YAXUBA 2

1Ń badinŋolu, atelu mennu lata n Marigi nin nooro Mansaxe la, nin wo mu Isa Kirisita ti, alu xana moxo fisiya moxo ti, wo lannaya silo xan. 2Alan x'a misaali xo moxo do nata alu la kafo xono, sanudoronma b'a bulo la, faanu betolu be a ma. Segebaxantunŋo do du nata je, faanu kurunŋolu be a ma. 3Awa, nin alu xa faanubetetigo bunɲa x'a fo a ɲen xo: «Í sigi ɲin dula bete in», x'a fo segebaxantunŋo ɲen xo: «Ite xa í lo jan!» walla xo: «Ite xa í sigi dugo ma jan, ń sinŋolu xoto», 4alu man do fisiya do ti ba? Alu man wo ke x'a la miiriya jaxo xan ba? 5Ń badin xanuninŋolu, alu ń name! Ala xa segebaxantunŋolu sugandi le ɲin duniya in xono, walasa i xa ke fentigolu ti lannaya to, xa dun a la Mansaya xono. A xa wo Mansaya le lahido ta a xanubaxolu bee ɲen. 6Bari atelu kennu be segebaxantunŋolu doxoyala. Mennu be alu toorola, x'alu lasi kiititegelalu ma, naafulutigo lelu nte ba? 7Marigi toxoɲuma men be lanin alu la, naafulutigo lelu nte wo toxo tiɲaxan ba? 8Ala la sariya men be safenin Kitaabo xono xo: «Í xa í moxoɲoxo xanu í xo í fan», nin alu xa wo dafa, sikka nte a to, wo mu ku ɲuma le ti. 9Bari nin alu be moxolu bola i ɲoxo to, wo mu junubo le ti. Sariya be alu jalagila; bawo alu mu sariya soosobaxo lelu ti. 10Moxo wo moxo xa sariyalu bee dafa, bari xa kilin doron sooso, a xa sariya muume le sooso. 11Bawo men x'a fo xo: «Í xana jadoya ke,» wo le du x'a fo xo: «Í xana moxo faxa.» Awa, nin í man jadoya ke, í dun xa moxo faxa, í xa sariya sooso. 12Sariya men x'alu hooroya, kiito be nala tegela alu xan, x'a la wo sariya le xan. Wo xanma, alu xumaɲa nin alu taxamaɲa xa ben wo ma. 13Nin moxo men man hinna tolu la, hinna me na ke wo tigi du la kiito lunŋo. Bari moxo men be hinnala, wo silakun nte kiito ɲa. 14Awa, ń badinŋolu, nin moxo do xo, xo lannaya b'a la, x'a tara a tigo nte kewale ɲuma kela, men si a la lannaya yita, wo lannaya si mun dun wo tigo la? Wo lannaya si a kisi no ba? 15Nin feeto be alu badinŋo dolu la, musu walla xe, anin nin lunŋo baluwo nte i bulu, 16atelu do xo i ɲen xo: «Ala mu newoya kela alu ɲen. Alu faanu xulinŋolu dun, xa domolo ke x'e fa», x'a tara a man i balo maakuwo ɲiɲafenŋo di i ma, a la wo xumo be mun dunna? 17Lannaya du be wo ɲa in ne. Nin í nte a yitala kewale ɲumalu fe, í la lannaya be le í xo fen saninŋo. 18Do si a fo no xo: «Lannaya mu dolu ta ti, kewaleɲumako mu do dulu ta ti.» Ń si wo tigo jaabi xo: «A yita ń na xo lannaya be í la kewale ɲumalu xo. Nte ken be ń na lannaya yitala í la ń na kewale ɲuma lelu fe.» 19Xodi í be lanin a la de xo Ala kilin ne be je? Wo xa bete. Jinno dulu be lanin wo la. I be silala Ala ɲa fo i be jarajarala. 20Hakilintan in! Í b'a fe a xa yita í la ba xo nin lannaya b'é la x'a tara í nte kewale ɲuma kela, xo wo lannaya mu fuwo le ti? 21Ala xa n mamaxe Burehima jaate moxo tilinninŋo ti ɲa men, í man wo lon ba? A keta a la kewalo lelu xanma, bawo a sonta x'a dinxe Nsiyaxa di nin a si ke sadaxajanita ti sadaxajanidula. 22Í x'a je xo a la lannaya nin a la kewalolu tunnu be taxala i ɲoxo fe. A la kewalo lelu x'a la lannaya latimme. 23Wo ɲa ma, Kitaabo tun xa men fo, wo keta xo: «Burehima lata Ala la, wo xanma, Ala x'a jaate moxo tilinninŋo ti.» Ala x'a kili xo a xanunte. 24Alu x'a je, Ala be moxo jaatela moxo tilinninŋo ti ɲa men. A la kewalolu dulu xanma le mu, a la lannaya gansanŋo doron xanma nte. 25Jadomuso do keta xo Arahabu, Ala xa wo du jaate moxo tilinninŋo ti a la kewale ɲuma le xanma. Ate xa Banisirayila dinŋolu la kiladinŋolu lajigi a bata, xa taxa i ti sila xote fe. 26Nin niyo bota hadamadinŋo to, wo be sanin ɲa men de, wo ɲa ma, lannaya du be le í xo fen saninŋo, kewale ɲumalu xo.

will be added

X\