HEBUROLU 2

1Wo le x'a tu, n xa kuwo mennu me, n xa xan xa i hakilo tu wolu la bete, walasa n xana sanko. 2N x'a lon xo melekiyolu xa xumo men fo, wo keta tonɲa ti. Mennu xa wo xumolu sooso, x'e fili i xo, Ala xa wolu bee sara i la kebaarolu la, i nin sara men xa xan. 3Marigi xumata kisiliba men xan, nin n man wo muta barako to, n si kisi no ɲa di Ala la ɲangilo ma? Marigi fan folo xumata n ɲen wo kisilo xan. Wo xo, mennu xa Marigi lame, wolu x'a laxoyiya n ma xo tonɲa le mu. 4Ala du xa i la seedeyalolu sinsin taagumanseedolu nin kubalu nin kawaku sifa bee do kelo la. A xa Ni Senunŋo la solifenŋo dulu di i ma, x'a la a fan sago xan. 5Awa, n be xumala sinin duniya men na kuwo la, Ala man wo kuntigiya di melekiyolu ma. 6Bari moxo do xumata wo xan Kitaabo dula do la xo: «Ala, moxo mu mun ti, nin í be í miirila a la kuwo la? Hadamadinŋo mu mun ti, nin í be í hakilo tula a kun? 7Í x'a doxoya melekiyolu ti waxatindin xono, wo xo, í x'a xotota xa nooro nin bunɲa di a ma, 8x'a lasigi fenŋo bee kunna.» Nin a fota xo Ala x'a lasigi fenŋo bee kunna, wo xoto le, xo fen nte je, a nte men kunna. Wo bee nin a ta, n ɲa nte a la saasa xo sinŋo bee dita a ma xa sigi fenŋo bee kunna. 9Bari n x'a je xo: Isa doxoyata melekiyolu ti waxatindin xono, walasa a xa sa moxolu bee ɲen, Ala la neemo barako to. Bari saasa n x'a je xo Ala xa nooro nin bunɲa la Isa xan, a la tooro nin a la saya xanma. 10Tonɲa la, Ala le xa fenŋo bee da, anin ate le be fenŋo bee tomutanin. A tun xa xan Ala xa Isa la bunɲa dafa wo toorokuwolu la. Wo keta walasa moxo kiika xa ke Ala dinŋolu ti, xa dun a la nooro xono. Wo ɲa ma, Isa le mu i la kisilo sabaabo ti. 11Isa men be moxolu senuyala i la junubolu ma, anin mennu be senuyala, ate nin wolu bee be Fa kilin ma, nin wo mu Ala ti. Wo le x'a tu, Isa man maluya xa wolu kili xo a badinŋolu. 12Wo le x'a tu, a xo: «Ala, nte si í yita ń badinŋolu la, nte s'í tantu donkilolu la, í la jama bee ɲala.» 13A xo du xo: «Nte si ń gigo la Ala xan.» Anin du a xo: «Ala xa dinŋo mennu di nte ma, nte nin wolu fele.» 14Awa, Isa xa dinŋo mennu kisi, wolu mu jelo nin balasubo ti ɲa men, wo ɲa ma, Isa du keta i ɲoxon ti, a keta jelo nin balasubo ti. A keta i ɲoxon ti, walasa saya barako be men bulu, nin wo mu Sentane ti, a xa wo joroxi a fan na saya fe. 15Wo keta walasa mennu be Sentane la jonɲa la, i siyo bee xono, saya ɲasilanɲa bulu, a xa wolu kunbo. 16Tonɲa, Isa man na xa melekiyolu deema de; a nata Burehima bonsonŋo le deema. 17Wo le x'a tu, a tun xa xan xa ke a badinŋolu ɲoxonŋo ti, walasa a xa ke sadaxalasibaxa kuntigiba hinnantunŋo nin xantigo ti Ala la baaro to; walasa x'a la moxolu la junubolu bo je. 18Wo ɲa ma, mennu be xotobolo xono, Isa si sin xa wolu deema, bawo a fan toorota xa xotobo.

will be added

X\