HEBUROLU 6

1Wo ɲa ma, xaranŋo mennu be kela lannaya damuto, alan xa tanbi wolu xan, xa taxa ɲa xaranŋo la, men mu lannayabaxa moninŋolu ta ti. N man xan xa alu xaran fenŋo mennu la tugun wolu fele: X'é xodi kewale jaxolu la, xa la Ala la, 2batiselolu nin bululanxanŋo, xa Ala matara moxolu ɲen, nin furekuniyo kuwo, anin kiiti labanŋo kuwo. 3Alan xa taxa ɲa! N be nala wo le kela nin Ala sonta. 4Moxo mennu be i koppala i jigo xotolu ma, wo be di? I xa Ala la keneya soto xa ban. I xa Ala la nilifenŋo nene, xa Ni Senunŋo soto. I x'a je xo Ala la xumo xa ɲin, i xa sinin duniya sintigiya nene. Bari wo bee xan, i saagita i jigo xotolu ma. A me no x'e lana lannaya ma tugun, bawo a be le í xo i xa Ala Dinxe layele gengenyiro xan tugun, x'a lamalu moxolu bee ɲala. 7Sanjiyo be nala duguxulo men xan xa siya, nin a xa senefenŋolu lafalin a senebaxolu ɲen, wo duguxulo si Ala la neemo soto. 8Bari nin wo duguxulo xa ŋanin tuwolu nin bin ŋaninma lelu labo, a me fusi ɲiɲa, a nin Ala la dango soto te man jan. A labanŋo la, ta si a jani. 9Ń badin xanuninŋolu, haali nin n be xumala ten, n be lanin a la xo alu be sila beto xan, nin wo mu kisilo silo ti. 10Ala nte kuɲumalonbali ti, a me ŋina alu la kebaaro kun, bawo alu x'alu la xanuya yita a la, alu badin lannayabaxa tolu maakuwo ɲiɲalo fe. Haalibi du, alu be wo kela. 11Bari men xa di n ɲen, wo mu le alu bee balanninŋo xa tu fo labanŋo lunŋo, walasa alu gigo be men xan, alu xa wo xoyimanŋo soto. 12Alu xana ke salabaxantunnu ti, bari moxo mennu be lannaya kela x'e timinadiya, xa Ala la lahidufenŋo soto ke ti, alu ke wolu ladigibaxolu ti. 13Ala xa lahido ta Burehima ɲen tumo men, a x'é xali a fan toxo la, bawo fen nte je men xa bun ate fan ti, a tun si í xali men na. 14A xo: «Ń si duwabete í ɲen, xa bonson kiika di í ma.» 15Burehima muɲata, xa Ala laxono. Ala xa men lahido ta a ɲen, a xa wo soto. 16Nin moxolu b'e xalila, i si wo ke fen na, men xa bun i ti. Xalilo mu soosolo bee dafaxalanŋo le ti. 17Men tunnu xa xan xa Ala la lahidufenŋolu soto ke ti, a xa xalilo la a la lahido xan, walasa x'a laxoyiyabete wolu ma, xo a xa lahido men ta, wo me bo a ma. 18Ku fula be je, mennu me bo no a ma, nin wo mu Ala la xalilo nin a la lahido ti. Wo lelu b'a yitala xo Ala me faniya fo. Wo ɲa ma, ntelu mennu x'e xarifa a ma, wolu si n jusudun bete, xa n bulo xutu wo gigi foninŋo ma. 19Wo gigo mu ntelu la nilamaya tonte le ti, í xo negeba men be batonŋo tomutala jiyo xan. A be barakenin, a be lonin bete. Wo gigo tanbita Alabatusuba totegefaano la, xa dun fo xono to. 20Isa dunta non ntelu ɲa, anin ntelu ɲen. Ate keta sadaxalasibaxa kuntigiba ti fo abada, í xo Melikisedeki ta keɲa.

will be added

X\