YAXUBA 4

1Kelolu nin soosololu mennu be alu te, mun be nala wolu tila? Alu nidiyanɲekuwo mennu be alu xono ɲaxaminin, wo lelu nte alu bulala a la ba? 2Fen kiika loxo be alu la, bari alu me i soto no. Wo xanma, alu si moxo jaxuya, x'a faxa. Alu ɲa si bo fen kiika fe, bari alu me fusi soto no. Wo xanma, kelolu nin sonxolu be alu te. Alu be men fe, alu nte wo sotola; bawo alu nte a ŋininna Ala la. 3Haali nin alu x'a ŋinin, alu me a soto; bawo alu b'a ŋininna alu fannu nidiyanɲo lelu xanma. 4Moxo banninŋolu! Alu man a lon ba xo xa duniya xanu, wo xoto mu le xa ke Ala jaxolu ti? Moxo men b'a fe xa duniya xanu, wo tigi be jaxuya le dunna a nin Ala te. 5A xana ke alu ɲen xo Kitaabo xa xumo men fo, xo wo fota fu le. A xo: «Ala xa niyo men dun n to, kiiliya b'a la wo la kuwo to.» 6Wo bee nin a ta, Ala be neemo men dila n ma, wo le xa bun wo bee ti, bawo a fota Ala la xumo to xo: «Ala be bunfanmamoxolu kelela, bari a be a la neemo dila moxo majigininŋolu ma.» 7Wo to, alu xulu Ala ɲen. Alu xana alu fannu tu Sentane bulu, alu a kele, a s'í bori xa í soobo alu la. 8Alu i sodun Ala la, a du s'í sodun alu la. Alu junubekelalu, alu junubeko dabula. Xonofulatigolu, al'alu jusukunŋo senuya! 9Alu a lon xo alu mu ɲaanibaxato lelu ti. Al'alu fannu maxasi, alu ɲajiyo bo. Jannin alu xa jele, alu xasi. Jannin alu xa ɲaxali, al'alu ɲa tositi. 10Alu i majigi Marigi ɲen, a si alu xotota. 11Awa, ń badinŋolu, alu xana xuma jaxu fo i ɲoxo ma. Moxo wo moxo be xuma jaxo fola a badinŋo ma walla xa kiito tege a xan, a be í xo wo tigo xa xuma jaxo fo Ala la sariya le ma, xa kiito tege a xan. Nin í dun be kiito tegela sariya xan, wo tumo, í nte sariya latimmebaxa ti, í mu a kiitibaxo le ti. 12Ala kilin ne xa sariya sigi, a kilin ne du mu kiititegebaxo ti. Ate le si a no du xa moxo kisi, a si a no du xa moxo halagi. Ite be í fan mafelela jon ti, ite men be kiito tegela í badinŋo xan? 13Awa, saasa, ate mennu b'a fola xo: «Bi wallama sinin, n be taxala galluba do to xa san kilin ke je. N be nala jaago kela xa tonoba soto.» 14Men be nala alu ma sinin, alu xa wo lon ba? Alu be le í xo siisiyo men be bola waxatindin, wo xo, a si sanko. 15Alu tunnu xa xan x'a fo le xo: «Nin Ala sonta, xa n kendo tu, n si ɲin ke, xa ɲin ke.» 16Bari saasa, alu xa kuba mennu latege alu fannu la miiriya la, alu be alu fannu bunɲala wolu la. Xa í fan bunɲa ten, wo man ɲin. 17Awa, nin í x'a ɲa lon xa ku ɲuma ke, bari í man son x'a ke, wo to, í xa junubo soto.

will be added

X\