HEBUROLU 8

1N be xumo men fola, wo xulo fele xo, ɲin ɲoxon sadaxalasibaxa kuntigiba be n kun, a be siginin sanŋo to, mansasigilanŋo xan, noorotigi Ala kininŋo xoto. 2A be baaro la bun senumanŋo men xono, wo mu Alabatusuba tillisima soobe le ti, moxo man men lo. Marigi le mu wo lobaxo ti. 3Sadaxalasibaxa kuntigibalu bee be lasigila le walasa xa nilifen sadaxolu nin sadaxa tolu lasi Ala ma. Wo xanma, waajibo le tun mu Kirisita du xa do bo. 4Nin a tun be duguxulo xan, a tun me haali ke sadaxalasibaxa ti, bawo sadaxalasibaxa xotelu be je, mennu be nilifen sadaxolu lasila x'a la sariya xan. 5Wolu la sadaxalasibaxaya baaro mu sanxulo ta ladigibaaro nin i taagumanseedo le ti. Kila Musa be Alabatusuba tillisima lola tumo men, Ala x'a fo a ɲen xo: «Nte xa men yita í la kuro xan, a ke wo ɲoxonŋo ti.» 6Bari saasa, Kirisita la baaro xa bun sadaxalasibaxa tolu ta ti bete bete; bawo Kafuxanŋo men xa fisa folo ti, Isa keta telabenbaxo ti Ala nin moxolu te wo to. Wo Kafuxanŋo be siginin lahidolu xan, mennu xa fisa. 7Nin fe tun man je Kafuxan folo la, kun tun me ke a la xa fulanan bula a no to. 8Bari Ala xa jalago le soto a la moxolu ma, men x'a bula a fola xo: «Lunŋo be nanin, nte si kafuxan kuto do sigi nte nin Banisirayila moxolu nin Yuda moxolu te. 9Wo me ke í xo ń tun xa men ke ń nin i mamaxelu te, ń x'e muta i bulolu ma lun men, x'e labo Misira. I man wo kafuxanŋo labatu. Wo xanma, ń man ń hakilo tu i kun tugun. Marigi xo ten. 10Wo lunŋolu tanbo xo, nte be nala kafuxanŋo men sigila ń nin Banisirayila moxolu te, wo fele: Nte si ń na sariyalu sigi i hakilo la, x'e safe i sondonmekunŋo la. Nte si ke i la Ala ti, i si ke nte la moxolu ti. 11Moxo si me a jamanadinɲoxo walla a badinŋo laxaran xo: “Marigi lon”. Bawo i bee si nte lon, moxoba fara moxondin xan. 12Nte s'i la tilinbaliyakuwolu yaafa, ń me ń hakilo tu i la junubolu la bitugun.» 13Ala xa Kafuxan Kuto xumo fo tumo men, wo xa Kafuxan folo ke xotomanŋo ti. Awa, Kafuxan folo men xotota, nin a waxato tanbita, wo xa xan xa lasanko.

will be added

X\