HEBUROLU 11

1Lannaya mu ɲin ne ti xo: Í gigo be fenŋo men xan, wo soto be xoyiyanin í ma; walla í ɲa nte fenŋo men na, í b'a yitanin xo í ɲa be wo la. 2Alan mamaxelu la lannaya le x'a tu, i la kuwo diyata Ala ɲen. 3N x'a lon lannaya le fe xo Ala xa duniya da a la xumo la. Wo ɲa ma, n ɲa be men na, nin wo mu duniya ti, Ala xa wo da fen jebalo la, nin wo mu a la xumo ti. 4Abila la lannaya le x'a tu, a xa nilifen sadaxo di Ala ma, men xa fisa Kabila ta ti. A la lannaya xanma, Ala x'a jaate moxo tilinninŋo ti, bawo Ala fan x'a seedeya xo a sonta a la nilifenŋolu to. Haali nin Abila sata xa ban, haalibi a be xumala n ɲen a la lannaya koso. 5Enoke la lannaya le x'a tu a sabalo tata xa taxa a ti Ala bata. Moxo si man a je tugun, bawo Ala x'a ta xa taxa a ti a bata. Kitaabo b'a fola xo jannin Enoke xa ta, xa taxa a ti sanŋo to, a la kuwo diyata Ala ɲen. 6Moxo si me diya no Ala ɲen nin lannaya nte í la. Moxo men b'a fe xa í sodun Ala la, a xa xan xa la a la, xo Ala be je, anin xo a si a ŋininbaxolu baraaji. 7Nuhun na lannaya le x'a tu, Ala x'a lasobi tumo men, xo kuwo do be nala kela, a xa Ala lame, x'a tara a ɲa man wo kuwo je folo. A xa xulunba dara walasa a nin a la dinbaya xa kisi. A la lannaya le x'a tu, kiito tegeta duniya xan, anin Ala xa ate jaate moxo tilinninŋo ti. 8Burehima la lannaya le x'a tu, Ala x'a kili tumo men, a sonta xa Ala la xumo muta. Ala tun be nala jamano do dila a ma ke ti. A bota a fan na jamano to, xa silo muta, x'a tara a man a lon a be taxala jan men. 9A la lannaya le x'a tu, Ala xa jamano men lahido ta a ɲen, a sigita non xa ke siginfe ti. A keta tilliso xono, í xo Nsiyaxa nin Yaxuba, lahidu kilin in tun tata wo men dulu ɲen. 10Burehima tun yilo be galluba soto ma, men mu gallu wulibalo ti. Wo gallo loɲa lategebaxo nin a lobaxo mu Ala le ti. 11Saran na lannaya le x'a tu, haali a xotonin banninŋo, a sinta xa dinŋo wulu, bawo Ala men tun xa wo lahido ta a ɲen, a lata a la xo wo mu xantigo le ti. 12Wo ɲa ma, a xe Burehima, men tun nte fusi xote laxononin nin saya nte, wo kilin xa bonson kiika soto í xo sanxulo ma loololu, anin xooxojida la keɲo, wo men me dan no. 13Wo moxolu bee sata x'e tu lannaya to. Ala tun xa fenŋo mennu lahido ta i ɲen, i man wolu soto folo. Bari i keta í xo nin i tunnu ɲa be i la dulajan, xa ɲaɲa i la. I fannu x'a fo i da la xo i mu luntanŋo nin siginfe lelu ti ɲin duguxulu in xan. 14Mennu la fo keta ɲin ti, wolu b'a yitala xo i be fasuwo do ŋininna. 15I bota jamano men to, nin i tunnu x'e miiri xa nimisi non ma, i tunnu si ɲa soto no x'e koppa non ma. 16Bari i tunnu be fasuwo do ŋininna men xa fisa, men be sanŋo to. Wo le x'a tu, Ala si son wo moxolu x'a kili xo i la Ala; bawo a xa gallo do toben x'a bula i ɲa. 17Burehima la lannaya le x'a tu, Ala x'a xotobo tumo men, a sonta x'a dinxe Nsiyaxa di, a xa ke sadaxo ti. A sonta a dinxe kilinpe xa ke sadaxo ti, x'a tara Ala tun xa lahido ta a ɲen. 18Ala tun x'a fo a ɲen xo: «Ń xa bonsonŋo men lahido ta í ɲen, wo be bola Nsiyaxa le to.» 19Burehima tun x'a jaate xo a sinŋo be Ala ɲen xa Nsiyaxa lakuni xa bo furelu to. Wo le x'a tu, Ala x'a dinŋo saagi a ma. A keta í xo nin a kunita