YAY 12

1Xa tili wooro tu Tanbinxansallo la, Isa nata Betani tugun. A xa Lasare men nakuni xa bo furelu to, wo tun be siginin non ne. 2I xa siimanŋo dara Isa ɲen je. Marate le tun be domolo dila moxolu ma. Lasare tun be Isa domoliɲoxolu to. 3Mariyama xa tulu sumadimanŋo litere tala ta, men toxo xo nare, x'a yelema Isa sinŋolu xan. Wo tun mu tulu hooro le ti, men da xa xole. Wo xo, a x'a kunsino ke xa Isa sinŋolu masuusa. Tulo sumo xa bugo bee ta. 4Isa la xarandinŋo do, xo Yudasi Isikariyoti, men tun b'a dunna bulo to, wo xo: 5«Mun na ɲin tulu in man fiiri, x'a sonŋo di segebaxantunŋolu ma? A tun si deɲe xaaliso keme saba bo.» 6A man wo fo, xo segebaxantunŋolu hinna b'a la. A x'a fo le, bawo a tun mu sunŋo le ti. I la xaaliso tun be lamaranin ate le ma. Men je di a ma, a si do bo wo la. 7Isa xo: «Alu fata a ma. A xa wo ke nte kasankelunŋo le ɲen. 8Alu nin segebaxantunŋolu be i ɲoxo xan tuma bee. Bari alu nin nte nte tula kadawu.» 9Yahudiyalu moxo kiika x'a me, xo Isa be Betani. I taxata Isa je. Bari i taxata le du, walasa xa Lasare je, Isa xa men nakuni xa bo furelu to. 10Sadaxalasibaxa kuntigolu x'a latege, xo xa Lasare du faxa. 11Katugala ate le la kuwo x'a tu Yahudiyalu kiika yelemata, xa la Isa la. 12Wo lun do, jamaba men nata Tanbinxansallo la, wolu x'a me xo Isa be silo to, nanin Yerusaleme. 13I xa tamarabulolu xati, xa taxa Isa kunben. I tunnu be fetenna xo: «Tanto xa ke Ala ɲen! Men nato fele Marigi toxo la, duwawo be wo fe! Duwawo be Banisirayila mansaxe fe!» 14Isa xa falindinŋo do soto, xa yele a xan, í xo a safeta Kitaabo to ɲa men xo: 15«Siyon gallo, í xana sila: A fele, í la mansaxe be nanin, a be siginin falimuso dinŋo xan.» 16Wo kuwolu kewaxato, a la xarandinŋolu tunnu man i faamu. Bari Isa kunita tumo men, xa dun a la nooro xono, i hakilo jigita a la, xo wo kuwolu safeta Kitaabo to a la kuwo to, xo moxolu xa wo lelu ke a ɲen ten. 17Moxo men tunnu be Isa nofe, a be Lasare kilila xaburo xono tumo men, x'a labo furelu to, wolu x'a seedeya. 18Jama x'a me, xo a xa wo kawakuwo ke. Wo le x'a tu, i x'a kunben. 19Farisiyalu xo i ɲoxo ɲen xo: «Alu ɲa b'a la, alan me fusi bo no a to. A fele, duniya bee taxata a nofe.» 20Gereko mennu taxata sallo to Yerusaleme batulo xanma, 21wolu dolu x'e sodun Filipe la, men bota Galile Betesayida, x'a fo a ɲen xo: «Jatigixe, n b'a fe xa Isa je.» 22Filipe taxata a fo Andere ɲen, i fulo taxata a lasi Isa ma. 23Isa x'e jaabi xo: «Nooro be lala Moxo Dinxe xan waxato men, wo sita. 24Tonɲa tonɲa, ń b'a fola alu ɲen xo, nin ɲokeso man bula duguxulo xoto, xa sa, a kilin si tu. Bari nin a sata, a si keso kiika ke. 25Moxo men niyo xa di a ɲen, wo si bono a niyo to. Bari moxo men niyo man di a ɲen ɲin duniya in xono, wo s'a niyo lamara nilamaya banbalo xanma. 26Nin men b'a fe xa baaro ke nte ɲen, wo x'a lo ń nofe. Wo to, ń be dula men, ń na baaradinŋo du si ke non. Men be baaro kela nte ɲen, Fa Ala si wo tigi bunɲa. 