YAY 1

1Folofolo, jannin haali duniya xa da, men be kilila xo Xumo, wo tun be je. Wo Xumo tun nin Ala be i ɲoxo fe, wo Xumo tun mu Ala le ti. 2Kabirin folofolo a tun nin Ala be i ɲoxo fe. 3Fenŋo bee data ate le barako to. Dafen fusi man da ate xo. 4Nilamaya tun be ate le to. Wo nilamaya tun mu hadamadinŋolu la keneya le ti. 5Wo keneya be manala dibo to, bari dibo man son a to. 6Ala xa moxo do ki, a toxo xo Yaya. 7A nata seedeyalo ke. A nata wo keneya seedeya, walasa moxolu bee xa lannaya ke wo xanma. 8A fan tun nte wo keneya ti, bari a nata le xa keneya seedeya. 9Wo keneya tun mu keneya soobe le ti, men nata duniya to, xa keneya bo hadamadinŋo bee ɲen. 10Wo Xumo tun be duniya to. Duniya data ate le barako to, bari duniya man a lon. 11A nata a fan na moxolu bata, bari a fan na moxolu man son a to. 12Bari moxo mennu sonta a to, xa la a la, a xa fango di wolu bee ma xa ke Ala dinŋolu ti. 13Wolu man wulu moxo wuluɲa ma, hadamadinŋo sago man wo ke, walla xeba sago, bari Ala kilin ne xa wo ke. 14Wo Xumo keta moxo ti, xa na sigi ntelu to. Ntelu x'a nooro je, wo nooro be í xo Dinxe kilinpe nooro, men bota Fa Ala to, neemo nin tonɲa dafaninŋo tun b'a bulu. 15Yaya x'a la kuwo seedeya, a fetenta xo: «Ń tun x'a fo ate le ma, xo men be nala nte xofe, a be ń ɲa; bawo a tun be je jannin nte xa wulu.» 16N bee xa do soto a la dafaninɲa to, anin neema nin neema. 17Ala xa sariya di n ma kila Musa le fe, bari neemo nin tonɲa nata Isa Kirisita le bulu. 18Moxo si bada ɲa man la Ala xan, bari Dinxe kilinpe men mu Ala ti, nin a be Fa Ala bata, wo le x'a yita n na. 19Yahudiyalu la ɲamoxolu xa sadaxalasibaxolu nin Lewikundango dolu ki xa bo Yerusaleme, xa taxa Yaya ŋininxa xo a mu jon ti. A x'e jaabi xumo men na, wo fele: 20A man i ban i jaabila, bari a x'a fo x'a laxoyiya i bee ɲen xo: «Nte nte Kirisita ti.» 21I xo a ɲen xo: «Í dun mu jon ti? Í mu kila Eli le ti ba?» A xo: «Nte nte wo ti.» I xo: «Kila men na xumo fota, í mu wo le ti ba?» A xo: «Ayi, ń nte wo ti.» 22I xo: «Í dun mu jon ti? Wo fo n ɲen, walasa n xa taxa jaabi kilin di n kibaxolu ma. Í be mun fola í fan na kuwo to?» 23A xo: «Men be fetenna wulo xono x'a fo xo: “Alu Marigi la silo latilin!” Nte mu wo le ti, í xo kila Esayi x'a fo ɲa men.» 24Moxolu mennu kita, wo dolu tunnu mu Farisiya lelu ti. 25I x'a toŋininxa xo: «Nin í nte Kirisita ti, í nte kila Eli ti, í nte wo kila ti, mun dun na í be moxolu batisela?» 