HEBUROLU 10

1Ala xa fenŋo mennu lahido ta n ɲen, wolu taagumanseedo doron ne be Musa la sariya xono. Sariya nte wo fenŋolu keɲa jonjonŋo yitala n na. Moxo mennu x'e sodun Ala la, xa wo sadaxa sifa kilin innu lasi a ma san wo san kadawu, sariya man wolu ke no moxo dafaninŋolu ti. 2Nin wo sadaxabobaxolu tunnu senuyata sinɲa kilin doron xa ban, i jusukunŋolu tunnu me i jalagi i la junube si kuwo to tugun. I tunnu si sadaxabo dabula. 3Bari a man ke ten. Wo sadaxolu kunŋo mu le, xa moxolu hakilo bula i la junubolu kun san wo san. 4Bawo tuura jelolu nin bakoton jelolu me junubolu bo no je abada. 5Wo le x'a tu, Kirisita be nala duniya to tumo men, a xo Ala ɲen xo: «Í xo xo í nte marafen sadaxa nin nilifen sadaxa fe, bari í xa balo dara nte ma. 6Sadaxa janitalu nin junube yaafa sadaxolu si man diya í ɲen. 7Wo tumo la nte xo: “Ala, nte fele, ń be nala í sago kela, í xo a fota ń na kuwo to sariya kitaabo to ɲa men.” » 8Awa, Kirisita x'a fo Ala ɲen folo xo: «Í nte marafen sadaxa, nin nilifen sadaxa, nin sadaxa janita, nin junube yaafa sadaxa fe, wolu man diya í ɲen.» Haali wo, i be sadaxala x'a la sariya la fo le xan. 9Wo xo, a xo du xo: «Ala, nte fele, nte be nala í sago kela.» Wo ɲa ma, a xa batuliɲa folo bo je, xa kuto bula a no to. 10Ala sago tun mu men ti, Isa Kirisita xa wo le ke. A x'a fan di Ala ma sadaxo ti sinɲa kilinpe, men barako nte banna fo abada. Wo xanma, n senuyata xa bo junubo xono. 11Sadaxalasibaxolu bee be i lola lun wo lun xa i la baaro ke. I be sadaxa kilin innu dila sinɲa kiika ti, mennu me junubolu bo no je abada. 12Bari Kirisita xa sadaxa kilinpe le lasi junubeyaafo xanma, men barako nte banna fo abada. Wo xo, a x'é sigi Ala kininŋo xoto. 13A be tula non fo Ala x'a jaxolu mano xa na i ti a sinŋo xoto. 14Wo ɲa ma, mennu senuyata xa bo junubo xono, a xa wolu ke moxo dafaninŋolu ti fo abada, a la sadaxa kilinŋo barako to. 15Ni Senunŋo du be wo kuwo seedeyala n ɲen. A x'a fo xo: 16«Marigi xo: Wo lunŋolu tanbo xo, nte be nala Kafuxanŋo men sigila ń nin i te, wo fele: Nte si ń na sariyalu safe i sondonmekunŋo la, x'e sigi i hakilo la.» 17Wo xo, a xo du xo: «Ń hakilo me jigi i la filolu nin i la junubolu la tugun.» 18Nin junubolu yaafata xa ban, kun nte a la tugun xa sadaxa bo junubeyaafo xanma. 19Awa ń badinŋolu, Isa jelo men bonta, wo barako xanma, n hakilo lategeninŋo si dun no saasa dula Senumanba. 20A xa sila kuto nin nilamaya silo dayele n ɲen totegefaano to la, men tun be dula Senumanŋo nin dula Senumanba te. Wo totegefaano mu a balo le ti, men gengenta yiro ma. 21Sadaxalasibaxa kuntigiba be n kun, men be siginin Ala la luwo kunna. 22Wo xanma, alan x'e sodun Ala la n jusukunŋo bee la, lannaya jonjonŋo to. Bawo n jusukunŋolu senuyata, xa hakili jaxolu bo n na, anin n balo kuta ji senumanŋo la. 23N be gigo men na xumo fola, n x'e balan wo xa tu n na, bawo Ala men xa lahidolu ta n ɲen, ate mu xantigo le ti. 24Alan xa i hakilo tu i ɲoxo kun, walasa n xa i ɲoxo jusudun, ɲoxoxano nin kuɲumako xanma. 25Alan xana ɲoxo kamaro dabula, í xo dolu be wo kela ɲa men, bari n x'e ɲoxo so hakili la, bawo alu fannu ɲa b'a la xo Marigi la na sutiyata. 26Awa nin n xa tonɲa lon xa ban, nin n x'e tawu xa tu junubo kela, sadaxa xote si nte je tugun men si n na junubolu bo no n na. 27Do xote nte n ɲen xo, fo n silaninba xa sigi xa Ala la kiito nin ta fatimanba laxono, men be nala a jaxolu janila. 28Nin moxo wo moxo tun xa kila Musa la sariya sooso, hinna tun nte a to, wo si faxa x'a la moxo fula walla saba la seedeyalo xan. 29Wo be ɲa men, nin moxo men man Ala Dinxe jaate, Ala la Kafuxanŋo jelo men keta x'a senuya, a man wo mafele fen ti, a xa Ala Ni Senunŋo doxoya, men be neemo dila n ma. Wo tigo nin tooroba man xan bete bete ba xa tanbi Musa la sariya soosobaxo xan? 30N x'a lon xo men x'a fo xo: «Nte le mu tasarabaxo ti; nte si alu ta sara.» Anin du xo: «Marigi si kiito tege a la moxolu xan.» 31Nin n dunta Ala nilama bulo xono kiito xanma, wo xa jaxu de! 32Alu xa kuwo men je folofolo, alu i hakilo lajigi wo la. Wo waxato, alu xa Ala la keneya soto tumo men, alu xa tooro kiika nin keleba muɲa. 33Alu dolu nanita, xa mutakujaxu bee ɲala tumo men, alu tolu x'a yita wolu la xo alu nin i mu kilin ti. 34Alu nin kasolamoxolu kafuta i la toorolu to. Alu bulufenŋolu mutata alu la tumo men, alu sonta xa bono wolu to ɲaɲo to; bawo alu x'a lon xo naafulo do be alu kun men xa fisa, anin men si tu fo abada. 35Wo xanma, lannaya xoyo men be alu la, alu xana faaratu wo la. Baraajiba be wo la. 36Haalibi alu maakuwo be timinadiya la, walasa alu xa Ala sago ke. Nin wo keta, a xa fenŋo men lahido ta alu ɲen, alu si wo soto. 37A be safenin Kitaabo to xo: «Dondin, men xa xan xa na, wo si na. A me me tugun. 38Nte la moxo tilinninŋo si nilamaya soto lannaya fe. Bari nin a xa lannaya silo bula, a la kuwo me diya nte ɲen tugun.» 39Moxo mennu be sila beto bulala, xa taxa i fannu halagi, ntelu nte wolu do ti; bari mennu be tula lannaya la, xa i niyolu lakisi, ntelu mu wo lelu do ti.

will be added

X\