HEBUROLU 1

1Folofolo, Ala x'a la xumo dun a la kilalu da x'a fo n mamaxelu ɲen. A xa wo ke sinɲa kiika ti, anin ɲa kiika ma. 2Bari bi duniya laban in na, a x'a la xumo dun a Dinxe da x'a fo n ɲen. Ala xa duniya da ate le fe. A x'a ke dafenŋo bee ketabaxo ti. 3Wo Dinxe be Ala nooro maɲoxonjebalo yitala. A keɲa nin Ala keɲa bee kilin. A be duniya tomutanin a la xumo barako le la. A xa hadamadinŋolu senuya i la junubolu ma tumo men, a taxata í sigi fo sanjanba to, Sinŋobeetigi Ala kininŋo xoto. 4A bunɲata melekiyolu bee ti, fo Ala xa toxo di a ma, toxo men xa bun wolu ta ti. 5Ala bada man a fo a la meleke si ɲen xo: «Ite le mu ń Dinxe ti; kabirin bi nte keta í Fa ti.» A man a fo meleke du ma xo: «Nte si ke a ɲen fa ti; ate si ke nte ɲen dinxe ti.» 6Bari Ala be a Dinxe folo wuluninŋo kila xa na duniya to tumo men, a xo: «Ala la melekiyolu bee xa ke a batubaxo ti.» 7A xo melekiyolu la kuwo to xo: «Ala b'a la melekiyolu kela foɲo ti, x'a la baaradinŋolu ke tamanolu ti.» 8Bari Ala x'a fo a Dinxe ma xo: «Ite Ala, í be tula mansasigilanŋo xan fo abada. Í b'é la maro kela tilinninɲa le xan. 9Í be ku tilinninŋo le fe, Jaxumanŋo mu í tano le ti. Wo le x'a tu Ala, í la Ala x'é sugandi xa ɲaxaliba tulu daxolenŋo yelema í kunŋo xan, xa lodula di í ma, men xa bun í kafuɲoxolu bee ta ti.» 10Ala xo du a Dinxe ɲen xo: «Marigi, folofolo ite le xa duguxulo da; sanxulo du mu í buluno le ti. 11Wolu bee si sanko, bari ite si tu. Sanxulo nin duguxulo si xoto, í xo faano be xotola ɲa men. 12Í s'i soola, í xo moxo be dorokeba soolala ɲa men; i si mayelema, í xo moxo be a la faanu dunta mayelemala ɲa men. Bari ite ken si tu í ɲa ma, í la nilamaya me ban muume.» 13Awa, Ala x'a fo a la meleke joman ne ɲen xo: «Í sigi ń kininŋo xoto, fo nte xa í jaxolu ke í sinxotofenŋo ti»? 14Melekiyolu mu munnu ti? I bee mu niyo lelu ti, kiladinŋo lelu mu. I be baaro kela Ala ɲen. Moxo mennu xa xan xa kisilo soto ke ti, Ala be melekiyolu kila xa taxa wolu deema.

will be added

X\