27«Saasa nte juso be ɲaxaminin. Ń si mun fo? X'a fo ba xo: “Ń Fa, ń kisi ɲin waxati in tooro ma?” Bari ń nata ɲin waxati in fan fan ne xanma.» 28Isa xo: «Ń Fa, í toxo bunɲa!» A xa wo fo tumo men, xumaxanŋo bota sanŋo to, wo xo: «Ń x'a bunɲa xa ban. Ń si do kafu a ma tugun.» 29Jama men tun be je, wolu xa wo xumaxanŋo me tumo men, dolu xo: «Sanjiyo le fetenta.» Dolu xo: «Melekiyo do le xumata a ɲen.» 30Isa xo i ɲen xo: «Ɲin xumaxan in man ke nte xanma. A keta a lelu xanma. 31Saasa kiito be nala tegela ɲin duniya in xan. Ɲin duniya in kuntigo be nala xoyila saasa. 32Bari nte, nin ń xototata xa bo duguxulo xan tumo men, ń si moxolu bee saba xa na i ti ń ma.» 33Wo xumolu fe, Isa x'a la saya ɲa fo. 34Jama x'a jaabi ɲin na xo: «N x'a xaran Kitaabo xono, xo Kirisita si tu í nila fo abada. Ite dun xo, xo waajibo le mu Moxo Dinxe xa xotota? Wo Moxo Dinxe mu jon ne ti?» 35Isa xo i ɲen xo: «Haalibi, keneya be tula alu bata, bari dondin doron. Alu i taxama x'alu tu keneya la, dibo xana dun alu ma. Moxo men be í taxamala dibo to, wo man a taxadula lon. 36Xa keneya tu alu bata, alu la keneya la, walasa alu xa ke keneya la moxolu ti.» Isa xa wo xumolu fo i ɲen tumo men, a taxata, x'é dugu i ma. 37A xa taagumanseede kiika ke i ɲala, bari haali wo bee xan, i man la a la. 38Wo ɲa ma, kila Esayi tun xa ɲin xuma in men fo, wo keta. A xo: «Marigi, n xa xibaro men fo, jon lata wo la? Marigi x'a la sintigiya yita jon na?» 39I tunnu me lannaya ke no du, bawo Esayi tun xa ɲin du fo xo: 40«Ala x'e fiyonɲa, x'e jusukunŋo xoleya; walasa i ɲalu xana jeli ke, i xana faamuyali ke i hakilolu la, i xana taxa i yelema ń ma, nte Ala x'e kendeya.» 41Esayi xa wo xumolu fo Isa la kuwo to, bawo a tun x'a nooro je. 42Wo bee nin a ta, haali Yahudiyalu la ɲamoxolu to, fo kiika lata Isa la. Bari Farisiyalu ɲasilanɲa bulu, wolu tunnu me fatiya, x'e la lannaya labo keno ma, i xana taxa labo Alabatusuwo kafo xono. 43Moxolu la bunɲa tun xa di i ɲen Ala ta ti. 44Isa fetenta xo: «Moxo men lata nte la, a man la nte la, a lata ń kibaxo le la. 45Moxo men xa nte je, a xa ń kibaxo du je. 46Nte nata duniya xono í xo keneya, walasa moxo wo moxo je la ń na, wo xana tu dibo to. 47Nin moxo do xa nte la xumolu me, bari a man i mara, nte nte kiito tegela wo xan, bawo ń man na kiito tege duniya xan, ń nata duniya kisilo le xanma. 48Moxo men j'í ban nte to, x'é ban xa ń na xumolu muta, men be kiito tegela wo tigi xan, wo fele: Nte xa xumo mennu fo, wo lelu be kiito tegela a xan duniya labanlunŋo. 49Katugala ń na xumo man bo nte fan to. Ń xa xan xa xaranŋo men di, ń xa wo soto Fa Ala le la, ate men mu ń kibaxo ti. 50Nte x'a lon xo yanmaro men bota Fa Ala la, wo si nilamaya banbalo di moxolu ma. Ń be men fola, Fa Ala x'a fo ń ɲen ɲa men, ń b'a fola wo ɲa in ne.»

will be added

X\