HEBUROLU 7

1Wo Melikisedeki tun mu Salemu mansaxe nin Ala Xototaninba la sadaxalasibaxo le ti. Burehima tun taxata mansaxe dolu kele x'e no. X'a boto tu non, Melikisedeki x'a kunben xa duwa a ɲen. 2Burehima xa fen wo fen soto wo kelo to, a xa wolu bee jakko di a ma. Melikisedeki xoto le xo «tilinninɲa mansaxe». Anin du, Salemu mansaxe le tun mu. Wo xoto xo «heero mansaxe». 3Moxo man fa nin na nin buruju lon a ma. A bangexuma nin a sayaxuma man fo dula si. A be le í xo Ala Dinxe: A mu sadaxalasibaxo ti fo abada. 4Alu a mafele Melikisedeki xa bun ɲa men. N mamaxe Burehima xa fenŋo mennu soto kelo to, a xa wolu to fen ɲalamalu jakko di a ma. 5Lewi bonsonŋo moxo mennu mu sadaxalasibaxolu ti, yanmaro be wolu bulu, sariya la, xa jakko muta Banisirayila dinŋolu la, nin wolu mu i fannu badinŋolu ti, haali x'a tara wolu dulu mu Burehima bonsonŋo lelu ti. 6Melikisedeki tun nte Lewi bonson ti, bari a xa jakko muta Burehima la. Ala tun xa lahido ta moxo men ɲen, nin wo mu Burehima ti, Melikisedeki duwata wo ɲen. 7Awa, duwawo kebaxo le xa bun duwawo be kela men ɲen ti. 8Lewi bonsonŋo moxo men tunnu be jakko mutala, wolu tunnu mu moxolu ti, mennu be sala. Bari Melikisedeki men xa jakko muta Burehima la, a fota ate la kuwo to xo a be í nila. 9N si a fo xo Lewi bonsonŋo mennu xa jakko muta, wo dulu xa jakko bo x'a di Melikisedeki ma, i mamaxe Burehima la dinmalo to. 10I xa jakko di Melikisedeki ma, bawo haali nin Lewi tun man wulu wo tuma, a tun be a mamaxe Burehima tiyo to, Melikisedeki xa wo kunben tumo men, xa jakko muta a la. 11Sariya men dita Banisirayila dinŋolu ma, Lewi bonsonŋo la sadaxalasiyo le tun mu wo sigixulo ti. Nin wo sadaxalasiyo baaro tun keta baara dafanin ti, kun tun me ke a la, sadaxalasibaxa xote xa na, a be í xo Melikisedeki keta ti ɲa men. Sadaxalasibaxolu tunnu si tu xa bo Lewi xabiilo la doron, í xo Haruna. 12Awa, nin sadaxalasibaxaya yelemata, sariya du xa xan xa yelema. 13Wo kuwolu fota n Marigi men na kuwo to, wo bota bonson xote to, mennu bada man sadaxalasibaxaya ke. 14Sikka nte a to xo Marigi mu Yuda bonsonŋo do le ti. Kila Musa xumata sadaxalasibaxolu xan tumo men, a man fen fo Yuda bonsonŋo la kuwo to. 15Isa keta sadaxalasibaxa xote ti í xo Melikisedeki. Wo keta sabaabu ti x'a toxoyiya xo Isa la sadaxalasibaxaya nin Lewi xabiilo ta nte sila la. 16Wo xoto, xo wo sadaxalasibaxo man sigi x'a la hadamadinŋolu la sariya sigininŋo xan; bari a la nilamaya men nte banna, a keta a ti wo le barako to. 17Bawo Ala la xumo b'a fola xo: «Í si tu sadaxalasibaxaya la fo abada, a be í xo Melikisedeki ta keɲa.» 18Wo ɲa ma, sariya xoto bulata, bawo barake tun nte a la xa moxolu kisi, nafa du nt'a la. 19Kila Musa la sariya man sin xa fen si ke fen dafaninŋo ti. Bari saasa, n xa gigi ɲalama soto, men si a tu n s'i sutiya no Ala la. 20X'a kafu wo bee ma, Ala x'é xali. Tolu keta sadaxalasibaxolu ti, x'a tara Ala man í xali. 21Bari Isa be kela sadaxalasibaxo ti tumo men, Ala x'é xali ten xo: «Nte Marigi Ala xa ń xali, nte me ń xumaxanŋo bo a ma: “Í si tu sadaxalasibaxaya la fo abada.” » 22Wo le x'a tu, Isa keta telabenbaxo ti Kafuxanŋo men to, wo xa fisa folo ti. 23Fen xote be je men x'e tala: Sadaxalasibaxa tolu siyata, bawo saya tun b'a tula i me taxa no ɲa i la baaro la. 24Bari Isa be í nila fo abada, a be tula sadaxalasibaxaya la kadawu. 25Wo le x'a tu, mennu je i sodun Ala la, ate la kafuɲoxoya fe, a sinŋo b'a ɲen xa kisili banbalo di wolu ma, bawo a b'é nila kadawu, xa Ala matara i ɲen. 26N maakuwo tun be sadaxalasibaxa kuntigiba men na tigi tigi, Isa le mu. A xa senu, fe nte a la, junube nte a la. Ala x'a tala junubekelalu ma, x'a xotota bete fo sanxulo to. 27A maaku nte a la xa sadaxa bo lun wo lun, a fan na junubolu xanma folo, wo xo xa sadaxolu bo moxo tolu la junubolu xanma, í xo sadaxalasibaxa kuntigiba tolu tunnu b'a kela ɲa men. A x'a fan di xa ke sadaxo ti tumo men, a xa wo ke sinɲa kilinpe le. A waseta ten fo abada. 28Musa la sariya tun xa moxo mennu lasigi sadaxalasibaxa kuntigibaya la, wolu tunnu mu moxo dafabalo lelu ti. Bari Ala x'é xali xa xumo men fo sariya xofe, wo keta a Dinxe lasigilo ti sadaxalasibaxa kuntigibaya la, wo men xa bunɲa dafaninŋo soto fo abada.

will be added

X\