxo men x'é ku, a maaku nt'a la x'é ku tugun, bari a si a sinŋolu maku. Bawo alu senuyaninŋo le mu xa ban. Alu senuyaninŋo le mu, bari alu bee nte de.» 11A tun x'a lon, men be nala a dunna bulo to. Wo le x'a tu a xo: «Alu bee senuyanin nte de.» 12A x'e sinŋolu maku tumo men, a x'a la faanolu dun, x'é sigi domolo kunna tugun. A xo i ɲen xo: «Ń xa men ke alu la, alu x'a xoto lon ba? 13Alu be nte kilila xo alu Karanmoxo anin alu Marigi. Alu xa tonɲa fo, bawo ń mu wolu ti. 14Wo to, nte men mu alu Marigi nin alu Karanmoxo ti, nin nte x'alu sinŋolu maku, alu dulu xa xan xa i ɲoxo sinŋo maku. 15Nte xa wo ke, x'a ɲa yita alu la, walasa alu dulu xa wo ɲoxon ke i ɲoxo ɲen. 16Tonɲa tonɲa, ń b'a fola alu ɲen xo jonŋo man bun a marigi ti, kiladinŋo du man bun a kibaxo ti. 17Nin alu xa wo kuwolu lon, x'e ke, alu si heero soto. 18Ń nte alu bee ma de; ń xa mennu sugandi, ń xa wolu lon. Bari waajibo le mu Kitaabo la ɲin xumaxan in xa ke xo: “Ń domolikeɲoxo fan xa ń jaxuya.” 19Kabirin saasa, ń b'a fola alu ɲen, walasa nin a keta, alu xa la a la xo: “Nte mu”. 20Tonɲa la, ń b'a fola alu ɲen xo: Moxo wo moxo je nte la kiladinŋo jigiya, wo xa nte le jigiya; men du xa nte jigiya, wo xa ń kibaxo le jigiya.» 21A x'é soto wo xumo fola tumo men, a jusukunŋo toorota. A woman in xo: «Tonɲa tonɲa, ń b'a fola alu ɲen xo, alu do be nala ń dunna bulo to.» 22xarandinŋolu x'e ɲoxo mafele, x'e fannu toŋininxa, a si tara men tigi ma wo ti. 23Isa la xarandinŋo do, a xa men xanu, wo tun be tabalo la Isa senbo to. 24Simon Piyere x'a ɲa maxati wo ɲen, xo a xa Isa ŋininxa, a be men tigi ma. 25Wo xarandinŋo x'e jenge Isa mafan, x'a ŋininxa xo: «Marigi, jontigi mu?» 26Isa x'a jaabi xo: «Ń je buurukutunŋo su domolo to x'a di men ma, wo le mu.» A xa buurukutunŋo su domolo to, x'a di Simon Isikariyoti dinxe Yudasi ma. 27Yudasi xa buuro muta tumo men, Sentane x'é dun a to. Isa xo a ɲen xo: «Í be men kela, wo ke tariya.» 28A xa wo fo, xa wo la kunŋo men xan, a domoliɲoxolu si tun man wo lon. 29I la xaaliso tun be maranin Yudasi le ma. A keta dolu ɲen xo Isa xo a ɲen ne xo: «N haajo be fenŋo mennu la sallo to, wolu san!» Walla x'a xo le, xo a xa fen do di segebaxantunŋolu ma. 30Yudasi xa buuro muta doron, a wulita xa bo wo no bee to. Wo x'a tara suwo kuta. 31Yudasi bota tumo men, Isa xo: «Saasa, Moxo Dinxe xa bunɲa soto, Ala du xa bunɲa soto a la kuwo xanma. 32Nin Ala xa bunɲa soto a la kuwo xanma, Ala fan du si a Dinxe la bunɲa yita. Wo nte mela tugun. 33Ń na dindinŋolu, haalibi, ń nin alu be tula í ɲoxo xan, bari waxatindin xono. Alu si nte ŋinin, bari, ń xa men fo Yahudiyalu ɲen, ń be wo fola alu dulu ɲen saasa: Nte be taxala dula men, alu me taxa no je. 34Ń be ɲin sariya kuta in dila alu ma: Alu i ɲoxo xanu! Ń x'alu xanu ɲa men, alu dulu x'e ɲoxo xanu ten. 35Nin alu be i ɲoxo xanula, moxolu bee s'a lon wo le ma, xo alu mu nte la xarandinŋolu ti.» 36Simon Piyere xa Isa ŋininxa xo: «Marigi, í be taxala min?» Isa x'a jaabi xo: «Ń be taxala dula men, í me taxa no je saasa, bari lun do, í si taxa je.» 37Piyere xo a ɲen xo: «Marigi, mun na nin nte me taxa no je saasa? Ń si bo ń niyo la í ɲen.» 38Isa x'a jaabi xo: «Xa bo í niyo la nte ɲen ba? Tonɲa tonɲa, ń b'a fola í ɲen xo, jannin duntunŋo xa kokori, í s'í xaro í xo sinɲa saba, xo í man nte lon.»

will be added

X\