GALASINGOLU 5

1Kirisita xa n bo bulo to le, nin n si hooroya. Wo xanma, alu i balan xa tu wo hooroya xono. Alu xana alu fannu bula jonɲa la tugun. 2Alu ń name! Nte Poli b'a fola alu ɲen, xo nin alu sonta xa ɲaxa, Kirisita me fen ɲiɲa alu ɲen tugun. 3Ń be saagila a ma tugun xo, nin moxo wo moxo je ɲaxa, a waajibiyaninŋo be wo tigo ma xa sariya muume bee latimme. 4Atelu mennu b'a fe xa tilin Ala ɲa xoto sariya silo la, alu x'e fata Kirisita ma; alu x'alu fannu sinbo Ala la neemo to. 5Ntelu kennu gigo be Ala le xan; wo men si ntelu jaate moxo tilinninŋolu ti. N be wo le laxononin, Ni Senunŋo barako to, wo men be baaro la n na lannaya fe. 6Katugu moxo men be Isa Kirisita la kafuɲoxoya xono, ɲaxa wo, ɲaxabaliya wo, nafa nte wo la wo bulu. Nafa be men na, wo mu lannaya le ti, men si je xanuya fe. 7Alu wuliɲa tun benta! Jon x'alu lalo x'alu bali taxala ɲa tonɲa silo xan? 8Men fota alu ɲen x'alu lason, wo man bo alu kilibaxa Ala la de. 9A fota xo: «Farinfuunulanŋo dondin si mungo bee fuunu.» 10Bari wo bee xan, Marigi xa gigo di nte ma alu la kuwo to, xo alu me sila xote ta. Bari moxo wo moxo be alu hakilo ɲaxamila, fo Ala xa kiito tege wo tigo xan. 11Ń badinŋolu, nin nte la waajulo tun be ɲaxalo le waajibiyala, moxo si tun me nte tooro bi. Wo to, ń be waajulo men du la, xo Kirisita gengenta yiro xan, wo kuwo tun me digi moxo si la. 12Moxo mennu be alu hakilo ɲaxamila alu la jama xono, a tun xa di nte ɲen, wolu xa taxa ɲa wo kuwo to, fo x'e fannu xotofenŋolu muume tege x'e bo je. 13Ń badinŋolu, Ala ken x'alu kili don ne xanma alu xa hooroya; bari wo xana ke sabaabu ti x'alu bula alu fannu nidiyanɲo kela, bari a xa xan x'alu bula i ɲoxo xanula le, anin x'e ɲoxo maakuwo ɲiɲa. 14Bawo sariyalu bee be ɲin sariya kilin in ne xono xo: «Í xa í moxoɲoxo xanu í xo í fan.» 15Bari nin alu keta i ɲoxo ma, x'e ɲoxo kin, x'e ɲoxo ɲimi, alu i korosi, nin wo nte alu s'i ɲoxo ban. 16Awa, men be ń ma x'a fo alu ɲen, wo fele xo: Alu i taxama Ni Senunŋo barako la. Nin wo keta, alu me alu fannu nidiyanɲekuwolu ke tugun. 17Bawo kuwo mennu mu hadamadinŋo nidiyanɲekuwolu ti, wolu man di Ni Senunŋo ɲen. Kuwo mennu mu Ni Senunŋo diyanɲekuwolu ti, hadamadinŋo nidiyanɲeku nte wolu ti. I b'e ɲoxo kelela, walasa alu b'a fe xa kuwo mennu ke, alu xana wolu ke. 18Bari nin alu bosilo be bennin Ni Senunŋo diyanɲo ma, wo tumo la, alu nte Musa la sariya xoto tugun. 19Bee xa hadamadinŋo nidiyanɲekuwolu lon: Jadoya, kunoxoninko, fuyanɲa, 20bolibato, doomaya, jaxuya, kelejaliya, kiiliya, jusubaya, faxakilinjaxuya, fatalo, xantala, 21xonneya, dolobaminŋo, domolibajaxo, anin wo ɲoxon kulu. Ń be alu lasobila í xo ń dalita x'a fo alu ɲen ɲa men, xo wo kuwolu kebaxolu me dun Ala la Mansaya xono abada. 22Bari Ni Senunŋo be fenŋo mennu dila moxo ma, wolu mu ɲin fen in nelu ti: Xanuya, ɲaɲo, heero, muɲo, hinno, ɲumaya, lannamoxoya, 23sabaro, fanmuto. Sariya si nte je, men be wo kuwolu kabala. 24Mennu mu Isa Kirisita la moxolu ti, wolu xa i nidiyanɲekuwolu nin i negolu nin i sagolakuwolu gengen ne yiro ma. 25Nin Ni Senunŋo xa nilamaya kuto di n ma, wo to, alan dulu xa xan x'e taxama Ni Senunŋo diyanɲo la. 26Alan xana n fannu bunɲa, n xana i ɲoxo bagatege, anin xa i ɲoxo xonneya.

will be added

X\