YAY 10

1Isa xo: «Tonɲa tonɲa, ń b'a fola alu ɲen xo, nin moxo do dunta saaxabunŋo xono, a dun man dun da la, fo boxo xote la, wo mu sunŋo nin boyinxannila le ti. 2Bari men je dun da la, wo le mu saaxolu negaanibaxo ti. 3Dakantabaxo si da yele a ɲa, saaxolu si a xumaxanŋo me. Saaxo mennu mu a ta ti, a si wolu kili i toxo la, x'e labo banto to. 4Nin a x'a fan na saaxolu bee labo tumo men, a si bula i ɲa. Wolu s'a lo a nofe, katugala i x'a xanŋo mategeninŋo lon. 5I me a lo luntan nofe. I s'i bori, x'e soobo luntanŋo la, bawo i man luntan xumaxan lon.» 6Isa xa ɲin tali in la moxolu ɲen, bari i man a faamu. 7Isa xo i ɲen tugun xo: «Tonɲa tonɲa, ń b'a fola alu ɲen xo: Nte le mu saaxolu la dunda ti. 8Fen wo fen nata nte ɲa, wolu mu sunŋolu nin boyinxannila lelu ti. Bari saaxolu man i xumaxanŋo lame. 9Nte le mu da ti. Men je dun nte fe, wo si kisi. Wo si dun, xa bo, xa domolo soto. 10Sunŋo be nala suuɲalo nin faxalo nin tiɲalo le doron xanma. Nte nata le walasa hadamadinŋolu xa nilamaya soto, dandula nte men ma. 11Nte le mu negaanila beto ti. Negaanila beto si a niyo di a la saaxolu xanma. 12Bari men b'a la sara doron ŋininna, wo men nte saaxolu negaanibaxo nin i tigo ti, nin wo xa waro nato je, a s'í bori xa saaxolu tu. Waro si na, xa mutalo ke, x'e jenjen. 13Wo negaanila s'í bori, katugala saraŋininna le mu. Saaxolu hanme nt'a la. 14Nte le mu negaanila beto ti. Nte xa ń na saaxolu lon, ń na saaxo dulu xa nte lon, 15í xo Fa Ala xa ń lon ɲa men, anin nte xa Fa Ala lon ɲa men. Ń be ń niyo dila ń na saaxolu xanma. 16Saaxo do xotelu be ń kun, mennu nte ɲin saaxabun in xono. Fo ń xa na wo saaxo dulu ti le. I si ń na xumo lame. I bee si ke saaxagoore kilin ti. Negaanibaxa kilin si ke i bee ma. 17Fa Ala be ń xanunin, katugala ń be bola ń niyo la, xa saagi a sotonin tugun. 18Moxo si nte ń niyo mutala ń na. Ń fan ne be bola a la x'a di. A sinŋo be ń ɲen x'a di, a sinŋo du be ń ɲen, x'a soto tugun. Ń Fa xa wo le yanmaro di ń ma.» 19Wo xumolu xa Yahudiyalu tala xan ma tugun. 20Moxo kiika xo i to xo: «Jinno le b'a to. A kunxulo nte je. Mun na alu b'a lamela?» 21Dolu xo: «Jinneto xuma nte ɲinnu ti de! Jinno si fiyonto ɲalu yele no ba?» 22Yahudiyalu la sallo do keta Yerusaleme sankunŋo to. Wo sallo be i hakilo lajigila Alabatusuba xarifalo la Ala ma. 23Wo sallo to, Isa tun be taxaninsaago la Alabatusuba biire do xoto, men be kilila xo mansaxe Sulemani la biire. 24Yahudiyalu kamarita a ma, x'a ŋininxa xo: «Í be n tula hakili fulanfulanŋo la fo tuma joman? Nin í mu Kirisita le ti, wo laxoyiya n ma.» 25Isa x'e jaabi, a xo: «Ń xa wo fo alu ɲen xa ban, bari alu man la a la. Ń be kebaaro mennu kela ń Fa toxo la, wo lelu be nte seedeyala. 26Bari alu man la ń na, bawo alu nte nte la saaxolu do ti. 27Nte la saaxolu be ń xumaxanŋo mela. Ń x'e lon, i s'a lo ń nofe. 28Ń si nilamaya banbalo di i ma, i me halagi abada. Moxo si me i bo no nte bulu. 29Ń Fa men x'e di ń ma, wo xa bun bee ti. Moxo si me i bo no ń Fa bulu. 30Nte nin Fa Ala mu kilin ne ti.» 31Wo tumo la, Yahudiyalu xa kurolu ta tugun, xo i b'a bunna x'a faxa. 32Isa xo i ɲen xo: «Ń xa kebaara beto kiika yita alu la, ń Fa barako to. Wo kebaarolu to, alu be ń bunna kuro la joman ne xanma?» 33Yahudiyalu x'a jaabi xo: «N nte í bunna kuro la kebaara bete xanma. Í la Ala toxotiɲa le nofe mu, nin n b'é bunna. Ite men mu hadamadinŋo ti, í x'é fan ke Ala ti.» 34Isa x'e jaabi xo: «A nte safenin alu la sariya xono ba xo: “Nte Ala xo: Alu mu ala dolu ti”? 35Alan x'a lon xo Kitaabo xumaxanŋo nte yelemala. Ala la xumo fota mennu ɲen, alaya fota wolu ma. 36Wo to, nin nte xo, xo ń mu Ala Dinxe ti, alu dunnu s'a fo di, xo ń be Ala toxo tiɲala? Fa Ala xa nte men sugandi, xa ń ki duniya xono. 37Nin nte nte ń Fa la kebaarolu kela, alu xana la ń na. 38Bari x'a tu, ń be a la kebaarolu kela, alu la wo kebaarolu la, haali nin alu man la nte la, walasa alu x'a lon, x'a faamu, xo nte nin ń Fa mu kilin ne ti, xo Fa Ala nin nte mu kilin ti.» 39Wo xumo xan, i x'a ŋinin tugun, x'e b'a mutala. Bari a x'a fan soto i la xa taxa. 40Isa taxata Yuruden ba boxo do tugun. Yaya tun xa batiselo ke dula men folo, a sigita non. 41Moxo kiika nata a ma non. Wolu xo: «Yaya man kawaku kilin ke. Bari a xa fen fen fo ɲin xe in na kuwo to, keso le mu.» 42Moxo kiika lata a la non.

will be added

X\