GALASINGOLU 6

1Ń badinŋolu, nin moxo do mutata kukebaliko la, atelu mennu b'e taxamala Ni Senunŋo sago la, alu a latilin horomo to. Alu si alu hakilo tu alu fannu la, walasa alu dulu xana fili. 2Alu i ɲoxo deema, x'e ɲoxo kundono ta; wo ɲa ma, alu si Kirisita la sariya dafa. 3Nin moxo do b'a fan mafelenin fen ti, x'a tara a dun nte fusi ti, a b'a fan ne lafilila. 4Moxo bee xa í fan bosilo mafele, xa jaate bo í fan xan; nin a la kebaarolu x'a kunxototakun bo, wo tumo la, a si ɲaɲa. A maakuwo me na ke a la tugun x'é suman moxo xote ma. 5Bawo bee fan kilin s'í la dono ta. 6Moxo men be laxaranna Ala la xumo la, wo xa xan x'a bulufenŋolu bee do di a laxaranbaxo ma. 7Alu xana alu fannu lafili; moxo me jele no Ala ma. Moxo je men lan, í be wo le tegela. 8Moxo men je lanno ke a fan nidiyanɲo ɲen, nidiyanɲo be falinna fenŋo men na, nin wo mu saya ti, a si wo tege. Men je lanno ke Ni Senunŋo ɲen, Ni Senunŋo be falinna fenŋo men na, nin wo mu nilamaya banbalo ti, a si wo tege. 9Alan xana sege kuɲumako la. Nin n man sege wo la, n si tegelo ke a waxato to. 10Wo to, xa kuɲumako waxato tu n bulu, alan xa ku ɲuma ke bee ɲen; sakuta alan badin lannayabaxolu ɲen. 11Alu ɲin safedin kunba innu mafele! Nte fan bulo le x'e safe, x'e ki alu ma. 12Mennu b'a fe x'alu diyakuwa x'alu bula ɲaxala, wolu b'a fe x'e fan nelu kudiya moxolu ɲen. I nte a fe le moxolu x'e tooro Kirisita gengenyiro nofe. 13Wo moxo mennu be ɲaxalo labatula, wolu fannu nte sariya latimmela. I b'a fe alu xa ɲaxa, walasa taagumanseedo xa ke alu balasubo la, men si i bula i fannu bunɲala. 14Fanbunɲa kun xote si ken nte nte bulu, nin n Marigi Isa Kirisita gengenyiro doron ne nte. Kirisita gengenyiro barako to, duniya fenŋolu be le í xo i gengenninŋo nte ɲen, nte du be le í xo moxo gengenninŋo duniya fenŋolu ɲen. 15Ɲaxo nin ɲaxabaliya si nte jaatela; xa ke dafen kuto ti, wo le be jaatela. 16Mennu bee be ɲin sila in taxamala, nte b'a fola wolu ɲen xo: Ala la heero nin a la makaro xa ke wolu nin Ala la Banisirayila bee fe. 17Moxo si xana nte tooro tugun; bawo joogilidaxoto mennu be ń na, wolu b'a yitala xo ń mu Isa ta le ti. 18Ń badinŋolu, n Marigi Isa Kirisita la neemo xa ke alu bee fe. Amiini.

will be added

X\