YAXUBA 1

1Nte Yaxuba le xa ɲin safe in ke, nte men mu Ala nin Marigi Isa Kirisita la jonŋo ti. Ń na xontonno be taxala Ala la jama moxolu bee ma, mennu be jenjennin duniya bee xono. 2Ń badinŋolu, nin tooro wo tooro nata alu ma, alu wo jaate ɲaxalikuwo ti; 3bawo nin alu xa xoleyalu soto x'e muɲa xa tu lannaya xono, wo si a ke alu x'e timinadiya lannaya to. 4Alu la timinadiya xa taxa ɲa, walasa alu xa ke lannayabaxa dafaninŋolu nin lannayabaxa moninŋolu ti, fo fusi me dasa alu la. 5Hakilitigiya be dasanin moxo men na, wo xa Ala matara wo la, a si a di wo tigo ma; bawo Ala mu solilaba le ti, a si moxo so, x'a tara a man fen fo í ma. 6Bari a x'a tara lannaya to, a xana sikka. Bawo moxo men be sikkala, wo be le í xo xooxojiyo fanfe, foɲo be í tulunna men na, xa taxa a ti boxo bee. 7Wo moxo sifa ken xana í miiri xo a si fen do soto Marigi la. 8Hakili fulanfulanŋo le b'a la; a la ku si me sila soto. 9Awa, badinŋo mennu mu segebaxantunŋolu ti, wolu xa ɲaɲa; bawo Ala s'i xotota. 10Bari badin naafulutigo dulu xa ɲaɲa, nin Ala x'e majigi. Bawo lun do, i la kuwo si ban í xo binfiro be kela ɲa men. 11Nin tilo nin a funtaniba wulita, a si binŋo ja, a firo si bon. A dawulo bee si bo a la. Naafulutigo du be banna ten ne, x'a tu a la kuwolu temo to. 12Moxo men be tooro muɲala a la lannaya xanma, heero be wo ɲen; bawo nin a xa tooro muɲa, a si nilamaya banbalo soto kunnawulijala ti. Ala xa wo lahido ta a xanubaxolu bee ɲen. 13Nin moxo men be jarabo xono, wo xana a fo xo Ala le b'a bulala jarabo xono; bawo fusi me Ala bula no jarabo xono, x'a bula jaxumanŋo kela, a fan du nte moxo lajarabila. 14Moxo bee fan nidiyanɲo le b'a sabala x'a neene, x'a bula jarabo xono. 15Nin í x'a lo í nidiyanɲo nofe, wo be junubo le bangela. Nin í tuta junubo xono, wo si falin saya la. 16Ń badin xanuninŋolu, alu xana a tu moxo si x'alu lafili. 17Fen ɲuma mennu be dila n ma, anin n be nilifen dafaninŋo mennu sotola, wolu bee be nala xa bo sanŋo le to. I be nala xa bo Ala le bata, wo men mu sanxulo keneyalu dabaxo ti. Ala nte yelemala, a nte dulen kela, í xo fenŋo mennu be bola i no to. 18A diyata a ɲen xa nilamaya kuto di n ma a la xumo barako la, wo men mu tonɲa ti, walasa n xa ke folo ti a la dafenŋolu bee to. 19Ń badin xanuninŋolu, alu ɲin tu alu hakilo la xo: Moxo bee tulo xa tu dayelenin xa lamelo ke junna, bari alu xana tariya xa xuma, alu xana dimin junna. 20Bawo moxo diminninŋo me ku ke no, men be tilinnin Ala ɲa xoto. 21Wo le x'a tu, ku wo ku si moxo noxo, alu wo bee dabula, anin jaxuya bee. Ala la xumo men lanta alu jusukunŋo la, alu son wo ma majigininɲa to; wo si sin x'alu kisi. 22Alu xana ke Ala la xumo lamebaxolu ti gansan, alu ke a latimmebaxolu ti; nin wo nte, alu si alu fannu lafili. 23Moxo men be Ala la xumo lamela, bari a nte wo xumaxanŋo latimmela, wo tigi be le í xo moxo men b'a fan mafelela duŋare to. 24A x'a fan mafele tumo men, a taxata, wo no bee to, a ŋinata a fan keɲa kun. 25Bari xibaru Dimanŋo, wo mu sariya ti, men be dafanin, men si moxo hooroya. Awa, nin moxo wo moxo xa wo mafele bete x'a faamu, xa í hakilo tu a la, nin í xa í sinsin a xan, í man a lame doron xa ŋina a kun, bari í x'a latimme, wo tigo si heero soto a la ku ketalu to. 26Nin a be moxo do ɲen xo a be silala Ala ɲa, x'a tara a ta nte a da ti, wo tigo b'a fan ne janfanin. A la batulo nin fuwo bee xa xan. 27Fa Ala ɲa xoto batuliɲa mu men ti tigi tigi, noxo nte men to, wo fele: Xa í hakilo tu kilondinŋolu nin musujaxelu la, i la tooro xono, anin xa í fan tanga duniya fen noxoninŋolu ma.

will be added

X\