HEBUROLU 12

1Ń badinŋolu, ɲin lannayabaxa jamaba in be n namininnin. Wo xanma, fen wo fen si n bali xa taxa ɲa lannaya taxamo to, alan xa wolu bee bula. Alan xa junubo bula, wo men xa tari x'é noto n na. Ala xa n bula boro men na, alan x'e balan wo boro to. 2Alan x'e ɲa tu Isa to, n na lannaya damuto nin a labanŋo be men bulu. A xa gengenyiro xan saya muɲa. Maluya men be gengenyiro xan saya la, a man wo jaate; bawo ɲaxalo men tun b'a ɲen wo xo, a ɲa tun be wo le to. Saasa a be siginin mansasigilanŋo xan, Ala kininŋo fe. 3Ate men xa ɲin ɲoxon tooro muɲa kujaxukelalu bulu, alu i miiri ate ma, walasa alu xana sege, anin alu juso xana doxoya. 4Alu man junubo kele folo fo wo kelo xa si saya ma. 5Men x'alu tonben í xo fa b'a dinŋo tonbenna ɲa men, wo la xumo bota alu xono ba? A xo: «Ń din, nin Marigi xo x'a be í latilinna, í xana wo bataramuta. Í balo xana faxa í ma, nin a x'é laxosi. 6Bawo Marigi be men xanula, a si wo latilin, dinŋo fen wo fen na kuwo xa di a ɲen, a si wolu bee busa.» 7Alu Ala la latilinni guma muɲa; bawo Ala be alu jaatenin a dinŋo lelu ti. Din joman be je nin a fa nte a latilinna? 8Dinŋolu bee be latilinna le. Nin alu man natilin, alu nte yeerewulu ti, alu nte din soobelu ti. 9Alan x'e miiri n falu ma duguxulu in xan jan. I xa n natilin, n dulu x'e bunɲa. N man xan ba xa xulu bete bete n Fa men be sanŋo to le ɲen, walasa n xa nilamaya soobe soto? 10N fa mennu be duguxulo xan xa n natilin waxatindin, i fannu hakiliya la; bari Ala be n natilinna n na nafa le xanma, walasa n xa senuya í xo ate xa senu ɲa men. 11Moxo si me ɲaɲa a be latilinna tumo men, a be jusula le. Bari wo keta mennu ɲen xaran ti, a si falin heero nin nilamaya tilinninŋo la wolu ɲen. 12Wo le x'a tu, alu niyo ke alu fannu to, alu xunbalinkunŋolu xa fata jarajarala. 13Alu i taxama sila tilinninŋolu xan; walasa alu sin yellaninŋolu xana silo bula, bari i xa kendeya. 14Alu a ŋinin benŋo xa ke alu nin moxo bee te, anin alu xa senuya; bawo nin alu man senuya, alu si ɲa me la Marigi xan. 15Alu i korosi moxo si xana í sinbo Ala la neemo to. Moxo si xana ke í xo yirililli xunimanŋo, baxo be men na. A si falin, xa moxo kiika xono fa a baxo la. 16Alu i korosi moxo si xana ke jado ti alu to, xa fen senumanŋolu toxosi í xo Esawu, wo men x'a la xotoniyo fiiri kini miran kilin na. 17Alu x'a lon xo a tun b'a fe x'a fa la duwa soto. Bari son man ke wo ma a ɲen. A man ɲa si soto a ma xa wo yelema, haali nin a xasito xa wo ŋinin. 18Alu man i sodun fen na, maxo tun si ke no men na. Wo tun mu Turusinna kuro le ti, ta fatinba nin dibo nin sanjifinba nin foɲoba, 19nin buutu foxanŋo nin xumaxanŋo tunnu be je. Banisirayila dinŋolu xa wo xumaxanŋo me tumo men, i x'a ŋinin xo xuma xana ke i ɲen tugun x'a kafu wo ma. 20Kankero men lata i ɲen xo: «Moxo wo moxo maxata wo kuro la, haali nin a keta marafenŋo le ti, wo xa bun kurolu la, x'a faxa», i man fatiya wo xumo ɲa. 21Wo kuwo men keta Turusinna kuro dula, wo tun mu silanɲa kuba men ti, fo kila Musa fan x'a fo xo: «Ń be jarajarala, silanɲa kujaxo bulu.» 22Bari atelu kennu x'e sutiya Siyon kuro le la, anin Ala nilama la galluba, nin wo mu sanŋo to Yerusaleme ti, anin a meleke wulu kiika. 23Ala la moxo bangenin folo mennu toxo safeta sanŋo to, alu x'e sodun wolu la jama la, mennu be ɲaxalo to. Alu x'e sodun Ala la, wo men be nala kiito tegela moxolu bee xan, x'e sodun moxo tilinninŋolu la, mennu sata nin i niyolu taxata Ala bata. 24Alu x'e sodun Isa la, wo men mu Kafuxan Kuto telabenbaxo ti, x'e sodun a jelo bonninŋo la, wo men jelo barako xa bun xa tanbi Abila jelo xan. 25Wo to, alu i korosi. Men be xumaxan alu ɲen, alu xana i ban xa wo lame. Mennu x'e ban x'e lasobibaxo lame duguxulu in xan, wolu man kisi Ala la ɲangilo ma. Wolu man kisi jan men, sakuta ken ntelu mennu xumanɲenbaxo be bola sanŋo to. Nin n x'e xodi wo la, n me kisi Ala la ɲangilo ma fewu. 26Xotonin, a xumaxanŋo xa duguxulo lajarajara; bari saasa, a xa ɲin lahidu in ta n ɲen xo: «Ń si duguxulo lajarajara sinɲa xote tugun; nte danna wo kilin ma, bari ń si sanxulo du lajarajara.» 27Ɲin xuma in xo: «Sinɲa xote tugun», wo b'a yitala xo dafenŋolu bee si jarajara, xa sanko, walasa fen jarajarabalolu xa tu je. 28Mansaya men fenŋolu nte jarajarala, n xa wo le soto. Wo le x'a tu, n xa xan xa Ala waleɲumalon, xa baaro ke a ɲen, x'a la a diyanɲo xan, a bunɲa nin a ɲasilanɲa xono; 29bawo n na Ala be le í xo ta, men si janilo ke.

will be added

X\