26Yaya x'e jaabi xo: «Nte ken be batiselo kela jiyo le la. Bari moxo do be alu to, alu man wo lon. 27A be nanin nte xo. Haali xa wo la samato julo firin, nte nin wo man xan.» 28Wo kuwolu keta Betani, Yuruden ba xofe, Yaya tun be moxolu batisela dula men. 29Wo lun do, Yaya xa Isa je nanin a ma, a xo: «Ala la Saaxandinŋo fele, men be duniya la junubo bola je. 30Ń tun x'a fo ate le ma xo xe do be nala nte xofe, xo bari, a be nte ɲa, bawo jannin nte xa bo duniya to, ate tun be le je. 31Nte fan tun man a lon. Bari nte nata moxolu batise jiyo la, walasa x'ate yita Banisirayila dinŋolu la.» 32Yaya xa seedeyalo ke xo: «Ń xa Ni Senunŋo je jigila a xan xa bo sanŋo to í xo jenetubanŋo, xa tu a xan. 33Nte tun man a lon, bari men xa ń ki xa moxolu batise jiyo la, wo le x'a fo ń ɲen xo: “Í je Ni Senunŋo je jigila men xan xa tu a xan, wo le be moxolu batisela Ni Senunŋo la.” 34Nte xa wo je anin ń b'a seedeyala xo ɲin xe in mu Ala Dinxe le ti.» 35Wo lun do, Yaya nin a la xarandinŋolu moxo fula tun be wo dula tugun. 36A xa Isa tanbito je, x'a mafele, a xo: «Ala la Saaxandinŋo fele.» 37Xarandin fulo xa Yaya me wo fola, i woman innu x'a lo Isa nofe. 38Isa x'é xofele. A x'a je xo i b'a nofe. A xo i ɲen xo: «Alu be mun ŋininna?» I xo: «Rabi, í be jiginin min?» «Rabi» xoto mu le xo «Karanmoxo». 39A xo i ɲen xo: «Alu na, xa je je.» I woman innu taxata a jigidula mafele. Wo benta tilo sumayatumo ma. I tuta a bata wo lunŋo. 40Xarandin fulo men xa Yaya lame, x'a lo Isa nofe, Simon Piyere doxoxe Andere tun mu wolu to do le ti. 41Andere taxata a xotoxe Simon ma folo, a xo a ɲen xo: «N xa Alimasiya je, nin wo mu Kirisita ti.» 42Wo keninŋo, a taxata a ti Isa bata. Isa xa Simon mafele, a xo a ɲen xo: «Í mu Simon ne ti, Yaya dinxe. Í si kili xo: Sefasi». Wo xoto xo «Piyere» walla «fataxulo». 43Wo lun do, Isa xo x'a be taxala Galile. A xa Filipe je, a xo a ɲen xo: «A lo ń nofe!» 44Filipe tun be bola Betesayida le, nin wo mu Andere nin Piyere la gallo ti. 45Filipe taxata Natanayeli ma, a xo a ɲen xo: «Musa xa men na kuwo fo Sariya kitaabo xono anin kilalu dulu xumata men xan, ntelu x'a je. Isa le mu, Nasareti Yusufu dinxe.» 46Natanayeli xo a ɲen xo: «Fen ɲuma si bo no Nasareti ba?» Filipe xo a ɲen xo: «Na a mafele.» 47Isa xa Natanayeli je nanin a ma, a xo: «Banisirayilango yeerewuluwo fele, nanbara fusi nte men na kuwo to.» 48Natanayeli xo a ɲen xo: «Í xa nte lon min?» Isa xo a ɲen xo: «Jannin Filipe x'é kili, nte tun x'é je turojuwo xoto.» 49Natanayeli x'a jaabi xo: «Karanmoxo, í mu Ala Dinxe le ti. Í mu Banisirayila mansaxe le ti.» 50Isa x'a jaabi, a xo: «Bawo ń x'a fo í ɲen xo ń x'é je turojuwo xoto, wo le x'a tu í xa lannaya ke ba? Í si kuwolu je mennu barako xa bun ɲinnu ti.» 51Isa xo: «Tonɲa tonɲa, ń b'a fola alu ɲen xo silan alu si sanxulo dayeleninŋo je, xa Ala la melekiyolu jigito nin i yeleto je Moxo Dinxe xan.»

will be added

X\