YAY 11

1Xe do tun be Betani xo Lasare, a jangaruta. Mariyama nin a badinmuso Marate la gallo le mu Betani ti. 2Wo Mariyama le xa tulu sumadimanŋo yelema Marigi sinŋolu xan, x'a kunsino ke, x'e masuusa. Wo maxe Lasare le tun man kende. 3Lasare mamusuwolu xa kila bula Isa ma, x'a fo a ɲen xo: «Marigi, í xanuntexe man kende.» 4Isa xa wo me tumo men, a xo: «Lasare la jangaro nte a faxajangaru ti. A keta le nin Ala la sintigiya nooroma si je, anin nin Ala Dinxe la sintigiya si yita wo fe.» 5Isa be Marate nin a badinmuso nin a maxe Lasare xanula. 6A x'a me, xo Lasare man kende. A xa tili fula ke non tugun. 7Wo xo, a xo xarandinŋolu ɲen xo: «Alan x'e koppa, xa taxa Yude.» 8Xarandinŋolu xo a ɲen xo: «Karanmoxo, haali a man me, Yahudiyalu tunnu b'a fe, x'é bun kuro la, x'é faxa. Í b'a fe x'é koppa non ma tugun ba?» 9Isa x'e jaabi xo: «Leere tan nin fula le nte tilo xono ba? Xa moxo tu í taxamala tiliya to, a me yele fen na, bawo a ɲa be duniya keneya la. 10Bari nin moxo b'é taxamala suwo to, a si yele fenŋo do la, bawo keneya nt'a to.» 11Wo xumolu foninŋo xo, a xo: «Alan terixe Lasare sinnoxota. Bari ń be taxala a lakunila.» 12Xarandinŋolu xo a ɲen xo: «Marigi, nin a sinnoxota le, a si kendeya.» 13Isa xa Lasare la saya le fo. Bari xarandinŋolu ɲen, x'a be sinnoxo gansanŋo le ma. 14Wo to, Isa x'a late i ɲen, a xo: «Lasare sata. 15Nte man ke je, wo keta nte diyanɲekuwo ti atelu xanma, walasa alu xa lannaya ke. Alu na alan xa taxa je.» 16Wo to, Tomasi men be kilila xo Fune, wo xo xarandin tolu ɲen xo: «Alu na alan dulu xa taxa, n nin karanmoxo xa sa i ɲoxo fe.» 17Isa be sila je tumo men, a x'a tara Lasare xa tili naani ke xaburo xono xa ban. 18Betani nin Yerusaleme tun te man jan. A dasata kilometere saba to dondin ne la. 19Wo xanma, Yahudiyalu kiika nata Marate nin Mariyama bata, xa na i maxe banxonton. 20Marate x'a me tumo men xo Isa be nanin, a taxata a kunben. Mariyama, wo tuta siginin luwo ma. 21Marate sininma Isa ma, a xo a ɲen xo: «Marigi, nin í tun be jan, ń maxe tun me sa. 22Bari haali saasa, ń x'a lon xo í je kuwo men ŋinin Ala la, a si wo ke í ɲen.» 23Isa xo a ɲen xo: «Í maxe si kuni.» 24Marate x'a jaabi xo: «Ń x'a lon, xo a si kuni duniya labanlunŋo, furelu kunilunŋo.» 25Isa xo a ɲen xo: «Nte le mu furekuniyo nin nilamaya ti. Moxo men je la nte la, haali nin a sata a si nilamaya. 26Moxo wo moxo be í nila, a dun be lanin nte la, wo me sa abada. Í lata wo la ba?» 27A x'a jaabi xo: «Iyo, Marigi, ń lata a la, xo í mu Kirisita le ti, Ala Dinxe, men tun xa xan xa na duniya xono.» 28Isa la wo xumo xo, Marate taxata a badinmusu Mariyama kili x'a ladunmun xo: «Karanmoxo be jan, a b'é maŋininxala.» 