1 Haalibi alu taxa ɲa xa i ɲoxo xanu í xo badinmalu. 2 Alu xana ŋina luntannajigo kun. Dolu keta luntannajigila ti, fo i xa melekiyolu jigiya x'a tara i man a lon. 3 Alu i hakilo tu kasolamoxolu kun, x'a ke í xo nin alu dulu nin i be kaso la le i ɲoxo fe. Alu i hakilo tu moxo tooroninŋolu kun, x'a ke í xo nin alu fannu balo lelu je tooroxan. 4 Bee xa futuwo bunɲa. Futuɲoxomalu xa dan i ɲoxo ma, bawo Ala si kiito tege fuyanŋolu nin jadolu xan. 5 Naafulukunteya xana ke alu jigo ti. Men be alu bulu alu muta ke wo ti, bawo Ala fan xo: «Nte me ń xodi í la, ń me ń bulo bo í xoto muume.» 6 Wo le x'a tu, n hakilo lategeninŋo si a fo xo: «Marigi le mu ń deemabaxo ti, ń me sila fusi ɲa. Moxolu si mun ke no ń na?» 7 Alu i miiri alu la ɲamoxo fololu ma, mennu xa Ala la xumo fo alu ɲen. Alu i miiri i la nilamaya labanɲa ma, x'e la lannaya ɲoxon ke. 8 Isa Kirisita mu men ti kunun, a mu wo le ti bi, a nte yelemala fo abada. 9 Alu xana son moxo x'alu lafili sila xotelu la. A xa bete Ala la neemo le xa do kafu n juso ma. Sariya mennu be xumala domolifenŋolu doron xan, wolu me fen kafu no n juso ma. Mennu xa wo sariyalu labatu, a man fusi ɲiɲa wolu ɲen. 10 Sadaxalasibaxo mennu be baaro kela Yahudiyalu la Alabatusuba tillisima xono, a man dage wolu ɲen i xa n na sadaxajanidula fen domo. 11 Anin du, sadaxalasibaxa kuntigiba tun nin marafenŋo mennu jelo be dunna dula Senumanba junubeyaafo xanma, wo marafenŋo tunnu subo be janila le xa ban sigidula xoxan. 12 Wo le x'a tu, Isa du toorota xa sa gallo xoxan, walasa a xa moxolu senuya a fan jelo la. 13 Wo to, alan xa bo xa si a ma gallo xoxan, x'a la doxoyalo ɲoxon muɲa. 14 Bawo gallu nte n kun duniya in to jan, n si tu men xono tuma bee; gallo men be nanin xa bo Ala bata, n be wo le ŋininna. 15 Isa Kirisita barako to, alan xa Ala tantu tuma bee, xa wo ke n na sadaxa bota ti; wo xoto xo n x'a toxo bunɲa n da la tuma bee. 16 Alu xana ŋina kubeteko kun, anin ɲoxo deema, bawo wo ɲoxon sadaxa lelu xa di Ala ɲen. 17 Al'alu la ɲamoxolu bunɲa, xa xulu i ɲen, bawo i lelu mu alu niyolu korosibaxolu ti. Ala be nala i lelu ŋininxala alu la kuwo la sinin. Alu wo ke, walasa i x'e la baaro ke nitodiya to, i xana a ke jusuxaso to. Nin i x'a ke jusuxaso to, nafa si nte alu ɲen wo la. 18 Alu Ala matara n ɲen. N be lanin a la xo jusukun beto be n na, bawo n b'a fe n bosilo xa ben kuwo bee to. 19 Ń b'a xoleyala alu ma xo alu xa Ala matara nte ɲen, walasa nte xa saagi alu bata junna. 20 Heeratigi Ala xa n Marigi Isa Kirisita lakuni xa bo furelu to. A jelo bonta xa ke Kafuxan banbalo sadaxo ti. Wo xanma, a keta Ala la saaxolu korosibaxaba ti. 21 Ala mu ku ɲuma bee ko sinŋo dila alu ma, walasa alu x'a sago ke. Ala mu a fan diyanɲekuwolu bulala n sondonmo la, Isa Kirisita barako to. Nooro xa la Isa xan fo abada. Amiini. 22 Ń badinŋolu, ń be alu matarala xo alu xa muɲa xa ɲin tonbennixan innu lame. Ń xa men fan safe, wo man jan. 23 Ń be alu lalonna a la xo n badinxe Timote bulata. Nin a nata junna, ń nin a si taxa alu je. 24 Al'alu la ɲamoxolu nin Ala la jama moxolu bee xonton. N badinŋo mennu be Itali jamano to, wolu be alu xontonna. 25 Ala la neemo xa ke alu bee fe.
