HEBUROLU 9

1Kafuxan folo waxato, sariya do tunnu be je, mennu be batulo keɲa xan. Bun senumanŋo do du tun lota duguxulo xan. 2Alabatusuba tillisima do tun lota, men be talanin dula fula ti. A dula folo kilita xo dula Senumanŋo. Lanpa sifa dolu, nin tabalo, nin buuro mennu be dila Ala ma sadaxo ti, wolu tunnu be non. 3Totegefaano tun be wo dula fulo te. Faano boxo do kilita xo dula Senumanba. 4Sadaxajanilan sanuma tun be non, digico be janila men xan, anin Kafuxanŋo waxande; sano be a dula bee ma. Sanudaxo do be wo waxande xono, manne b'a to, anin Haruna la guma men nerunta, anin kuru walafolu, Kafuxanŋo xumolu safeta mennu xan. 5I xa meleke danfatanma fula dara, x'e lalo wo waxande xan. Wolu mu taagumanseedo le ti x'a yita xo Ala be non. I danfatanŋolu tunnu be tosabanin junube yaafa sadaxo bodula kunna. Bari wo kuwolu bee ɲafowaxato nte saasa ti. 6Alabatusuba tillisima nin a xonofenŋolu bee tobenninŋo xo, sadaxalasibaxolu si dun dula folo xono lun wo lun, xa i la baaro ke. 7Bari sadaxalasibaxa kuntigiba kilin doron si dun dula fulananŋo xono sinɲa kilinpe doron san wo san. A me dun je marafen jelo xo. A si wo lasi Ala ma, a fan nin moxolu la filolu nin i la junubolu yaafo xanma. 8Wo ɲa ma, Ni Senunŋo b'a yitala n na, xo dula Senumanba silo man dayele folo, fo Alabatusuba tillisima folo xa bo je tumo men. 9Ɲin bun folo in mu bi waxati in kuwolu taagumanseedo le ti. A b'a yitala n na xo nilifen sadaxolu nin marafen sadaxolu tunnu me i bobaxolu jusukunŋo senuya no. 10Wolu nte fen xotelu ti fo domolifenŋolu nin minfenŋolu, anin jilasenuyalo ɲasifa kiika. Wolu bee tunnu mu hadamadin laado lelu ti, mennu sigita i kunna fo waxato men, Ala nata fenŋo bee yelema. 11Bari Kirisita nata xa ke sadaxalasibaxa kuntigiba ti, walasa ntelu xa Ala la fen ɲumalu soto. Kirisita dunta Alabatusuba tillisima men xono, wo be folo ɲa, a be dafanin a ti. Moxo man wo lo, ɲin duniya in ta du nte. 12Kirisita dunta dula Senumanba sinɲa kilinpe le. A waseta ten fo abada. A nin bakoton jelu nin ɲinsirin jelu man dun je. A x'a fan jelo le di xa n kunbo, xa n bo n na junubolu xono. Wo kunbolo barako nte banna fo abada. 13Awa, moxo mennu be noxonin Ala ɲa xoto, bakotonŋolu nin tuuralu jelo anin ɲinsi janininŋo buguto tunnu be kela wolu xan x'e banto to senuya. 14Bari Kirisita jelo ken, wo si senuyalo ke xa tanbi wo xan bete bete. A x'a fan di Ala ma, xa ke sadaxo ti, fe nte men na, Ni Senunŋo barako to, wo men be je fo abada. A jelo si n jusukunŋo senuya xa bo ku nafantanŋolu xono, walasa n xa baaro ke Ala nilama ɲen. 15Awa, wo le x'a tu, Kirisita keta Ala nin moxolu te Kafuxan Kuta telabenbaxo ti. A sata xa ke junubolu sara ti, mennu keta Kafuxan folo xoto. Wo keta, walasa Ala xa mennu kili, wolu si Ala la neemafen banbalolu soto ke ti, a tun xa mennu lahido ta wolu ɲen. 16Nin moxo do xa safe ke jannin a xa sa, safe men b'a yitala a ke xa xan xa tala ɲa men, waajibo le mu a tigo xa sa folo. 17Wo safe me labaara no x'a safebaxo nilama tu. Nin a sata le mu a si labaara. 18Awa, wo le x'a tu, haali Kafuxan folo du man sigi x'a tara jelo man bon. 19Musa xa sariya xumolu bee fo jama ɲen tumo men, a xa ɲinsirinŋolu nin bakotonŋolu jelo ta, xa jiyo ta, xa do sari sariya Kitaabo nin jama bee xan, hisope yiribulo nin saaxati wulenŋo la. 20Wo xo, a xo: «Ɲin jelu in mu alu nin Ala te Kafuxanŋo taagumanseedo le ti, Ala xa men nabatulo waajibiya alu ma.» 21Wo ɲa kilinŋo ma, Musa xa jelo sari sari Alabatusuba tillisima nin Ala batulimiranŋolu bee ma. 22Sariya la, jelo le be fenŋolu tala bee senuyala. Nin jelo man bon, junubeyaafo me soto. 23Alabatusuba tillisima xonofenŋolu tunnu mu sanxulo xono fenŋolu taagumanseedo le ti. Awa, nin sanxulo to fenŋolu taagumanseedolu tunnu xa xan xa senuya ten, sanxulo fenŋolu fannu maakuwo be senuya xote la, men be wolu ta ɲa. 24Kirisita dunta bun senumanŋo men xono, moxo bulu man wo lo. A dunta bun senuman soobe le xono, men nte taagumanseede gansan ti. A dunta sanxulo fan ne xono, walasa x'é lo Ala ɲa xoto saasa, ntelu ɲen. 25A man dun je walasa x'a fan ke sadaxo ti sinɲa kiika ti, í xo sadaxa­lasibaxa­ kuntigiba be dunna dula Senumanba xono ɲa men san wo san, a nin jelo, men nte a fan jelu ti. 26Nin wo nte, Kirisita tun xa xan xa tooro sinɲa kiika, kabirin duniya data. Bari saasa, duniya laban in na, a nata ke sadaxo ti sinɲa kilin doron, walasa xa junubo ban a fan sadaxalo la. 27A lategeta xo moxolu xa sa sinɲa kilin doron, wo xo, Ala si kiito tege i xan. 28Wo be ɲa men, Kirisita du keta sadaxo ti sinɲa kilinpe, walasa xa moxo kiika la junubolu bo je. A si na tugun; wo nte junubeyaafo xanma ti tugun, bari a be nala a laxonobaxolu kisilo le xanma.

will be added

X\