le xa bo furelu to. 20Nsiyaxa la lannaya le x'a tu, a xa duwa ke Yaxuba nin Esawu ɲen, i sininŋo si ke men ti kuwo la. 21Yaxuba la lannaya le x'a tu, a sa tumo, a duwata Yusufu dinŋolu ɲen, anin a x'é tintin a la guma la, xa Ala batu. 22Yusufu la lannaya le x'a tu, a be nala sala tumo men, a xumata Banisirayila dinŋolu labo xan Misira jamano xono, anin a xumata a xulolu xa xan xa ke ɲa men a sa xofe. 23Musa bangebaxolu la lannaya le x'a tu, Musa wuluwo xo, i x'a dugu xaru saba xono, bawo i x'a je xo a xa keɲin. I man sila xa Misira mansaxe la ku lategeninŋo sooso. 24Lannaya le x'a tu, kila Musa bunɲaninma, a x'é ban a xa kili xo Farawuna dinmuso dinŋo. 25A nin Ala la moxolu xa tooro i ɲoxo fe, a xa wo fisiya don ti xa ɲaxali junubekuwolu la, mennu mu waxatindin ku ti. 26A x'a jaate xo xa doxoya í xo Kirisita doxoyata ɲa men, nafa be wo la xa tanbi Misira naafulo bee xan. Ate ɲa tun be fen xote le to, nin wo mu Ala la baraajo ti. 27Musa la lannaya le x'a tu, a bota Misira. Mansaxe tun diminta a xoto, bari a man sila wo ɲa. Ala men nte jela, a ɲa tun be wo le to. Wo xanma, a man yilanyilan. 28Lannaya le x'a bula Tanbinxansallo sigila, xa jelo sari sari bunda yirolu ma, walasa meleke halagilila xana maxa Banisirayila din fololu la. 29Lannaya le x'a tu, Banisirayila dinŋolu xa Xooxoji Wulenŋo tege í xo duguxulu jaro. Bari Misirangolu xo x'e be tegela tumo men, jiyo xa i bee domo. 30Lannaya le x'a tu, Banisirayila dinŋolu xa Yeriko tato laminin tili woorowula tumo men, a boyita tili woorowulananŋo lunŋo. 31Lannaya le x'a tu, jadomuso do keta je xo Arahabu, Ala foxanmutabalolu halagita xa ate tu je, bawo Banisirayila dinŋo mennu wulita xa taxa jamano mafele dibi to, a xa wolu mutakubete. 32Awa, ń si a fo di tugun? Waxati nte ń bulu xa xuma Jedewon nin Baraki nin Samuson nin Jefite nin mansaxe Dawuda nin Samuyeli nin kilalu xan. 33Lannaya le x'a tu, i xa mansayalu no, xa i taxama tilinninɲa silo xan, xa Ala la lahidufenŋolu soto, xa warabalu dalu taxun. 34I xa i dolu bula ta ɲaɲaninba to, bari ta man fusi ke wolu la. Dolu kisita fanŋo masiibo ma. I dolu tunnu barako xa doxo, bari i xa barako soto. Dolu keta xe fatinŋolu ti keledula, fo jamana xote keledinŋolu x'e bori i ɲa. 35Muso dolu la lannaya xanma, i la furelu kunita xa di i ma. Lannayabaxo dolu toorota fo xa doxola i faxala; bari wolu man son i xa bo bulo to. Wolu sonta saya ma, walasa i si kuni xa nilamaya soobe soto. 36Dolu sonta moxolu xa jele i ma, xa i buwo gaɲo la. Joloxo keta dolu la, xa i bula kaso la. 37I xa dolu bun kurolu la xa i faxa, xa dolu tokutun fula ti yiritege siyo la, walla xa i faxa fanŋo la. Dolu tunnu bulutoxulunŋo be taxala dula nin dula. Saaxagulo walla bagulo le tun mu i la dunfaanolu ti. Moxolu tunnu b'e toorola, xa i mutakujaxu. 38I jenjenninŋo tun b'e mininmininna fuxolu nin kurolu to, x'e dugu kuruwuwolu nin dinxolu xono; bawo duniya tun nin i man xan. 39Wo moxolu bee la kuwo diyata Ala ɲen i la lannaya le xanma. Wo bee nin a ta, Ala xa men lahido ta, i man wo soto folo. 40Ala tun xa fen xote le latege n bee ɲen, men xa fisa. Ala tun nte a fe wolu xa dafaninɲa soto ntelu xo.

will be added

X\