HEBUROLU 5

1Awa, sadaxalasibaxa kuntigiba fen wo fen be sugandila hadamadinŋolu to, Ala be wo lasigila x'a bula a la baaro la, walasa a xa moxo tolu deema. Moxolu be fenŋo mennu dila Ala ma, anin i la sadaxolu, a si wolu lasi Ala ma i la junubolu koso. 2Moxo mennu man Ala la sariya lon, anin mennu be filila xa Alasilo bula, sadaxalasibaxa kuntigiba si hinna wolu la, bawo ate du fan mu wolu ɲoxon barakentan ne ti. 3Wo xanma, a xa xan xa sadaxo do bo a fan na junubolu xanma, í xo a b'a bola jama ta xanma ɲa men. 4Moxo si me don bunɲa di no í fan ma xa ke sadaxalasibaxa kuntigiba ti. Ala le be í kilila a xanma, í xo a xa Haruna kili a xanma ɲa men. 5Wo be ɲa men, Kirisita du man a fan bunɲa, xo ate be kela sadaxalasibaxa kuntigiba ti a fan ma. Ala le x'a ke a ti. A x'a fo Kirisita ma xo: «Ite le mu ń Dinxe ti, kabirin bi nte keta í Fa ti.» 6Ala x'a fo Kirisita ɲen Kitaabo dula xote xo: «Í mu sadaxalasibaxo ti fo abada, a be í xo Melikisedeki ta keɲa.» 7Isa tun be duguxulo xan waxato men, a tun x'a lon xo sinŋo be Ala ɲen x'a kisi saya ma. A xa Ala matara, x'a matara barako to, fo xa xasixanba nin ɲajiyo labo. Ala x'a la taralo jaabi a la Alaɲasilanɲa xanma. 8Haali x'a tara a mu Ala Dinxe le ti, wo bee nin a ta, a x'a digi xa Ala sago ke tooro xono. 9Wo ɲa ma, a xa bunɲa dafaninŋo soto tumo men, mennu bee be a sago kela, a keta wolu ɲen kisili banbalo sabaabubaxo ti. 10Ala x'a fo xo a mu sadaxalasibaxa kuntigiba ti, í xo Melikisedeki ta keɲa. 11Awa, n badinŋolu, fen kiika be n ma x'a fo alu ɲen wo xan, bari a xa xole x'alu lafaamu a kuwo la, bawo alu lafaamu man di. 12Saasandin in tun xa xan x'a tara xo alu keta karanmoxolu ti, bari haalibi alu maakuwo b'a la x'alu laxaran Ala la xumo ku fololu ma. Alu be le í xo deenano, alu me domoli xulin domo no fo nono doron. 13Moxo men me fen xote domo no fo nono, wo mu deenano le ti, a man ku tilinnin lon. 14Bari domoli xulinŋo mu moxoba lelu ta ti. Wolu x'a digi dalinno fe, xa ɲuma nin jaxumanŋo faranfansi, x'e bo i ɲoxo to.

will be added

X\