29Mariyama xa wo me doron, a wulita wo no bee to, xa taxa Isa bata. 30Isa tun man dun gallo xono folo. Marate x'a kunben dula men, a tun be non ne. 31Mariyama nin Yahudiya do tunnu be luwo xono, mennu nata banxontonno la. Wolu xa Mariyama gidito je xa wuli tumo men, i x'a lo a nofe. A tun be i ɲen xo a be taxala xasila xaburuda le la. 32Mariyama sita Isa ma tumo men, x'a je, a x'é boyi a xoto, x'a fo a ɲen xo: «Marigi, nin í tun be jan, ń maxe me sa.» 33Isa xa Mariyama je xasila tumo men, a nin Yahudiya dulu, mennu nata a nofe, wo x'a juso xasi, x'a hakilo ɲaxami. 34A xo: «Alu x'a bula minto?» I xo: «Marigi, na a mafele.» 35Wo to, Isa xasita. 36Yahudiyalu mennu x'a xasito je, wolu xo: «Alu a mafele de! A tun b'a xanula ɲa men.» 37Bari dolu xo i to xo: «Ate men xa fiyonto ɲalu yele, a tun si kori a kela Lasare xana sa?» 38Isa juso xasita tugun. A taxata xaburuda la. Kuruwuwo le tun mu. Kuro tun be lanin a da la. 39Isa xo: «Alu kuro bo je!» Fure mamusuwo Marate xo Isa ɲen xo: «Marigi, a sumo bota xa ban, bawo a tili naano le je jan.» 40Isa xo a ɲen xo: «Nte man a fo í ɲen ba, xo nin í xa lannaya ke, í si Ala la sintigiya je?» 41I xa kuro bo je. Isa x'a ɲalu xotota sanŋo to. A xo: «Ń Fa, ń be barako bulala í ɲen, bawo í xa nte lame. 42Nte x'a lon xo í be nte lamela tuma bee. Bari ɲin jama in men be ń namininnin, ń xumata wo lelu ɲen, walasa i xa la a la, xo ite le xa ń ki.» 43Wo xumo xo, a fetenbeteta xo: «Lasare, bo!» 44Fure bota, a sinŋolu nin a bulolu be sitinin faano la, a ɲada be buurinin faanuxoyo la. Isa xo i ɲen xo: «Alu a firin, x'a bula a xa taxa.» 45Yahudiya mennu nata Mariyama la luwo ma, wolu xa Isa la wo kebaaro je. I kiika lata a la. 46Bari i to, dolu taxata Isa la wo kebaaro laxali Farisiyalu ɲen. 47Wo to, sadaxalasibaxa kuntigolu nin Farisiyalu xa Yahudiyalu la Kiititegekafo kamari x'a fo i ɲen xo: «Alan si mun ke? Bawo ɲin xe in xa kawakuwo kiika ke saasa. 48Nin n x'a tu je, moxo bee si lannaya ke a la. Wo to, Romengolu si na n na Alabatusuba te, xa n na siya silatunu.» 49I to kilin, a toxo xo Kayife, ate le tun mu sadaxalasibaxa kuntigiba ti wo sanŋo. Wo xo i ɲen xo: «Atelu man fusi lon. 50Alu man a lon ba xo moxo kilin xa sa jamano bee ɲen, wo xa fisa siya bee la halago ti?» 51Bari Kayife man wo xumo fo a fan ma. Ate le tun mu sadaxalasibaxa kuntigiba ti wo san. Ala le janxa wo xumo dun a da, xo Isa xa xan xa sa Yahudiyalu la siya ɲen. 52A nte sala Yahudiyalu la siya doron ɲen. A be sala du, walasa Ala dinŋolu mennu be jenjennin duniya xono, wolu xa kamari, xa ke kilin ti. 53X'é ta wo lunŋo ma, Yahudiyalu la ɲamoxolu benta a to, xa Isa faxa. 54Wo xa Isa lafata í yaalala Yahudiyalu to. A taxata Efarayime gallo to, wulaba da la. A nin a la xarandinŋolu sigita non. 55Yahudiyalu la Tanbinxansallo sutiyaninŋo, jamano moxo kiika taxata Yerusaleme, xa taxa i senuya, í xo i la laado x'a fo ɲa men, jannin sallo xa si. 56I tunnu be Isa ŋininna. X'e tu Alabatusuba xono, i tunnu b'a fola i ɲoxo ɲen xo: «Atelu xo di dun? A si na salli in to ba, walla a me na?» 57Sadaxalasibaxa kuntigolu nin Farisiyalu tunnu xa yanmaro di, xo nin moxo men x'a dula lon, wo x'a fo; walasa a xa muta.

will be added

X\