HEBUROLU 4

1Ala la lahido be je haalisa xo a si n nadun a la dula, n na tofoɲo xanma. Wo to, alan xa sila moxo si dunbalo xana tu alu to. 2xibaru Dimanŋo waajulo keta n ɲen ɲa men, a keta n mamaxe dulu ɲen wo ɲa in. Bari a man fusi ɲiɲa wolu ɲen, bawo i x'a me tumo men, i man a muta lannaya to. 3Ntelu mennu xa lannaya ke, ntelu si dun wo tofoɲodula. Ala xo n mamaxelu ɲen wo tofoɲodula la kuwo to xo: «Nte diminta xa ń xali xo, Nte xa jamano men toben i la tofoɲo xanma, i me dun non abada.» Ala xa wo xumolu fo, x'a tara a tun xa wo tofoɲodula nin fenŋo bee da xa ban kabirin duniya da tumo. 4A fota Kitaabo dula do, tili woorowulananŋo la kuwo to xo: «Ala x'a la baaro bee ke x'é soto tumo men, tili woorowulananŋo a x'é tofoɲo.» 5Wo dula kilinŋo Ala xo tugun xo: «Nte xa jamano men toben i la tofoɲodula xanma, i me dun non abada!» 6Awa, mennu fololu xa Xibaru Dimanŋo me, wolu man dun Ala la tofoɲodula bawo i man a lame. Bari wo bee nin a ta, moxo xotelu si dun no wo dula. 7Wo le x'a tu, Ala xa lun xote sigi, nin wo mu «bi» ti. Waxati jan tanbita, wo xo, a xa wo xumo dun mansaxe Dawuda da, xumo men nin n birin a fola xo: «Nin alu xa Ala xumaxanŋo me bi, alu xana alu sondonmo xoleya.» 8Awa, Ala xa tofoɲodula men lahido ta, nin Yosuwe tun sinta xa Banisirayila dinŋolu ladun non, Ala tun me lun xote la xumo fo tugun. 9Wo ɲa ma, Ala x'é tofoɲo tili woorowulananŋo ɲa men, wo ɲoxon tofoɲo be Ala la jama du ɲen. 10Bawo moxo men je dun Ala la tofoɲodula, wo s'í tofoɲo a la baarolu la, í xo Ala x'é tofoɲo a talu la ɲa men. 11Alan x'e balan xa dun wo tofoɲodula, walasa moxo si dunbalo xana tu í xo Ala foxanmutabalolu dunbalo tuta ɲa men xotonin. 12Ala la xumo mu fen nilama le ti. Barako b'a to, a da xa di xa tanbi fan dafulo xan. A si dun fo xa si moxo subo nin a niyo te ma, fo xa si xulukunŋolu nin senbo te naaniyo ma. A be moxo sagolakuwolu nin a miirilakuwolu segesegela x'e lon. 13Dafen si nte dugunin Ala ma. Fenŋo bee balamaxulunŋo nin i feeneninŋo le be a ɲa xoto. N bee be nala i ɲafola ate le ɲen. 14Sadaxalasibaxa kuntigiba be n kun. Wo mu Isa le ti: Ala Dinxe, men yeleta fo sanŋo to. Wo xanma, alan xa tu sinsinnin n na lannaya xan, lannaya men, nin n b'a foxan. 15Sadaxalasibaxa kuntigiba men be n kun, wo nte moxo ti men me hinna n na, xa n deema n na barakentanɲa to. N na sadaxalasibaxa kuntigiba fan xotobota ɲa bee do ma í xo ntelu, bari a man junube ke. 16Wo xanma, alan x'e sodun neematigi Ala la, siginin a la mansasigilanŋo xan, lannaya jonjonŋo to, walasa n x'a la hinno nin a la neemo soto, walasa n xa deemalo soto a tumo to.

will be added

X\