1 Ń badinŋolu, alu kiika xana karanmoxoya ŋinin, bawo ntelu karanmoxolu la kiito si jaxuya xa tanbi tolu ta xan. 2 Alan bee be filila ɲa kiika ma. Moxo men nte filila xumo to, wo tigo mu moxo dafaninŋo le ti. A si a fan muume bee muta no a la ku ketalu bee to. 3 Nin í xa n je xarabe dunna suwolu da ma, a kunŋo mu le, walasa i xa xulu n ɲen. Wo ɲa ma, n s'i ke n sago ti. 4 Walla alu jixanxulunbalu mafele. I xa bun ɲa wo ɲa, anin foɲobalu b'e ɲorila ɲa wo ɲa, i laborilanŋo mu batarafendin ne ti, men be taxala i tila i laboribaxo diyanɲedula. 5 Wo be ɲa men, moxo nenŋo mu a balo dula doxomandinŋo do le ti. Bari moxo si a fan bunɲa a nenŋo la, xa xumabalu fo. Alu i miiri tandinŋo ma, a si sin xa wulaba bee jani. 6 Nenŋo du mu ta le ti. Fenjaxuba le mu, men mu n balo do ti. A be moxo muume bee noxola. A si ta dun n na kuwolu bee la. Wo ta be bola jahanaba le fan xono. 7 Hadamadinŋo si sin xa wulaxonosubu sifa bee, nin xonolu, nin fenŋo mennu b'e fuufula, nin jitofen sifa bee xulu, x'e mara. 8 Bari nenŋo ken, moxo si man sin xa wo xulu. Fen jaxu xulubalo le mu nenŋo ti. Xuno b'a la, men si moxo faxa. 9 N be Marigi, n Fa Ala tantula n nenŋo la. Ala xa moxo mennu da a mununŋo la, n be wolu dangala nen in ne du la. 10 Duwawo nin dangalo bee be bola da kilin to. Ń badinŋolu, a man xan xa ke ten. 11 Ji dimanŋo nin ji kumanŋo fulo bee si bo no dula kilin ba? 12 Ń badinŋolu, turo me oliwedinŋo ke no. Resenjuwo du me turodinŋo ke. Ji dimanŋo me bo no ji xooxoma bodula. 13 Moxo do be alu to ba, men mu hakilitigo ti, men xa ku lon? Wo tigi xa wo yita a bosila ɲuma la. A x'a yita kewalolu fe, mennu be lanin majigo nin hakilitigiya xan. 14 Bari nin a x'a tara kiiliya nin fadinɲa juso le be alu xono, wo tuma, alu xana alu fannu bunɲa xa faniya fo, x'e ban tonɲa ma. 15 Wo hakilitigiya man bo Ala to. Duguxulo xan ta le mu. Hadamadinŋolu fannu la hakilitigiya le mu. A bota Sentane le to. 16 Bawo kiiliya nin fadinɲa be dula wo dula, ku ɲaxamininŋo nin kujaxu sifa bee du be non. 17 Bari hakilitigiya men be bola Ala la, a folo wo xa senu, wo xo, a si heero di, a xono xa di, a be benŋo fe. A si hinna bete, a la kewale ɲuma dulu me ban; a nte moxo bola moxo to, a man fulankafuya du ɲa lon. 18 Mennu be benŋo ŋininna i nin moxo tolu te, wolu be baaro kela benŋo le du xono. Wo tono mu tilinninɲa soto le ti, Ala be men dila.
