YAXUBA 5

1Awa saasa, naafulutigolu, alu ń name. Bone mennu be alu ɲa, alu xasi xa xuure wolu koso. 2Alu la naafulolu si toli, baxabaxo si alu la faanolu ɲimi. 3Sama, walla sonŋo si alu la sano nin alu la xaalisixoyo muta. Wo sama le b'a yitala xo alu xa xan xa jalagi. Wo sama si alu subo domo x'a ban, í xo ta. Alu xa naafulo lakamari duniya laban tumo. 4Baarakela mennu x'alu la senefenŋolu ladara, alu man wolu sara. Wo baarakedinŋolu xasita wo xanma, Ala tulo xa wolu xasixanŋo me, ate men mu Kelebulolu tigo Marigi ti. 5Alu x'alu la duniyatotego ke duguxulo xan fen betolu la, mennu danmatanbita, anin alu nidiyanɲekuwolu la. Alu x'alu fannu latolo í xo marafenŋo, xa faxalo lunŋo laxono. 6Alu xa kiito tege moxo tilinninŋolu xan, x'e faxa. I x'e fannu tu alu bulu. 7Wo le x'a tu, ń badinŋolu, alu muɲa fo Marigi xa na. Alu senekela mafele: A be muɲala x'é lo senefenŋolu xa sabati. A be muɲala fo sanji folo nin labanŋo xa na. 8Alu dulu xa muɲa wo ɲa kilin in ma. Alu i balan, bawo Marigi nawaxato sutiyata. 9Ń badinŋolu, alu xana i ɲoxo maxuma; nin wo nte, Ala si kiito tege alu xan. Kiititegela nawaxato sita, a be da la fan. 10Ń badinŋolu, kila mennu xumata Marigi toxo la, wolu muɲata ɲa men toorolu xono, alu wolu ladigi. 11Mennu xa tooro muɲa xa tu lannaya to, heero be wolu ɲen. Alu xa Yuba la muɲo xibaro me. Alu x'a lon du Marigi xa men ke a ɲen labanŋo la; bawo Marigi la hinno nin a la ɲumaya xa bun. 12Ń badinŋolu, nte be men xoleyala alu ma, wo mu le, xo alu xana i xali fewu. Alu xana i xali sanxulo fen na, alu xana i xali duguxulo fen na. Alu xana i xali fuyi xote la. Alu a fo doron «iyo», nin iyo le mu, x'a fo doron «ayi» nin ayi le mu, walasa alu xana Ala la kiito lasi alu fannu ma. 13Alu to, nin do be tooro xono, wo xa Ala matara. Nin do be ɲaɲanin, a xa tantuli donkilo dolu la. 14Alu to, nin do man kende, a xa Ala la jama moxobalu kili wolu xa Ala matara a ɲen, x'a mu tulo la Marigi toxo la. 15Nin Alamatara keta lannaya to, jangaruto si kendeya. Marigi si a lawuli tugun. Nin a xa junubolu ke, wolu si yaafa a ma. 16Wo xanma, alu i lo alu la junubolu la i ɲoxo ɲen, xa Ala matara i ɲoxo ɲen, walasa alu xa kendeya. Barakeba be moxo tilinninŋo la Alamatara to. 17Kila Eli tun mu ntelu ɲoxon hadamadin ne ti. A xa Ala matara, x'a matara nin sanji me na. Haali sanjikese kilin, a man butun duguxulo xan san saba nin tala xono. 18Wo xo, a xa Ala matara tugun. Sanjiyo nata, duguxulo x'a la dinfenŋolu ke. 19Ń badinŋolu, nin alu do filita, xa tonɲa silo bula, nin alu do keta sabaabu ti xa wo lakoppa sila beto ma, 20alu a lon xo men be junubekela kilin nakoppala sila beto ma, a si wo niyo kisi saya ma, xa ke junube kiika yaafo sabaabo ti.

will be added

X\